Kan an Gwinlann Dhifrut

1My a gan lemmyn dhe'm karadow

kan kerensa a-dro dh'y winlann:

Ow haradow a'n jeves gwinlann

war vronn pur feyth.

2Ev a's palas, ha kuntell an meyn yn-mes anedhi,

ha plansa ynni an gwella gwinbrennyer.

Ev a dhrehevis tour y'n kres anedhi,

hag ynwedh ev a droghas gwinwask ynni.

Ev a waytyas grappys dhe vos gwrys,

mes y hwrug grappys trenk.

3Lemmyn, annedhysi Yerusalem ha gwer Yuda,

breusewgh yntra my ha'm gwinlann.

4Pandr'a allsen gul moy rag ow gwinlann

na wrug vy rygdhi?

Pan waytis hi dhe wul grappys,

prag y hwrug grappys trenk?

5Lemmyn my a dheriv dhywgh

an pyth a wrav rag ow gwinlann:

my a gemmer dhe-ves an ke

ha hi a vydh peurva;

my a wra aswa yn hy fos

ha hi a vydh tir trettys.

6My a's gwra difeyth;

ny vydh skethrys, na ny vydh kravellys,

mes spedhas ha spern a dyv ena.

My a wra gorhemmynn dhe'n kommol

ma na rollons glaw warnedhi.

7Rag gwinlann Arloedh an luyow yw chi Ysrael,

ha gwer Yuda yw plansva y dhelit.

Ev a worta gwirvreus hag awotta kammvreus,

ewnder hag awotta kri.

Kuhudhans a Anewnder

8Go-i a jun chi dhe ji,

ha keworra park dhe bark,

bys pan na vo tyller gesys,

ha nyns eus gesys marnas hwi

dhe driga yn kres an wlas.

9Arloedh an luyow re leveris y'm diwskovarn:

Sur lies chi bras a vydh magor,

chiow brav a vydh heb annedhyas.

10Ytho gwinlann a dheg erow a wra unn bath,5:10 bath: Musur linyel, a-dro dhe 22 liter.

ha'n homer5:10 homer: Musur sygh, a-dro dhe 220 liter. a has a wra efa.5:10 efa: Musur sygh, a-dro dhe 22 liter.

11Go-i a dhifun myttin a-varr dhe helghya korev,

ha tarya bys nos, ynflammys gans gwin.

12Yma sowtri ha telynn,

tabourik ha pibow, ha gwin yn aga gwledhow,

mes ny virons orth gweyth an Arloedh,

na gweles ober y dhiwla.

13Rakhenna ow fobel a yn divroedh

rag fowt a skians;

hy gwer nobyl a verow dre dhivoetter,

ha'y routh dre syghes.

14Rakhenna ifarn re igoras y vryansenn a-les,

hag igeri y anow dres musur;

hy splannder ha'y thervysk a dhiyskynn ynno,

ha'y routh, hag ev neb a lowenha.

15Den yw plegys dhe'n dor, ha gour yw gwrys isel,

ha dewlagas an re woethus a vydh isel.

16Mes Arloedh an luyow a vydh ughelhes yn gwirvreus,

ha'n Duw sans a vydh sanshes yn ewnder.

17Ena eyn a beur kepar hag yn aga feurva,

hag enyvales peskys ha mynnow a dheber yn mysk an magoryow.

18Go-i neb a denn anewnder dre lovonow euveredh,

ha peghes avel dre lovonow kert,

19neb a lever ‘Fistenes,

bedhes y ober uskis,

ma'n gwellyn.

Neses, ha des kusul Sans Ysrael,

ma's aswonnyn.’

20Go-i neb a lever drog dhe vos da,

ha da dhe vos drog,

ha gorra tewlder rag golow,

ha golow rag tewlder,

ha gorra hwerow rag hweg,

ha hweg rag hwerow.

21Go-i neb yw skentel yn aga dewlagas aga honan,

ha konnyk yn aga golok aga honan.

22Go-i neb yw galloesek dhe eva gwin,

ha kampyoryon dhe gemmyska korev,

23neb a dhelirv an kablus dhe wari rag falswober,

ha kemmeres ewnder dhe-ves dhiworth an dus wiryon.

Dargan a Dhevedhyans Lu Babylon

24Rakhenna kepar dell wra tavosow tan dybri an sowl,

hag kepar dell wra gwels sygh sedhi y'n flammow,

yndellma aga gwreydh a vydh avel poder,

ha'ga bleujyow a yn-bann avel doust;

drefenn i dhe nagha lagha Arloedh an luyow,

ha skonya lavar Sans Ysrael.

25Rakhenna sorr an Arloedh a dhew erbynn y bobel,

hag ev a ystynn y leuv er hy fynn ha'y gweskel.

An menydhyow a gren,

ha'ga horfow yw avel atal yn kres an stretys.

Yn despit dhe oll hemma, ny dreyl y sorr dhe-ves,

ha'y leuv yw hwath ystynnys.

26Ev a dhrehav baner rag kenedhlow a-bell,

ha hwibana dhedha5:26 dhedha: Amendys. Ebrow dhodho. dhiworth pennow an bys.

Awotta ev a dheu, uskis, gans toeth bras!

27Nyns yw nagonan skwith, nagonan ny drebuch ynna,

nagonan ny hun, nagonan ny gosk,

nyns yw grogys diwglun denvyth lows,

kroen sandal ny vydh terrys.

28Y sethow yw lymmys

hag oll y waregow yw plegys;

karnow y vergh yw reknys avel kellester,

ha'y rosow avel an korwyns.

29Yma dhodho us kepar ha'n lew,

ev a us avel lewyon yowynk;

grommya a wra ha dalghenna preydh;

ev a'n dre dhe-ves, ha nyns eus denvyth dh'y sawya.

30Y'n jydh na ev a romm warnodho

avel grommya an mor.

Mar mirir orth an tir,

awotta tewlder hag ankres;

golow a vydh tewlhes gans an kommol.