Gordhyans Idolys

1An den gwiryon a dhe goll,

ha ny wra denvyth y settya war y golonn;

gwer dregeredhus yw kemmerys dhe-ves,

ha denvyth ny gonvedh.

Rag an den gwiryon yw kemmerys dhe-ves dhiworth an terroes.

2Ev a enter bys yn kres.

I a bowes war aga gweliow,

ow kerdhes yn kompes.

3Mes dewgh nes omma,

hwi vebyon koelyoges,

has avoutrer ha hora!

4Piw y hwredh ges anodho?

Piw yth igerydh dha vin er y bynn

ha gorra dha daves mes?

A nyns owgh hwi fleghes a gammweythres,

has a wowegneth?

5Hwi a lesk gans lust yn mysk an derow,

yn-dann bub gwydhenn las;

ow ladha an fleghes y'n nansow,

yn-dann savnow an karregi.

6Y'n meyn leven a nans yw dha rann;

i, i yw an prenn tewlys ragos.

Dhedha i ty re dhinewis offrynn diwes

hag offrynna offrynn greun.

A vydhav diserrys gans an re ma?

7War venydh ughel hag eksaltys

ty re worras dha weli;

ynwedh ty a yskynnas ena dhe offrynna sakrifis.

8A-dryv an daras ha'n postow-daras

ty re worras dha dokyn.

Orth ow forsakya vy, ty a dhiskudhas dha weli,

hag yskynna ynno ha'y igeri a-les;

ty re wrug kevambos gansa ragos,

ty a garas aga gweli,

ha mires orth aga leuv.

9Ty a vyajyas dhe Molek gans oyl

hag ynkressya dha velysethow.

Ty a dhannvonas dha gannasow pell

ha dannvon yn-nans bys yn ifarn.

10Skwithys veus gans oll dha fordhow,

hwath ny leversys, ‘Euver yw!’

Ty a gavas nerth nowydh rag dha leuv,

rakhenna ny veus skwith.

11Piw re berthsys own ha dout anodho, may leversys gow,

ha na berthsys kov ahanav

na worra hemma y'th kolonn?

A nyns yw rag my dhe dewi a hirneth,

ytho ny berthydh own ahanav?

12My a dhiskler dha ewnder ha'th oberow,

ha ny vydhons dhe les dhis.

13Pan griydh rag gweres,

gwres dha guntellow a idolys dha sawya!

An gwyns a's dheg i oll dhe-ves,

hag anall a's hwyth dhe-ves.

Mes neb a hwila skovva ynnov vy a bew an tir,

hag erita ow menydh sans.

Konfort rag an Re Edregus

14Y leverir,

‘Drehevewgh, drehevewgh, pareusewgh fordh!

Kemmerewgh yn-mes an lett dhiworth fordh ow fobel.’

15Rag yndellma y lever an ughel hag eksaltys

neb a drig trank heb worfenn, ha sans yw y hanow:

Trigys esov yn tyller ughel ha sans,

hag ynwedh gans an den yw keudhesik hag isel y spyrys,

dhe wul dhe spyrys an re uvel dasvewa

ha dhe wul dhe golonn a'n re brewys dasvewa.

16Rag ny wrav vy kuhudha bys vykken,

na vos serrys bynitha,

rag ena spyrys den a wannsa a-ragov,

ha'n anall a wrug vy.

17My a sorras orth anewnder y govaytis;

my a'n gweskis, my a gudhas ow fas hag a veu serrys;

mes ev a gerdhi dislen yn fordh y golonn y honan.

18My re welas y fordhow, mes my a'n yaghha;

my a'n hembronk hag attyli konfort dhodho,

19ow formya an frut a hebaska57:19 an frut a hebaska: Ebrow frut. war dhiwweus an gynoryon.

Kres, kres dhodho ev neb yw ogas, ha dhodho ev neb yw pell, yn-medh an Arloedh;

ha my a'n yaghha.

20Mes an debeles yw avel mor ow hwythfia,

rag ny yll bos kosel,

ha'y dhowrow a dewl yn-bann leys ha stag.

21Nyns eus kres, yn-medh ow Duw, rag an debeles.