Koedh Babylon

1Deus yn-nans hag esedh y'n doust,

A wyrghes, myrgh Babylon!

Esedh war an dor heb tron,

myrgh Kaldea!

Rag ny'th henwir na fella

tender ha bleudh.

2Kemmer an meyn-melin ha mal bleus,

dile dha vayl,

destrypp lostenn dha bows, diskudh dha dhiwarr,

tremen der an avonyow.

3Diskudhys vydh dha noethedh,

ha gwelys vydh dha veth.

My a dhial,

ha ny sparyav denvyth.

4Agan dasprenyas, Arloedh an luyow y hanow,

an Sans a Ysrael.

5Esedh yn taw, ha ke yn tewlder,

A vyrgh Kaldea!

Rag ny'th henwir na fella

mestres gwlaskordhow.

6My a sorras orth ow fobel,

my a dhisakras ow ertach;

my a's ros y'th tiwdhorn,

ny dhiskwedhsys truedh dhedha;

war an re goth y hwrussys dha yew

fest poes.

7Ty a leveris, ‘My a vydh mestres bys vykken.’

Ny withsys an taklow ma y'th kolonn,

na perthi kov a'ga diwedh.

8Lemmyn ytho, klew hemma, ty garores plesour,

neb a esedh yn sawder,

neb a lever yn hy holonn,

‘My! Nyns eus ken onan a-der my!

Ny esedhav avel gwedhwes,

na perthi koll fleghes.’

9An dhew dra ma a dheu warnas,

a-dhistowgh, a-ji dhe unn jydh:

koll fleghes ha gwedhowses

a dheu warnas yn leun,

yn despit dhe'th husow pals,

ha galloes meur dha worhanow.

10Ty a omglewo saw y'th troktra;

ty a leveris, ‘Ny'm gwel denvyth.’

Dha skians ha'th aswonnvos

a'th toellas,

ha ty a leveris y'th kolonn,

‘My! Nyns eus ken onan a-der my.’

11Mes drog a dheu warnas,

na' fydh y dhefendya dre soena.47:11 y dhefendya dre soena: Amendys war-lergh an Targum..

Terroes a goedh warnas, na' fydh y woheles,

hag a-dhistowgh y teu distruyans warnas,

ma na wodhes anodho travyth.

12Sav fast y'th husow

ha'th hworhanow pals,

gansa may lavursys a-dhia'th yowynkneth;

martesen ty a yll gwaynya prow,

martesen ty a yll ownekhe dredha.

13Skwith yth os gans dha gusulyansow pals;

seves ha'th sawya an re a hwither an nevow,

neb a vir orth an ster;

an re a dhargan yn termyn an loer nowydh

an pyth a dheu warnas.

14Mir, avel sowl yth yns,

an tan a's lesk;

ny's teves omdhelivra

dhiworth nerth an flamm.

Nyns yw hemma glow rag omdoemma,

na tan mayth esedhir a-ragdho.

15Yndella dhis yw an re may lavursys gansa,

neb re genwerthas genes a-dhia'th yowynkneth.

I oll a wander yn aga hynsyow aga honan;

nyns eus denvyth dhe'th sawya.