Pobel Duw yw Konfortys

1Konfortyewgh, konfortyewgh ow fobel,

a lever agas Duw.

2Kewsewgh orth kolonn Yerusalem,

ha gelwewgh dhedhi

hy gonis dhe vos gorfennys,

ha tylys kessydhyans hy hammweythres,

rag hi re dhegemmeres a dhorn an Arloedh

dewgemmys rag oll hy feghadow.

3Unn lev a gri:

‘Y'n gwylvos pareusewgh hyns an Arloedh,

gwra kompes y'n difeyth fordh-veur rag agan Duw.

4Pub nans a vydh drehevys yn-bann,

ha pub menydh ha bre a vydh iselhes;

an tir ankompes a vydh leven,

ha'n tylleryow garow nans ledan.

5Ha glori an Arloedh a vydh diskwedhys,

ha pub kig a wra y weles war-barth,

rag ganow an Arloedh re gewsis.’

6Unn lev a lever: ‘Galw!’

Hag y leveris vy,40:6 Hag y leveris vy: Ow siwya an Septuagint ha'n Vulgat. Ebrow hag ev a leveris, henn yw, lev arall a worthybis. ‘Pyth a alwav?’

Kig yw gwels,

hag oll y splannder yw haval dhe vleujenn an gwel.

7An gwels a wedher, gyllys krin yw an vleujenn,

drefenn anall an Arloedh dhe hwytha warnodho;

avel gwels yw an bobel diogel.

8An gwels a wedher, gyllys krin yw an vleujenn,

mes ger agan Duw a sev bys vykken.

9Yskynn yn menydh ughel,

A Sion, dyller nowodhow da;

drehav dha lev gans nell,

A Yerusalem, dyller nowodhow da;

drehav e yn-bann heb own;

lavar dhe sitys Yuda,

‘Otta dha Dhuw!’

10Otta, an Arloedh Duw a dheu gans nerth

ha'y vregh a rewl ragdho;

otta, yma y wober ganso,

ha'y werison a-ragdho.

11Avel bugel ev a vag y flokk;

gans y vregh ev a guntell y eyn

ha'ga doen yn y askra;

ev a hembronk yn hwar an re usi ow ri bronn.

12Piw yw re vusuras an dowrow yn palv y leuv,

ha re verkyas an nevow gans dornva,

ha re synsis doust an bys yn musurva,

ha re boesas an menydhyow yn mantol

ha'n breow yn balans?

13Piw a gevarwoedhas Spyrys an Arloedh,

po avel y gusulyer a'n dyskas?

14Piw ganso yth omgusulyas dhe ri dhodho konvedhes

ha dhe dhyski dhodho an hyns a wirvreus?

Piw a dhyskas skians dhodho,

hag a wrug dhodho godhvos an fordh a gonvedhes?

15Otta, an kenedhlow yw avel banna dhiworth kelorn,

hag avel polter war an vantol synsys yns.

Otta, ev a gemmer an ynysow yn-bann avel ponn.

16Nyns yw Lebanon lowr rag keunys an tan,

na'y vestes lowr rag offrynn leskys.

17An kenedhlow oll yw avel mann a-ragdho;

synsys yns ganso le es mann, ha gwakter.

18Piw dhodho yth hevelebowgh Duw,

po py hevelep a vynnowgh y wul dhodho?

19An imajys yw teudhys gans an krefter,

ha'n owrer a ystynn owr mortholys warnodho,

hag a wra ragdho kadonyow a arghans.

20Neb yw re voghosek rag offrynn

a dhewis prenn na wra pedri;

ev a hwila ser konnyk ragdho

rag drehevel imaj gravys na vydh deantell.

21A ny wodhowgh? A ny glewsowgh?

A ny veu kewsys dhywgh a-dhia'n dhallethva?

A ny gonvedhsowgh a-ban veu selys an bys?

22Ev a esedh war gylgh an bys,

ha'y drigoryon avel kulyoges-reden yth yns;

ev a ystynn an nevow avel vayl,

hag a's les avel tylda ynno may trigir.

23Ev a dhre pennternedh dhe vos mann;

ha gul breusysi an bys gwakter.

24Skant nyns yns i plynsys, skant nyns yns i hesys,

skant ny wra aga ben gwreydhya y'n dor,

kyns ev dhe hwytha warnedha hag y hwedhrons,

ha'n korwyns a's dre dhe-ves avel kulyn.

25Ytho piw dhodho y'm hevelebowgh,

may fiv par dhodho? yn-medh an Sans.

26Drehevewgh yn-bann agas dewlagas, ha gwelewgh:

piw a wrug an re ma?

Ev neb a dheg yn-mes aga lu, orth aga nivera,

ha'ga gelwel pubonan orth hanow;

der y nerth meur ha'y alloes krev

ny fyll onan vyth.

27Prag y leverydh, A Yakob,

hag y kewsydh, A Ysrael,

‘Kudhys yw ow fordh rag an Arloedh,

ha dispresys yw ow breus gans ow Duw’?

28A ny wodhves,

a ny glewsys?

An Arloedh yw an Duw heb diwedh,

Kreador pennow an norvys.

Ny glamder na ny vydh skwith;

dres hwithra yw y gonvedhes.

29Ev a re nerth dhe'n re wann,

ha dhe neb na'n jeves galloes ev a voghha nerth.

30Bys y'n re yowynk yth or klamderek ha skwithys,

ha gwer yowynk fest a drebuch;

31mes an re a worta an Arloedh

a nowydhha aga nerth.

I a yskynn gans eskelli avel eryon;

i a boen heb bos skwith,

i a gerdh heb klamdera.