Dial war Edom

1‘Piw yw hemma ow tos dhiworth Edom,

yn dillas rudhgogh dhiworth Bosra?

Piw yw hemma gwiskys yn splannder,

ow kerdhes yn-rag yn y alloes bras?’

‘My y'th yw, ow kewsel yn ewnder,

galloesek dhe sawya.’

2‘Prag yth yw dha wiskas rudh,

ha'th tillas avel nebonan ow trettya yn gwinwask?’

3‘My re drettyas an winwask ow honan;

dhiworth an kenedhlow nyns esa denvyth genev.

My a's trettyas y'm sorr

ha'ga stankya y'm konnar;

aga sugen a lagennas war ow gwiskas,

ha namma oll ow dillas.

4Rag yth esa dydh dial y'm kolonn,

ha blydhen ow daspren re dheuth.

5My a viras, mes nyns esa denvyth ow kweres;

skruth a'm kemmeras, nag esa denvyth ow skoedhya;

ytho ow bregh ow honan a wrug delivrans,

ha'm sorr a'm skoedhyas.

6My a drettyas poblow y'm sorr,

ha'ga medhwi y'm konnar,

ha dinewi aga sugen war an dor.’

Tregeredh an ARLOEDH

7Meneges tregeredhow an Arloedh a wrav,

ha gormoledhow an Arloedh,

war-lergh pup-tra a wrug an Arloedh ragon,

ha lies tra dha rag chi Ysrael

a wrug ev ragdha war-lergh y druedhow

ha war-lergh palster y dregeredh.

8Ev a leveris, ‘Sur ow fobel yns i,

mebyon na wra falsuri’;

ytho ev a dheuth ha bos Selwador dhedha

9yn oll aga anken.

Nyns o kannas nag el

mes y lok ev a's sawyas.

Yn y gerensa hag yn y druedh ev a's dasprenas;

ev a's drehevis ha'ga doen oll an dydhyow koth.

10Mes i a rebellyas

ha grevya y Spyrys sans;

rakhenna ev a dreylyas dhe vos eskar dhedha,

hag ev y honan a vatalyas orta.

11Ena ev a borthas kov a'n dydhyow koth,

Moyses ha'y bobel.63:11 Moyses ha'y bobel: Ebrow Moyses y bobel.

Ple'ma ev neb a's dros war-vann yn-mes a'n mor,

gans bugeledh y flokk?

Ple'ma ev neb a settyas y Spyrys Sans a-berth ynno,

12neb a wrug dh'y vregh gloryus

mos orth leuv dhyghow Moyses,

ow folsa dowrow a-ragdha,

dhe wul ragdho hanow a dhur vys vykken,

13neb a wrug dhedha kerdhes der an downderyow?

Avel margh y'n gwylvos,

ny drebuchyons;

14avel best a dhiyskynn dhe'n nans,

Spyrys an Arloedh a ros dhedha powes.

Yndella ty a ledyas dha bobel,

dhe wul dhis hanow gloryus.

Pysadow a Edrega

15Mir dhiworth nev, ha gwel

dhiworth trigva ughel dha sansoleth ha'th glori.

Ple'ma dha dhiwysykter ha'th krevder,

amovyans dha golodhyon ha'th truedh?

Skonys yns dhymm.

16Rag ty yw agan Tas,

kyn na'gan goer Abraham

ha na'gan aswonn Ysrael;

ty yw an Arloedh agan Tas,

agan Dasprenyas vynnari yw dha hanow.

17Prag re'gan gwrussys dhe wandra dhiworth dha fordhow, A Arloedh,

ha kaleshe agan kolonn ma na borthen own ahanas?

Dehwel a-barth dha servysi,

loethow dha eretons.

18Rag termyn kott dha bobel sans a'n eritas,

mes lemmyn agan eskerens re drettyas dha sentri yn-dann dreys.

19Ni re beu a-henys kepar ha'n re na rewlsys warnedha,

kepar ha'n re na veu dha hanow gelwys warnedha.