Euveredh Fydhyans war Ejyp

1Go-i an vebyon dhiwostydh, yn-medh an Arloedh,

a dewl towl nag yw ahanav vy,

a wra keffrysyans nag yw herwydh ow spyrys vy;

may keworrons pegh dhe begh;

2neb a gerdh dhe mos yn-nans dhe Ejyp

heb govynn ow bodh,

ha hwilas gweres yn nerth Faro,

ha trestya yn goskes Ejyp.

3Mes nerth Ejyp a vydh meth dhywgh,

ha trestya yn goskes Ejyp a vydh disenor.

4Kyn fo y bennsevigyon yn Soan,

ha'y gannasow devedhys bys yn Hanes,

5pubonan a vydh methek

dre bobel nag yw dhe les ragdha,

na dhre naneyl gweres na les,

mes meth ha keredh maga ta.

6Profoesans a-dro dhe vestes an Negeb.

Dre dir a ahwer hag angoes,

a lewes hag a lew owth usa,

a nader ha sarf askellek,

i a dheg aga rychys war skoedh asenes,

ha'ga thresoryow war geyn kowrvergh,

dhe bobel nag yw dhe les.

7Gweres Ejyp yw euver ha diles.

Rakhenna my a's henow

Rahab Diek.

Pobel Dhiwostydh

8Ke lemmyn, skrif e war leghenn a-ragdha,

grav e yn lyver,

rag may fo yn dydhyow diwettha

dustuni bys vykken.

9Rag homm yw pobel dhiwostydh,

mebyon wowek,

mebyon na vynn klewes

lagha an Arloedh;

10neb a lever dhe'n welesydhyon, ‘Na welewgh’,

ha dhe'n brofoesi, ‘Na brofoesewgh dhyn an gwir,

kewsewgh orthyn taklow fekyl,

profoesewgh husow;

11kewgh mes a'n hyns, treylyewgh dhiworth an fordh,

astelewgh dri Sans Ysrael a-ragon.’

12Rakhenna yndellma y lever Sans Ysrael:

Drefenn hwi dhe dhenagha an ger ma,

ha trestya yn arwask ha toell,

ha kregi warnedha;

13rakhenna an kammweyth ma a vydh ragowgh

avel aswa yn fos ughel parys dhe goedha, deantell, balek,

may teu hy thorrva distowgh, a-dhesempis.

14Hy thorrva a vydh avel torrva lester priweythor,

brewys heb pita,

rag na vo kevys yn y vrewyon darn

dhe gemmeres tan dhiwar oeles

po dhe dhri dowr yn-bann dhiworth dowrargh.

15Rag yndellma y lever an Arloedh Duw, Sans Ysrael:

Yn edrega ha powes hwi a vydh selwys,

yn kosoleth ha fydhyans y fydh agas nerth,

mes ny'n mynnewgh.

16Hwi a leveris,

‘Na, drefenn ni a fi war vargh’ –

rakhenna hwi a fi!

ha ‘Ni a varghok war vargh skav’ –

rakhenna agas helghysi a vydh skav!

17Mil a fi a-rag godros onan;

rag godros pymp hwi a fi,

bys may fowgh gesys

avel gwelenn-vaner war benn menydh,

avel tokyn war vre.

Ambos Duw dhe Sion

18Rakhenna an Arloedh a worta dhe vos grassyes orthowgh;

ha rakhenna ev a sev dhe gemmeres truedh ahanowgh.

Rag an Arloedh yw Duw a wirvreus,

gwynnvys kemmys a'n gorta.

19Ytho an bobel yn Sion, trigys yn Yerusalem, ny oel namoy. Ev a gemmer truedh ahanas orth son dha gri; kettell y'n klew, ev a'th worthyp. 20Kyn rollo an Arloedh dhywgh bara fienasow ha dowr galar, ny vydh dha dhyskadoryon kudhys namoy, mes dha dhewlagas a wel dha dhyskadoryon. 21Dha dhiwskovarn a glew ger a-dryv dhis, ow leverel, ‘Hemm yw an fordh, kerdhewgh ynni’, pan dreylyowgh dhe'n dyghow, po pan dreylyowgh dhe'n kledh. 22Hwi30:22 Hwi: War-lergh an Septuagint Ty. a dhefol dha idolys gorherys gans arghans ha dha imajys gorowrys; ty a's tewl dhe-ves avel kweth avlan ha leverel dhedhi30:22 dhedhi: henn yw, dhe'n gweth., ‘Ke dhe-ves!’

23Ev a re glaw rag dha has a hesydh y'n dor, ha bara, askorr an dor, a vydh tew ha pals. Y'n jydh na dha jatel a beur yn peurva efan; 24an oghen ha'n asenes a wonedh an dor a dheber boes ha bara an gog lesys dre bal ha forgh. 25War pub menydh ughel ha pub bre ughel y fydh goverow ow resek gans dowr, yn dydh an ladhva vras pan goedh an touryow. 26Golow an loer a vydh avel golow an howl, ha golow an howl a vydh seythplek, avel golow seyth dydh, y'n jydh may kelm an Arloedh torrva y bobel, ha yaghhe goli an strekys a weskis.

Breus erbynn Assyria

27Otta, hanow an Arloedh a dheu a bellder,

gans sorr ow leski, ha gans mog tew ow mos yn-bann;

y dhiwweus yw leun a sorrvann,

ha'y daves yw avel tan ow tevorya.

28Y hwyth yw avel avon ow fenna

ow trehedhes bys an konna,

dhe groedra an kenedhlow gans kroeder a dhistruyans,

ha gorra fronn war dhiwen an bobel a wra dhedha mos yn stray.

29Y'gas bydh kan kepar hag yn nos solempnya goel, ha lowena an golonn, kepar dell gerdhir gans son an bib dhe dhos yn menydh an Arloedh, dhe Garrek Ysrael. 30An Arloedh a wra dh'y lev meuredhek bos klewys, ha dhe strekys y vregh ow tiyskynna bos gwelys, gans konnar y sorr ha flamm a dan ow tevorya, gans kowas ha tewedh ha keserennow. 31Rag Assyria a vydh brewys gans lev an Arloedh, pan wra ev aga gweskel gans y welenn. 32Pub strekys a welenn an geredh a wra an Arloedh y worra warnodho a vydh gans son tabouryow ha sowtris, hag ev owth omladh orta yn batel gans strokosow y vregh. 33Rag Tofeth re beu ordenys a hirneth, ynwedh parys yw rag an myghtern. Re beu gwrys down ha ledan, gans tan ha palster a brenn. Anall an Arloedh avel gover a loskven a wra y enowi.