Ambos Daspren

1Ha lemmyn yndellma y lever an Arloedh,

ev neb a'th wrug, A Yakob,

hag ev neb a'th formyas, A Ysrael:

Na borth own, rag my re'th prenas

ha re'th henwis orth hanow, dhymmo vy yth os.

2Pan dremenydh der an dowrow y fydhav genes,

ha der an avonyow, ny livons warnas;

pan gerdhydh dre dan, ny vydhydh leskys,

ha ny wra an flamm dha woleski.

3Rag yth ov an Arloedh, dha Dhuw,

an Sans a Ysrael, dha Selwyas.

Ejyp a rov avel dha dhaspren,

Ethiopia ha Seba yn keschanj ragos.

4Rag ty yw drudh y'm golok

hag enorys, ha my a'th kar;

y rov tus yn keschanj ragos,

kenedhlow yn keschanj rag dha vewnans.

5Na borth own, rag yth esov genes;

dhiworth an howldrevel y trov dha has,

dhiworth an howlsedhes y'th kuntellav.

6My a lever dhe'n gledhbarth, ‘Daskorr i!’

ha dhe'n dhyghowbarth, ‘Na wra aga lesta!

Dro ow mebyon a'n pellder

ha'm myrghes a benn an norvys,

7pub huni neb yw henwys orth ow hanow,

neb re wrugavy rag ow glori,

neb a formis vy ha kreatya.’

8Dro yn-rag an bobel yw dall, mes yma dewlagas dhedha,

an re yw bodhar, mes yma diwskovarn dhedha.

9Omguntellas an kenedhlow war-barth

ha bedhes an poblow kuntellys!

Piw yn aga mysk a dherivas hemma,

ha darleverel an taklow kyns?

Degens aga dustunioryon rag aga justifia,

ha klewens ha leverens, ‘Gwir yw.’

10‘Hwi yw ow dustunioryon’, y lever an Arloedh,

ha'm gwas a dhewisis,

rag may hwodhvowgh ha krysi dhymm,

ha konvedhes, my dhe vos ev.

Kyns my ny veu Duw formys,

na ny vydh nevra war ow lergh.

11My, my yw an Arloedh,

hag a-der my nyns eus selwyas.

12My a dherivas hag a selwis hag a dhellos,

pan nag esa Duw astranj yn agas mysk,

ha hwi yw ow dustunioryon, y lever an Arloedh, my dhe vos Duw.

13Ynwedh alemma rag my yw ev;

nyns eus denvyth a yll delivra dhiworth ow dorn;

my a ober ha piw a yll y lettya?

14Yndellma y lever an Arloedh,

dha dhasprenyer, an Sans a Ysrael:

A'gas govis y tannvonav dhe Babylon,

ha distrui aga fowesigyon oll,

y'n gorholyon mayth esa aga kriow lowen ow tasseni.43:14 y'n gorholyon mayth esa aga kriow lowen ow tasseni: Po amendyans ha garm Kaldea a vydh treylys dhe gyni. Styr an Ebrow yw ankler.

15My yw an Arloedh, agas Sans, formyer Ysrael, agas myghtern.

16Yndellma y lever an Arloedh,

a wra fordh y'n mor,

hyns y'n dowrow meur,

17neb a dhro yn-mes charett ha margh,

lu ha kasor war-barth;

i a wrowedh, ny yllons sevel yn-bann,

megys yns, avel bubenn dhifeudhys:

18na berthewgh kov a'n taklow kyns,

na na brederewgh a'n taklow koth.

19Otta, y hwrav tra nowydh,

lemmyn y hwra ev egina: a ny'n gwelowgh?

My a wra hyns y'n difeythtir,

avonyow y'n gwylvos.

20An bestes gwyls a'm enor,

an owrgeun ha'n strusyow;

rag my a re dowr y'n difeythtir,

avonyow y'n gwylvos,

dhe ri diwes dhe'm pobel dhewisys,

21an bobel a formis ragov ow honan,

rag may teriffens ow gormola.

22Saw ny elwsys warnav, A Yakob;

mes ty re beu skwithys orthiv, A Ysrael.

23Ny dhuges dhymm dha dheves rag offrynn leskys,

na'm enora gans dha sakrifisow.

Ny'th veghis gans offrynnow,

na'th skwitha gans frankynkys.

24Ny brensys dhymm kalamus43:24 kalamus: Korsenn hweg, Acorus calamus, ynperthys dhe'n Tir Sans dhiworth Eynda yn furv polter. Pur dalvosek o, ha devnydhys yn oyl sans an untyans, Eks 30:23 hag y'n melysethow an moyha drudh. gans arghans,

ha ny resys dhymm gwalgh a vlonek a'th sakrifisow,

mes ty re'm beghyas gans dha beghosow;

ty re'm skwithas gans dha dhrogoberow.

25My, my yw ev

neb a dhefend dhe-ves dha dreuspassow a'm govis ow honan,

ha ny borthav kov a'th peghosow.

26Galw vy dhe'n lys, gwren ni mos dhe drial war-barth,

diskwedh dha gen, may fi prevys ewn.

27Dha gynsa tas a beghas,

ha'th leverysi a rebellyas er ow fynn.

28Ytho my a dhisakras pennsevigyon an sentri,

my a ros Yakob dhe gowldhistruyans,

hag Ysrael dhe dhespit.