1Bel a ombleg dhe'n dor, Nebo a warrgromm,

yma aga imajys war vestes ha gwarthek;

an taklow degys genowgh yw beghus,

avel beghyow poes war enyval skwith.

2I a warrgromm, i a ombleg war-barth.

Ny yllons sawya an begh,

mes i aga honan a yn kethneth.

3Goslowewgh orthiv, chi Yakob,

oll an remenant a ji Ysrael,

neb re beu begh warnav a-dhia'n brys,

degys a-ban esens y'n dorr;

4bys y'th henys my yw ev,

bys pan dreylli loes my a'th teg.

My re'th wrug ha my a'th skoedh,

ha my a venten hag a wra sawya.

5Piw dhodho y'm hevelebowgh ha'm gul par dhodho,

ha'm keheveli, may fen haval an eyl dh'y gila?

6An re a skoell owr yn hel dhiworth an pors,

hag a boes arghans y'n mantolyow,

i a arveth owrer neb a'n gwra duw;

ena i a goedh dhe'n dor ha gordhya.

7I a'n drehav war aga diwskoedh,

i a'n gorr yn y le, hag ev a sev ena;

ny yll ev gwaya dhiworth y dyller.

Mar kri nebonan dhodho, ny worthyp,

na ny wra y sawya a alar.

8Perthewgh kov a hemma ha prederewgh;

avisewgh arta yn agas kolonn, hwi dhrogoberoryon.

9Perthewgh kov a'n taklow koth a henys;

rag my yw Duw, ha nyns eus ken;

my yw Duw, ha nyns eus onan haval dhymm,

10ow tarleverel an diwedh a-dhia'n dalleth,

hag a-dhia dermynyow koth taklow na veu hwarvedhys hwath,

ow leverel, ‘Ow forpos a sev,

ha my a wra oll ow bodh’,

11ow kelwel edhen-breydh dhiworth an howldrevel,

an gour rag ow forpos a vro bell.

My re gewsis, ha my a'n kowlwra;

my re dewlis, ha my a'n gwra.

12Goslowewgh orthiv, hwi hardh agas kolonn,

hwi neb yw pell a ewnder:

13My a dhre ow ewnder yn ogas, ny vydh pell,

ha'm selwyans, ny wra ev strechya.

My a re selwyans dhe Sion,

ha dhe Ysrael y rov ow splannder.