Peghes ha Daspren

1Awotta, nyns yw leuv an Arloedh re verr dhe sawya,

ha nyns yw y skovarn re boes dhe glewes.

2Mes agas kammweythresow re wrug diberth

yntra hwi ha'gas Duw,

ha'gas peghosow re gudhas y fas ragowgh,

ma na wra ev klewes.

3Rag agas diwleuv yw defolys gans goes,

ha'gas bysies gans anewnder.

Agas diwweus re gewsis gow,

ha'gas taves re dhiskleryas sherewynsi.

4Denvyth ny elow rag ewnder;

denvyth ny bled y gen gans onester.

I a drest yn gwakter ha kewsel euveredh;

i a gonsev anken ha dineythi droktra.

5Gori oyow nader a wrons,

ha gwias gwiasow kevnis;

neb a dheber aga oyow a verow,

hag oy, mars yw brewys, a dhre nader yn-mes.

6Ny yll aga gwiasow bos dillas,

ha ny omgwethons gans aga oberow;

aga oberow yw oberow a anewnder,

hag yma gwriansow a freudh yn aga diwleuv.

7Aga threys a boen dhe dhrog,

hag i a fysk dhe dhinewi goes ankablus.

Aga frederow yw frederow a anewnder;

yma freudh ha kollva yn aga fordhow.

8Ny aswonnons an fordh a gres,

ha nyns eus ewnder yn aga olow.

I re wrug aga hynsyow kamm;

neb a gerdh ynna ny aswonn kres.

9Rakhenna ewnder yw pell dhiworthyn,

hag ny wra ewnder drehedhes dhyn.

Ni a worta golow, hag otta tewolgow!

Ni a worta golewder, mes ni a gerdh y'n tewlder.

10Palvala a wren war fos avel an dhellyon,

ha ni a balval avel an re heb dewlagas.

Ni a drebuch yn hanter-dydh kepar hag yn tewlwolow;

yn mysk an re grev, yth on ni avel an re varow.

11Ni oll a romm avel orses,

ha kyni avel kelemmi.

Ni a worta gwirvreus mes nyns eus;

ni a worta selwyans mes pell yw ahanan.

12Ytho agan treuspassow yw lies a-ragos,

ha'gan peghosow a dheg dustuni er agan pynn.

Rag yma agan treuspassow genen,

ha ni a aswonn agan drogoberow:

13rebellyans ha toell erbynn an Arloedh,

treylya war-dhelergh dhiworth siwya agan Duw,

kewsel arwask ha rebellyans,

konsevya ha kewsel y'n golonn geryow gow.

14Gwirvreus yw treylys war-dhelergh,

hag ewnder a sev a-bell;

rag gwirder re drebuchyas y'n stret,

ha ny yll ewnhynseth entra.

15Gwirder a fyll,

ha neb a dreyl dhiworth drog yw kemmerys avel preydh.

An Arloedh a welas hag a veu displesys

drefenn na veu gwirvreus.

16Ev a welas na veu denvyth,

hag ev a'n jevo marth na veu denvyth dhe vos mayn;

rakhenna y vregh a wrug selwyans ragdho,

ha'y ewnder a'n sostenas.

17Ev a wiskas ewnder avel hoberjon,

ha basnett a selwyans war y benn;

ev a wiskas dillas dial rag gwisk,

hag omvaylya yn diwysykter avel mantell.

18Herwydh aga gwriansow, yndella ev a attal;

sorr dh'y erbynnoryon, attal dh'y eskerens;

ev a re attal dhe'n ynysow.

19Ytho i a berth own a hanow an Arloedh a'n howlsedhes,

hag a'n howldrevel i a berth own a'y glori.

Pan dheu envi avel liv,

ena spyrys an Arloedh a'n fes.

20Ev a dheu dhe Sion avel Dasprenyas,

ha dhe'n re a dreyl dhiworth rebellyans yn Yakob, yn-medh an Arloedh.

21Ha hemm yw ow hevambos a wrav gansa, yn-medh an Arloedh: ow Spyrys usi warnas ha'm geryow re worris yn dha anow ny dhiberth a'th anow nag a anow dha has, nag a anow has dha has, yn-medh an Arloedh, alemma rag ha bys vykken.