An Gwas, Golow dhe'n Kenedhlow

1Otta ow gwas neb a skoedhyav,

ow den dewisys may lowenha ow enev ynno;

my re worras ow Spyrys warnodho,

ev a dheg gwirvreus yn-mes dhe'n kenedhlow.

2Ny gri ev na garma,

na gul may klewver y lev y'n stret.

3Korsenn vrewys ny's terr,

ha bubenn ow megi ny's difeudh;

yn lel y teg gwirvreus yn-rag.

4Ny fyll na ny vydh ev digolonnek,

bys pan fastyo gwirvreus y'n norvys;

ha'n arvoryow a worta y lagha.

5Yndellma y lever Duw, an Arloedh,

neb a wrug an nevow ha'ga ystynn,

neb a lesas an norvys ha'n pyth a dheu anodho,

neb a re anall dhe'n bobel usi warnodho,

ha spyrys dhe'n re a gerdh ynno:

6My yw an Arloedh, my re'th helwis yn ewnder,

my a'th syns er an leuv, ha dha witha,

my re'th ros yn kevambos dhe'n bobel,

golow dhe'n kenedhlow,

7rag igeri an dhewlagas dhall,

dhe dhoen yn-mes an brisnoryon a'n vagh,

dhiworth an prison an re a esedh yn tewlder.

8My yw an Arloedh, henn yw ow hanow,

ow glori ny'n rov dhe gen dhuw,

nag ow gormola dhe imajys gravys.

9Otta, an taklow dargenys kyns, hwarvedhys yns,

ha taklow nowydh a dherivav lemmyn;

kyns i dhe egina

anedha y terivav orthowgh.

Kan a Wormola

10Kenewgh dhe'n Arloedh kan nowydh,

y wormola dhiworth penn an norvys!

Tarannes an mor ha pup-tra eus ynno,

an arvoryow ha'ga thrigoryon.

11Dreheves an gwylvos ha'y sitys aga lev,

an trevow mayth usi Kedar trigys ynna;

kanes trigoryon Sela yn lowen,

garmens dhiwar bennow an menydhyow.

12Rens i gordhyans dhe'n Arloedh

ha derivas i y wormola y'n arvoryow.

13An Arloedh a yn-mes avel gour krev,

avel kasor y tifun ev y gonnar,

ev a gri, ev a arm yn ughel,

ev a dhiskwedh y nerth erbynn y eskerens.

14Hirneth my re dewis,

my re omwithas stag hag omdempra;

lemmyn my a gyn avel benyn ow tineythi,

my a arm ha dyena.

15My a wra menydhyow ha breow difeyth,

ha sygha aga erbys oll;

my a dreyl an avonyow dhe ynysow,

ha sygha an pollow.

16My a hembronk dellyon

yn fordh na aswonnons;

yn hynsyow na aswonnons

y's gidyav.

My a dreyl an tewlder a-ragdha dhe wolewder,

an tylleryow garow dhe dir leven.

An re ma yw an taklow a wrav,

ha ny's forsakyav.

17An re a drest yn imajys gravys

a vydh treylys war-dhelergh hag a berth meth –

an re a lever dhe imajys teudh,

‘Hwi yw agan duwow.’

18Klewewgh, hwi neb yw bodhar,

ha mirewgh, hwi neb yw dall, rag may hwellowgh.

19Piw yw dall marnas ow gwas,

po bodhar avel ow hannas a dhannvonav?

Piw yw dall avello ev neb yw omres dhymm?42:19avello ev neb yw omres dhymm: Styr an Ebrow yw ankler; martesen: avel den perfydh.

po dall avel gwas an Arloedh?

20Ev a wel lies tra, mes ny wra vri anedha,

igor yw y dhiwskovarn mes ny glew ev.

Disobayans Ysrael

21Da o gans an Arloedh, dre reson y ewnder,

moghhe an lagha ha'y gul gloryus.

22Mes homm yw pobel ledrys ha ravnys,

i oll yw maglennys yn tell

ha kudhys yn baghow;

devedhys yns ha bos preydh heb denvyth dhe sawya,

pyll heb denvyth dhe leverel ‘Daswra!’

23Piw yn agas mysk a vynn goslowes orth hemma,

ha gul vri ha klewes rag an termyn a dheu?

24Piw a ros Yakob dhe'n ravner,

hag Ysrael dhe'n ladron?

A ny veu an Arloedh er y bynn may peghsyn?

Ny vynnsons kerdhes yn y fordhow,

ha ny vynnsons bos gostydh dh'y lagha.

25Ytho ev a dhinewis warnodho toemmder y sorr,

ha nerth an gas.

Ev a worras tan ynno a-derdro, mes ny gonvedhas,

ev a'n loskas, mes ny'n kemmeras yn y golonn.