Godros Sennagherib erbynn Yerusalem

1Y'n peswardhegves blydhen a reyn Hezekia, Sennagherib, myghtern Assyria a dheuth yn-bann erbynn oll an trevow kerys a Yuda, ha settya dalghenn ynna. 2Ena myghtern Assyria a dhannvonas an Rabshake36:2 Rabshake: Soedhek ughel assyriek, yw dhe styrya Pennhanafor, po Pennleveryas. dhiworth Lakish dhe Yerusalem dhe vyghtern Hezekia gans lu bras. Ev a sevis orth dowrbons an poll gwartha ryb an fordh dhe Bark an Troghyer. 3Elyakim mab Hilkia, governour an palys, eth dhe-ves dhodho, ha Shebna an pennskrifennyas ha Yoagh mab Asaf an kovadhor.

4An Rabshake a leveris dhedha, ‘Leverewgh dhe Hezekia, Yndellma y lever an myghtern meur, myghtern Assyria: Pandr'yw an fydhyans ma a drestydh ynno? 5Ty36:5 Ty: Amendys. Ebrow My. a lever bos genes kusul ha galloes rag an gas, mes nyns yw marnas geryow gwag. Lemmyn yn piw y fydhydh, ha ty ow rebellya er ow fynn? 6Otta, ty a fydh yn lorgh an gorsenn drogh ma, Ejyp, a enter ha gwana leuv an gour a boes warnedhi. Yndella yw Faro myghtern Ejyp, dhe vyns a drest ynno. 7Ha mar leverydh dhymm, “Ni a fydh y'n Arloedh agan Duw”, a nyns yw ev neb a wrug Hezekia kemmeres yn-mes y dylleryow ughel ha'y alteryow, ow leverel dhe Yuda ha Yerusalem, “Hwi a wordh a-rag an alter ma”? 8Lemmyn gwra bargen gans ow arloedh, myghtern Assyria, ha my a re dhywgh dew vil margh, mar kyllydh y'th parth jy settya marghogyon warnedha. 9Fatell yllydh treylya dhe-ves fas unn soedhek yn mysk an lyha a servysi ow arloedh, ha ty ow fydhya yn Ejyp rag charettow ha marghogyon? 10Ha lemmyn, a yskynnis vy erbynn an tir ma dh'y dhistrui heb an Arloedh? An Arloedh a leveris dhymm, Yskynn erbynn an tir ma, ha'y dhistrui.’

11Ena Elyakim, Shebna ha Yoagh a leveris dhe'n Rabshake, ‘Kows, my a'th pys, dhe'th servysi yn Aramaek rag ni a'n konvedh; na gows orthyn yn Yedhowek a-ji dhe glewans an bobel usi war an fos.’ 12Mes yn-medh an Rabshake, ‘A wrug ow arloedh ow dannvon dhe gewsel an geryow ma dhe'th arloedh ha dhiso jy, a-der dhe'n wer usi owth esedha war an fos, yw destnys genowgh hwi dhe dhybri aga hawgh hag eva aga urin?’

13Ena an Rabshake a sevis ha garma gans lev ughel yn Yedhowek, ‘Klewewgh geryow an myghtern meur, myghtern Assyria. 14Yndellma y lever an myghtern: “Na esewgh Hezekia dh'agas toella, rag ny yll agas delivra. 15Na esewgh ev dhe wul dhywgh fydhya y'n Arloedh, ow leverel, An Arloedh a wra agan delivra yn surredi; ny vydh an sita ma res yn leuv myghtern Assyria.” 16Na woslowewgh orth Hezekia; rag yndellma y lever myghtern Assyria: “Omrewgh ha dewgh yn-mes dhymm. Ena pubonan a dheber a'y winbrenn y honan ha'y figbrenn y honan ha pubonan a yv a'y buth y honan, 17bys pan dhov ha'gas kemmeres yn-mes dhe dir haval dh'agas tir agas honan, tir a ys ha gwin nowydh, tir a vara ha gwinlannow. 18Na esewgh Hezekia dh'agas toella, ow leverel, An Arloedh a wra agan delivra. A wrug duw vytholl a'n kenedhlow delivra y dir rag leuv myghtern Assyria? 19Ple'ma duwow Hamath hag Arpad? Ple'ma duwow Sefarvaym? A dhelirvsons Samaria yn-mes a'm leuv? 20Piw eus a oll duwow a'n tiryow ma neb a dhelivras aga thiryow yn-mes a'm leuv? Ytho fatell yll an Arloedh delivra Yerusalem yn-mes a'm leuv?” ’

21Mes i a dewis ha ny worthybsons dhodho ger, drefenn bos gorhemmynn an myghtern, ‘Na worthybewgh dhodho.’ 22Ena Elyakim mab Hilkia, governour an palys, ha Shebna an pennskrifennyas ha Yoagh mab Asaf an kovadhor a dheuth dhe Hezekia skwardys aga dillas, ha derivas dhodho geryow an Rabshake.