Gwir Benys

1Garm yn ughel, na fronn.

Drehav dha lev avel hirgorn,

ha deriv dhe'm pobel aga hammweyth,

ha dhe ji Yakob aga feghosow.

2I a'm hwila pub dydh,

ha hwansa godhvos ow fordhow,

kepar dell vens kenedhel a wrug ewnder

ha na forsakyas ordenans aga Duw.

I a wovynn dhiworthiv breusow a ewnder

hag i a gemmer delit ow tos nes dhe Dhuw.

3‘Prag y penyssyn, mes ny welsys?

Prag yth uvelhasyn agan enev, mes ny wodhves?’

Otta, yn dydh agas penys hwi re gavas plesour,

hag arwaska oll agas gweythoryon.

4Otta, hwi a benys rag gul strif ha freudh

ha dhe weskel gans dorn dhrog.

Penys kepar dell esowgh orth y wul y'n jydh ma

ny yll gul dh'agas lev bos klewys y'n ughelder.

5Yw yndella an penys a dhewisav,

dydh rag den dhe omuvelhe?

Yw rag plegya y benn yn-nans avel korsenn,

ha lesa avel gweli yskar ha lusu?

Yw hemma an pyth a gelwydh penys,

ha dydh kemmeradow dhe'n Arloedh?

6A nyns yw hemma an benys a dhewisav:

lewsel kadonyow sherewynsi,

digelmi kroenow an yew,

livra an re arweskys,

ha terri pub yew?

7A nyns yw ranna dha vara gans an den nownek,

ha dri boghosogyon dhiannedh y'th chi;

pan welydh den noeth, y gwetha,

ha ma na omgudhydh dhiworth dha gig dha honan?

8Ena dha wolow a dardh avel an bora,

ha'th yaghheans a egin dihwans,

ha'th ewnder a gerdh a-ragos;

glori an Arloedh a vydh dha withyas dhelergh.

9Ena ty a elow, ha'n Arloedh a worthyp;

ty a gri rag gweres hag ev a lever, Awotta vy.

Mar kemmerydh dhe-ves an yew a dhiworthis,

ystynnans an bys, ha kows spitus;

10mar profydh dha enev58:10 dha enev: Po war-lergh an Syriek dha vara. rag an nownek,

ha sostena enev an den truan,

ena dha wolow a splann y'n tewlder,

ha dha dewolgow a vydh avel an hanter-dydh.

11An Arloedh a'th hembronk prest,

ha sostena dha enev yn tylleryow sygh

ha krevhe dha eskern.

Ty a vydh avel lowarth dowrhes,

hag avel fenten dowr

ma na fyll hy dowrow.

12Dha vagoryow koth a vydh dastrehevys;

ty a dhassev an selyow a henedhow pals;

ha ty a vydh gelwys dastrehevyer aswaow,

ha restoryer stretys rag tus dhe driga ynna.58:12 stretys rag tus dhe driga ynna: Po amendyans magoryow chiow.

13Mar treylydh dha droes dhiworth terri an sabot,

dhiworth gul dha blesour y'm dydh sans,

mes gelwel an sabot delit,

ha gelwel enorys dydh sans an Arloedh,

ha'y enora heb mos y'th fordhow dha honan,

heb hwilas dha blesour dha honan na gul dha negysyow dha honan,

14ena ty a vydh lowen y'n Arloedh

ha my a'th wra dhe varghogeth war dylleryow ughel an tir

ha'th vaga gans eretons Yakob dha das,

rag ganow an Arloedh re gewsis.