Sion a Vydh Dasprenys

1Difun, difun, gwisk dha nerth, A Sion!

Gwisk dha dhillas teg,

A Yerusalem, an sita sans;

rag ny enter ynnos na fella den antrodreghys nag avlan.

2Shak dha honan dhiworth an doust, sav yn-bann,

esedh war dha dron, A Yerusalem;

digolm an kadonyow a'th konna, A gethes, myrgh Sion.

3Rag yndellma y lever an Arloedh: Hwi a veu gwerthys heb pemont, ha dasprenys vydhowgh heb arghans. 4Rag yndellma y lever an Arloedh Duw: Nans yw pell ow fobel eth yn-nans dhe Ejyp, dhe driga ena avel estrenyon, hag Assyria ynwedh a's gwaskas heb ken. 5Lemmyn ytho pandr'eus dhymm omma? yn-medh an Arloedh, ha'm pobel degys dhe-ves heb kost. Aga rewloryon a oul, yn-medh an Arloedh, ha pup-prys oll an jydh, dispresys yw ow hanow. 6Rakhenna ow fobel a wra aswonn ow hanow; rakhenna y'n jydh na i a woer my dhe vos neb a gews; awottavy.

7Ass yw teg war an menydhyow

treys an gannas hag a dhre nowodhow da,

neb a dhyllo kres ha derivas dader,

neb a dhyllo selwyans;

neb a lever dhe Sion, ‘Dha Dhuw a reyn.’

8Lev dha withysi: i a dhrehav aga lev;

war-barth i a gan gans joy,

rag i a wel lagas dhe lagas

dehwelyans an Arloedh dhe Sion.

9Germewgh gans joy,

hwi vagoryow a Yerusalem;

rag an Arloedh re gonfortyas y bobel,

ev re dhasprenas Yerusalem.

10An Arloedh re dhislennis y vregh sans

a-rag dewlagas an kenedhlow oll,

hag oll pennow an norvys a wel

selwyans agan Duw.

11Treylyewgh, treylyewgh, dewgh yn-mes alena,

na dochyewgh tra avlan.

Dewgh yn-mes anodho ha bedhewgh glan,

hwi neb a dheg lestri an Arloedh.

12Rag ny wrewgh dos yn-mes yn fysk

ha ny wrewgh mos yn fo,

rag an Arloedh a a-ragowgh,

ha Duw Ysrael a vydh agas gwithyas-delergh.

Godhevyans an Gwas

13Otta, ow gwas a wra seweni,

ughelhes vydh ha drehevys yn-bann,

hag ev a vydh fest ughel.

14Par dell o lies hag a gemmeras skruth a'y wovis –

mar dhifasys dell o y semlans, dres semlans gour,

ha'y furv dres furv mebyon den –

15yndella marth a's tevydh lies kenedhel;52:15 marth a's tevydh lies kenedhel: Ow siwya an Septuagint. Ebrow ev a skoell war lies kenedhel.

myghternedh a dhege aga ganow a'y wovis,

rag an pyth na via leverys dhedha, henna i a wel,

ha'n pyth na glewsons, henna i a breder.