An Kevambos a Gres

1Kan yn lowen, A anvap na omdhuk;

kri gans joy ha garm,

ty neb na veu yn lavur!

Rag mebyon an venyn anvap a vydh moy

ages mebyon an benyn may ma dhedhi gour, yn-medh an Arloedh.

2Ledanha tyller dha dylda,

ha bedhes kroglennow dha annedhow ystynnys;

na spar; hirha dha gerdyn,

ha krevha dha ebilyer.

3Rag ty a omles a-dhyghow hag a-gledh,

ha'th has a erit an kenedhlow,

hag a wra dhe'n sitys ynyal bos annedhys.

4Na borth own, rag ny' fydh sham,

na vydh digolonnek, rag ny berthydh mewl;

rag ty a ankev disenor dha yowynkneth,

ha ny berthydh kov a vewl dha wedhowses na fella.

5Rag dha Wrier yw dha wour pries, Arloedh an luyow yw y hanow;

ha'n Sans a Ysrael yw dha Dhasprenyas,

Duw an norvys oll y'n henwir.

6Rag an Arloedh re'th helwis, avel gwreg forsakys ha grevys yn spyrys,

avel gwreg yowynkneth gour, pan yw hi tewlys dhe-ves,

yn-medh dha Dhuw.

7Unn pols byghan my a'th forsakys,

mes gans truedh meur my a'th kuntell.

8Yn liv a gonnar

my a gudhas ow fas dhiworthis pols,

mes gans tregeredh heb diwedh my a gemmer truedh ahanas,

yn-medh an Arloedh, dha Dhasprenyas.

9Hemm yw avel dydhyow Noy dhymmo vy,

pan des vy byttydh na ella dowrow Noy war an norvys arta;

yndella my re dos na borthav sorr orthis,

ha na'th keredhav.

10Rag kyn fo an menydhyow removyes,

ha'n breow kemmerys dhe-ves,

ny vydh ow thregeredh removyes dhiworthis,

na ny vydh ow hevambos a gres kemmerys dhe-ves,

yn-medh an Arloedh, neb a gemmer truedh ahanas.

11A dy druan, tewedhek, ha na veus konfortys,

otta, my a sett dha veyn yn antimoni,

ha'th fondya war selyow a saffir.

12My a vynn gwruthyl dha bynaklys a rubiow,

dha yetys a veryl,

hag oll dha fos a veyn drudh.

13Oll dha vebyon a vydh dyskys gans an Arloedh,

ha meur vydh kres dha fleghes.

14Fondys vydhydh yn ewnder;

pell vydhydh dhiworth arwask, rag ny wredh perthi own;

ha dhiworth euth, rag ny wra ev dos nes dhis.

15Otta, mar kwra nebonan omsettyans,

nyns yw dhiworthiv vy;

keniver a omsett er dha bynn,

koedha a wra a'th wovis.

16Otta, my yw neb re wrug an gov

neb a hwyth an glowbrennyer yn flammow,

hag a furv arv wiw rag y borpos;

my re greatyas ynwedh an ravner dhe dhistrui.

17Ny wra seweni arv vyth yw furvys er dha bynn,

ha ty a wra dampnya pub taves a sev orthis yn breus.

Hemm yw ertach gwesyon an Arloedh,

ha'ga ewnheans a dheu dhiworthiv, yn-medh an Arloedh.