Duw a Geredh y Bobel

1Klew hemma, A ji Yakob,

hwi neb yw henwys orth hanow Ysrael,

hag a dheuth dhiworth dowrow Yuda,

hag a wra ti re hanow an Arloedh,

ha gelwel war Dhuw Ysrael,

mes ny'n gwrons yn gwiryonedh nag yn ewnder.

2Rag i a omhenow war-lergh an sita sans,

ha fydhya yn Duw Ysrael;

Arloedh an luyow yw y hanow.

3My a dharleveris an kynsa taklow nans yw pell,

i eth yn-mes a'm ganow, my a's dellos;

ena a-dhistowgh my a's gwrug, hag i a hwarva.

4Drefenn my dhe wodhvos dha vos gorth,

ha'th konna dhe vos giowenn a horn,

ha'th tal dhe vos brest,

5my a's darleveris dhis a hirneth,

kyns i dhe hwarvos y's delles dhis,

ma na lavarres, ‘Ow idol a's gwrug,

ow imaj gravys ha'm imaj teudhys a's erghis.’

6Ty re glewas; lemmyn gwel oll hemma;

hag a ny vynnowgh y dhyllo?

Alemma rag my a wra dhis klewes taklow nowydh,

taklow kudhys na wodhyes.

7Lemmyn yth yns i gwrys, a-der yn termyn passys,

kyns an jydh hedhyw ny glewsys anedha,

bys ma na ylli leverel, ‘My a's godhva seulabrys.’

8Naneyl ny glewsys, na ny wodhves,

a'n termyn koth ny veu dha skovarn igerys;

rag y hwodhyen ty dhe vos pur draytus,

hag a'th enesigeth ty a veu henwys dislel.

9A-barth ow hanow my a dhelat ow sorr,

a-barth ow gormola y'n lestav ragos,

ma na'th tregghiv dhe-ves.

10Mir, my re'th purhas, a-der avel arghans;

my re'th provas y'n forn a alar.

11A'm govis vy, a'm govis evy y'n gwrav,

rag fatell vydhav defolys?48:11 fatell vydhav defolys: Amendys war-lergh onan a dhornskrifow Qumran. Tekst masoretek fatell vydh defolys.

Ha'm glori ny'n rov dhe arall.

12Goslow orthiv, A Yakob,

ha ty Ysrael, neb a elwis:

my yw ev; my yw an kynsa,

ha my yw an diwettha.

13Ow dorn a fondyas an norvys,

ha'm dorn dhyghow a lesas an nevow;

pan y's galwav,

i a sev a-ragov war-barth.

14Omguntellewgh, hwi oll, ha klewewgh:

piw anedha re dhiskwedhas an taklow ma?

An Arloedh a'n kar,

ev a gowlwra y borpos war Babylon,

ha'y vregh a vydh erbynn Kaldea.

15My, my ow honan re gewsis ha'y elwel,

my re'n dros, hag ev a wra seweni yn y fordh.

16Dewgh nes dhymm, ha klewewgh hemma:

A-dhia'n dhallethva ny gewsis yn-dann gel,

a-dhia'n termyn may teu an taklow ma ha bos, awottavy!

Ha lemmyn an Arloedh Duw re'm dannvonas, gans y spyrys.

17Yndellma y lever an Arloedh,

dha Dhasprenyas, an Sans a Ysrael:

My yw an Arloedh dha Dhuw,

a'th tysk rag dha les dha honan,

ha'th hembronk y'n fordh may tegoedh dhis mones ynni.

18Unnweyth a koslowes orth ow gorhemmynnow!

Ena y fia dha sewena avel avon,

ha'th ewnder avel tonnow an mor;

19dha has a via avel an tewes,

hag agh dha dorr avel y dewesennow,

nevra ny via aga hanow treghys glan,

na distruys a-ragov vy.

20Kewgh yn-mes a Babylon, fiewgh dhiworth Kaldea,

dyllewgh hemma gans garm a lowender, ha'y dherivas,

dannvenewgh e bys yn penn an norvys;

leverewgh, ‘An Arloedh re dhasprenas Yakob y was.’

21Ny's tevo syghes pan y's hembronkas der an difeythyow,

ev a wrug may resekka an dowr ragdha a'n garrek,

ev a folsas an garrek, ha'n dowr a frosas yn-mes.

22‘Nyns eus kres’, yn-medh an Arloedh, ‘rag an debeles.’