1Piw re grysis an pyth re glewsyn?

Ha piw dhodho y feu diskwedhys bregh an Arloedh?

2Rag ev a devis a-ragdho avel losowenn yowynk,

hag avel gwreydhenn yn-mes a dir sygh;

ny'n jevo na furv na reowta, rag may firren orto,

na travyth yn y semlans, rag ma'gan bo hwans anodho.

3Dispresys o ha skonys gans tus,

gour a dhuwon hag a aswonni galar,

hag avel onan may hwra tus kudha aga fas dhiworto;

dispresys o, ha ny wrussyn vri anodho.

4Yn sur ev re borthas agan galarow,

ha re dhug agan duwon;

saw ni a dybi y vos plagys,

gweskys gans Duw, hag iselhes.

5Mes rag agan kammweythresow y feu ev goliys,

brewys rag agan peghosow;

ev a borthas an geredh a dhre dhyn kres,

ha gans y strokosow sawys on.

6Ni oll avel deves re wandras;

pubonan ahanan re dreylyas dh'agan fordh agan honan,

ha'n Arloedh re worras warnodho

an kammweyth ahanan ni oll.

7Arweskys veu ha tebeldhyghtys,

byttegyns ny igoras y anow;

8ev a veu ledys dhe-ves dre gonstrynans wosa drogvreus.

Piw a wra vri a'y denkys?

Rag treghys veu yn-mes a dir an re vew;

rag kammweyth ow fobel y feu gweskys.

9I a ros dhodho bedh gans an debeles,

ha gans felons53:9 felons: Amendys. Ebrow den rych. yn y vernans,

kyn na wrug garowder vyth,

ha ny veu toell vyth yn y anow.

10Mes an Arloedh a vynnas y vrewi;

ha gul dhodho godhevel;

mar kwra dh'y enev bos offrynn kammweyth,

ev a wel y has, ha gul dh'y dhydhyow bos hir,

ha bodh an Arloedh a sewen yn y leuv.

11Wosa godhevyans y enev, ev a wel golow,

ha kontentys vydh;

der y wodhvos ow gwas gwiryon

a ewnha lies,

hag ev a dheg aga hammweythresow.

12Rakhenna my a re dhodho rann gans an tus vras,

ha gans an tus alloesek ev a rann an preydh;

rag ev a dhinewis y vewnans bys ankow,

ha reknys veu yn mysk an dhrogoberoryon.

Ev a dhug peghes tus pals,

hag a bledyas a-barth an dhrogoberoryon.