Gwelesigeth a Dhuw y'n Tempel

1Y'n vlydhen may ferwis myghtern Uzzia, my a welas an Arloedh esedhys yn se, ughel ha drehevys, ha lostennow y bows a lenwis an tempel. 2Yth esa serafyn ow sevel a-ughto, hwegh askell dhe bubonan anedha: gans diw ev a gudha y fas, ha gans diw ev a gudha y dreys, ha gans diw ev a nija. 3An eyl a elwi dh'y gila, ow leverel,

‘Sans, sans, sans, Arloedh an luyow,

oll an norvys yw leun a'y glori.’

4Ha peulyow an treudhow a grenas orth lev neb a elwi, ha'n chi a veu lenwys a vog.

5Ena my a leveris, ‘Go-vy! diswrys ov vy, rag gour avlan y dhiwweus ov vy, ha trigys esov yn mysk pobel avlan hy diwweus; rag ow dewlagas re welas an Myghtern, Arloedh an luyow.’

6Ena onan a'n serafynyon a nijas bys dhymm, hag yn y dhorn regydhenn re gemmersa gans gevel a-dhiwar an alter. 7Ev a dochyas ow ganow, ha leverel, ‘Awotta, homma re dochyas dha dhiwweus ha treylys dhe-ves yw dha anewnder, ha gevys yw dha begh.’

8Ha my a glewas lev an Arloedh ow leverel, ‘Piw a dhannvonav, ha piw a ragon ni?’ Ena my a leveris, ‘Ottavy, dannvon vy!’ 9Hag yn-medh ev, ‘Ke, ha lavar dhe'n bobel ma,

“Klewewgh devri, mes na gonvedhewgh;

gwelewgh devri, mes na aswonnewgh.”

10Gwra kolonn an bobel ma tew,

ha gwra aga diwskovarn poes,

ha sel aga dewlagas,

ma na glewons der aga dewlagas

ha gweles der aga diwskovarn

ha konvedhes der aga holonn,

hag i a dreyl ha bos sawys.’

11Ena my a leveris, ‘Pes termyn, A Arloedh?’ Hag ev a leveris,

‘Bys pan vydh sitys diswrys,

heb annedhyas,

ha chiow heb den,

ha'n tir distruys ha difeyth;

12bys pan wra an Arloedh dannvon tus pell dhe-ves,

ha bos tylleryow forsakys pals yn mysk an tir.

13Ha kyn fo an degves rann gesys ynno,

y fydh leskys arta,

kepar ha terebinthenn po derwenn

a as kyf pan yw treghys dhe'n dor.’

An has sans yw hy hyf.