1Unnweyth a kwrelles skwardya an nevow ha dos yn-nans,

ha'n menydhyow ow krysya a-ragos!64:1 An wers ma y rann a 63:19 y'n tekst ebrow ha'n Septuagint.

2Kepar dell wra tan enowi kewydh

ha gul dhe dhowr bryjyon,

diyskynn dhe wul dha hanow aswonnys dhe'th eskerens,

may krenno a-ragos an kenedhlow!64:2 Gwersow 64:1 bys 12 yw niverys 64:2 bys 11 y'n tekst ebrow ha'n Septuagint.

3Pan wrussys taklow euthyk na waytsyn,

ty a dheuth yn-nans, ha'n menydhyow

a grysyas a-ragos.

4A-henys tus ny glewas,

na ny woslowas skovarn,

na ny welas lagas duw marnas ty,

neb a ober ragdho ev neb a'n gorta.

5Ty a vet ganso ev neb a lowenha ha gul ewnder,

neb a berth kov ahanas y'th fordhow.

Otta, ty a sorras, ha ni a begha prest;

mar siwyn dha fordhow, ni a vydh sawys.64:5 Amendys. Styr an Ebrow yw ankler.

6Ni oll yw avel tra avlan,

hag avel kweth woesek yw oll agan gweythyow gwiryon;

ni oll a wedher avel delenn,

ha'gan kammweythresow a'gan deg dhe-ves avel gwyns.

7Nyns eus denvyth a elow war dha hanow

na strivya dhe gavoes dalghenn ynnos;

rag ty re gudhas dha fas ragon,

ha'gan delivra yn leuv agan kammweythresow.

8Ha lemmyn, Arloedh, ty yw agan Tas.

Ni yw an pri, ha ty yw agan priweythor;

ni oll yw ober dha leuv.

9Na sorr dres eghenn, A Arloedh,

ha na borth kov a anewnder bys vykken.

Otta mir, ni oll yw dha bobel.

10Dha sitys sans re dheuth ha mos gwylvos,

Sion yw gwylvos,

ha Yerusalem yw ynyalder.

11Agan chi sans ha gloryus,

le may hwre agan tasow dha wormel

yw leskys gans tan,

hag oll agan tylleryow teg re dheuth ha bos magoryow.

12Yn despit dhe'n taklow ma, a omfronnydh, A Arloedh?

A dewydh, ha'gan arwaska dres eghenn?