Peghes Ysrael ha Gostytter an Gwas

1Yndellma y lever an Arloedh:

Ple'ma testenn torrva demmedhyans dha vamm,

gensi ma's gorris dhe-ves?

Po py a'm kresysoryon yw

dhodho ma'th werthis vy?

Otta, drefenn dha beghosow y feus gwerthys,

ha rag dha dreuspassow y feu dha vamm gorrys dhe-ves.

2Prag nag esa denvyth ena pan dheuth vy?

Prag na worthybis denvyth pan elwis vy?

Yw ow dorn berrhes bys ma na yll hi dasprena?

A nyns eus dhymmo vy galloes dhe dhelivra?

Gans ow heredh my a sygh an mor,

my a wra avonyow difeyth;

aga fuskes a fler rag difyk dowr,

hag a verow rag syghes.

3My a wisk an nevow yn tewlder,

ha gul yskar aga dillas.

4An Arloedh Duw re ros dhymm

taves an re yw dyskys,

rag may hwodhviv fatell sostenav

gans ger an den skwith.

Myttin ha myttin ev a dhifun,

ev a wra dhe'm skovarn difun

rag goslowes kepar ha'n re yw dyskys.

5An Arloedh Duw re igoras ow skovarn,

ha nyns en vy gorth,

ny dreylis war-dhelergh.

6My a ros ow heyn dhe'n re a'm gweskis,

ha'm diwvogh dhe'n re a dennas an varv yn-mes;

ny gudhis ow fas

dhiworth despit ha trew.

7An Arloedh Duw a'm gweres,

ytho ny veuv konfondys;

rakhenna my re settyas ow fas avel kellester,

ha my a wonn na borthav meth.

8Ogas yw ev neb a'm ewnha.

Piw a vynn strivya genev?

Sevyn ni war-barth.

Piw yw ow huhudhor?

Des e nes dhymm.

9An Arloedh Duw yth yw neb a'm gweres;

piw a lever ow bos kablus?

I oll a vydh usys avel kweth,

an goedhan a's deber.

10Piw yn aga mysk a berth own a'n Arloedh

hag yw gostydh dhe lev y was?

Ev neb a gerdh yn tewlder,

neb na'n jeves golow,

byttegyns ev a drest yn hanow an Arloedh,

ha poesa war y Dhuw.

11Mes hwi oll yw gwrioryon tan,

neb a omwrogys gans yttewi.

Kerdhewgh yn flamm agas tan

hag yn mysk an yttewi re enowsowgh!

Hemm yw an pyth a'gas bydh a'm dorn:

Hwi a wrowedh yn tyller a dorment.