Gweres yn mysk Ankres

1Go-jy, ty dhistruer,

mes ny veus distruys;

ty a draytas,

mes nagonan ny wrug dha drayta.

Pan astelydh distrui,

ty a vydh distruys;

pan astelydh trayta,

i a wra dha drayta.

2A Arloedh, bydh grassyes orthyn; ni re'th wortas.

Bydh agan bregh pub myttin,

ha'gan selwyans yn termyn ankres.

3Orth tros an tervans, poblow a fi dhe'n fo;

pan os eksaltys, kenedhlow yw skattrys.

4Preydh a vydh kuntellys kepar dell ve gans an lokust;

avel hes a lokustes i a lamm warnodho.

5An Arloedh yw ughelhes, trigys y'n ughelder;

ev a lenow Sion a wirvreus hag ewnder.

6Ev a vydh fyrvder dha dermynyow,

rychys a selwyans, furneth ha skentoleth;

own an Arloedh yw y dresor.

7Otta, gwer golonnek a gri y'n stretys;

kannasow kres a oel yn hwerow.

8An fordhow meur yw gwastys,

nyns eus tremenyas y'n hyns.

An kevambos yw terrys,

ha dispresys yw an tiow;33:8 tiow: Amendys. Ebrow sitys.

ny wrons vri a dus.

9An tir a gyn ha gwedhra;

Lebanon a gemmer meth ha pedri;

Sharon yw avel gwylvos,

ha Bashan ha Karmel a shak aga del dhe-ves.

10‘Lemmyn my a sev’, yn-medh an Arloedh,

‘lemmyn my a vydh ughelhes,

lemmyn my a vydh eksaltys.

11Hwi a gonsev us, hwi a dhineyth kulyn;

agas anall yw tan a wra agas devorya.

12An poblow a vydh leskys avel lim;

avel spern treghys, leskys vydhons y'n tan.’

13Klewewgh, an re yw a-bell, pandr'a wrug vy;

aswonnewgh ow galloes, an re yw ogas.

14An beghadoryon yn Sion a berth own;

kren a dhalghenn an re dhidhuw:

‘Piw ahanan a yll triga gans an tan a dhevor?

Piw ahanan a yll triga gans flammow a dhur bys vykken?’

15An den a gerdh yn ewnder ha kewsel ewnhynseth,

neb a dhenagh gwayn a arwask,

neb a shak y dhiwleuv ma na synsons falswober,

ha stoppya y skovarn ma na glewons a skoellya goes,

ha degea y dhewlagas ma na welons drog –

16ev a vydh trigys y'n ughelderyow,

dinasow an karregi a vydh y skovva;

y vara a vydh res dhodho, ha ny fyll dowr dhodho.

17Dha dhewlagas a wel an myghtern yn y dekter

i a wel tir owth ystynn pell.

18Dha golonn a berth kov a'n browagh:

‘Ple'ma an den esa ow nivera?

Ple'ma an den esa ow poesa an doll?

Ple'ma an den esa ow rekna an touryow?’

19ny welydh an bobel valgh byth moy,

pobel a yeth re ankoth dhe gonvedhes,

taves koynt ankonvedhadow.

20Mir war Sion, sita agan solempnitys apoyntys;

dha dhewlagas a wel Yerusalem,

trigva gosel, tylda anwayadow;

ny vydh y ebilyer nevra tennys yn-mes,

na ny vydh y gerdyn terrys.

21Mes ena an Arloedh meuredhek a vydh dhyn

tyller a avonyow ha goverow ledan;

ny vydh gorholyon gans roevow ow mos ynno,

na ny vydh lester bras ow tremena dresto.

22Rag an Arloedh yw agan breusyas,

an Arloedh yw agan rewler,

an Arloedh yw agan myghtern;

Ev yth yw neb a wra agan sawya.

23Dha lovanweyth a greg lows,

ny yllons synsi fast sel aga gwern,

na gwitha an goel lesys yn-mes.

Ena preydh pals a vydh kevrennys;

hwath evredhyon a yll pylla.

24Ny lever annedhyas, ‘My yw klav’;

kammweyth an bobel trigys ynni a vydh gevys.