Gwereser Ysrael

1Bedhewgh tawel a-ragov, hwi ynysow;

nowydhhes an poblow aga nerth,

nesens i, ena kewsens i;

nesyn ni war-barth rag breus.

2Piw a wrug dhe nebonan difuna dhiworth an howldrevel,

orth y elwel dh'y servis41:2 dh'y servis: Ebrow dh'y droes. yn ewnder?

Ev a re kenedhlow a-ragdho,

ha fetha myghternedh;

ev a's gwra avel doust gans y gledha,

avel sowl herdhys gans y warak.

3Ev a's helgh ha tremena yn sawder,

war hynsyow ma na drettyas y dreys.

4Piw re wrug hag a gowlwrug hemma,

ow kelwel an henedhow a-dhia'n dhallethva?

My, an Arloedh, an kynsa,

ha gans an re dhiwettha; my yw ev.

5An arvoryow re welas hag own a's teves,

pennow an bys a gren;

i re nesas ha dos.

6Peub a weres y gentrevek,

hag a lever dh'y vroder, ‘Bydh krev!’

7An ser a golonnekha an owrer,

hag ev neb a levenha gans an morthol

a golonnekha gwesker an anwan,

ow leverel a'n sodra ‘Da yw’,

hag ev a'n fast gans kentrow ma na vo deantell.

8Mes ty, Ysrael, ow gwas,

Yakob, neb re dhewisis,

askorr Abraham, ow howeth;

9ty neb a gemmeris vy a bennow an norvys,

ha'th helwel a'y bella sornow,

ow leverel dhis, ‘Ty yw ow gwas,

my re'th tewisas ha ny'th tewlis dhe-ves’;

10na borth own, rag yth esov genes,

na vydh digolonnek, rag my yw dha Dhuw;

my a wra dha nertha, my a wra dha weres,

my a'th syns gans dorn dhyghow ow selwyans.

11Otta, oll an re a serr orthis

a's tevydh meth hag a vydh konfondys;

an re a striv orthis

a vydh avel mann, ha mos dhe goll.

12Ty a's hwila mes ny's kevydh,

an re a striv orthis;

an re a werr orthis

a vydh avel mann kammenn.

13Rag my, an Arloedh, yw dha Dhuw

a syns dha dhorn dhyghow;

neb a lever dhis, ‘Na borth own, my a'th weres.’

14Na borth own, ty bryv, Yakob,

ty gontronenn41:14 gontronenn: Ow siwya an Syriek. Ebrow tus. Ysrael!

My a wra dha weres, yn-medh an Arloedh,

dha Dhasprenyas, an Sans a Ysrael.

15Otta, my a'th wra draylell-dhrushya,

lymm, nowydh, ha dhedhi dyns,

ty a dhrusha an menydhyow, ha'ga brewi,

ha ty a wra an breow avel us.

16Ty a wra aga noetha, ha'n gwyns a's deg dhe-ves,

ha'n korwyns a wra aga skattra.

Mes ty a lowenha y'n Arloedh,

ha bostya y'n Sans a Ysrael.

17Pan hwila an voghosogyon ha'n edhommogyon dowr,

ha nyns eus banna,

ha krin yw aga thaves gans syghes,

my an Arloedh a worthyp dhedha,

my, Duw Ysrael, ny's gasav.

18My a vynn igeri avonyow war an ugheldiryow moel,

ha fentynyow yn mysk an nansow;

my a wra an difeythtir poll dowr,

ha'n dor sygh fentynyow dowr.

19My a worr y'n difeythtir an kederwydh,

an akasia, an myrtwydh ha'n olewbrenn.

My a worr y'n difeythtir meryw,

an platan ha'n kypres war-barth,

20rag may hwello tus ha godhvos,

ynwedh prederi ha konvedhes,

y hwrug dorn an Arloedh hemma

ha'n Sans a Ysrael dh'y formya.

Chalenj Duw erbynn an Fals Dhuwow

21Dyllewgh agas ken, yn-medh an Arloedh,

degewgh agas provow, yn-medh Myghtern Yakob.

22Degens i ha derivens dhyn

an pyth a hwyrvydh,

derivens an taklow tremenys, pyth yns,

rag may prederryn a-dro dhedha,

rag may hwodhvyn aga siwyans;

po derivewgh dhyn an taklow yw dhe dhos.

23Derivewgh an taklow yw dhe dhos a-wosa,

rag may hwodhvyn hwi dhe vos duwow;

gwrewgh da, po gwrewgh drog,

rag may fyn digolonnek hag ownek war-barth.

24Otta, hwi yw mann,

ha'gas ober yw mann,

tra gasadow yw neb a'gas dewis.

25My a wrug dhe onan difuna dhiworth an gledhbarth hag ev a dheu,

dhiworth an howldrehevel, hag ev a elow war ow hanow.

Ev a stank war rewloryon kepar dell ve war leys,

dell drett an priweythor an pri.

26Piw a'n derivas a-dhia'n dhallethva, rag may hwodhvons,

ha'y dharleverel rag may lavarren, ‘Ev yw gwirleveryas’?

Nyns esa denvyth a'n derivas,

na denvyth neb a'n dellos,

na nebonan a glewas dha eryow.

27My re beu an kynsa neb a dherivas dhe Sion, ‘Awottensi!’

My a re dhe Yerusalem kannas a nowodhow da.

28My a viras, mes nyns esa denvyth;

yn mysk an re ma nyns eus kusulyer vyth,

neb pan wovynnav, a re gorthyp.

29Otta, toell yns i oll,

nyns yw aga oberow travyth;

aga imajys teudh yw gwyns ha gwakter.