Breus ha Selwyans

1My o hwilys gans an re na wovynnsons,

kevys gans an re na'm hwilsons.

My a leveris, ‘Awottavy, awottavy’,

dhe genedhel nag esa ow gelwel war ow hanow.

2My re lesas ow diwla oll an jydh

dhe bobel benn-kales

usi ow kerdhes y'n fordh nag yw da,

ow siwya aga thybyansow aga honan;

3pobel usi orth ow frovokya dhe sorr

dhe'm fas heb hedhi,

usi prest ow sakrifia y'n lowarthyow

hag ow leski offrynnow war alteryow brykkys;

4usi owth esedha yn mysk an bedhow,

hag ow koelya dres nos yn tylleryow kevrin;

usi ow tybri kig mogh,

hag yma kowl avlan yn aga lestri.

5Yn-medhons, ‘Avod,

na dheus nes dhymm,

rag yth ov vy re sans ragos.’

An re ma yw mog y'm dewfrik,

tan ow leski oll an jydh.

6Ottava skrifys a-ragov:

Ny dawav, mes devri my a attal;

my a attal yn aga askra

7aga65:7 aga: Amendys war-lergh an Septuagint ha'n Syriek. Ebrow agas. hammweythresow ha kammweythresow aga65:7 aga: Amendys war-lergh an Septuagint ha'n Syriek. Ebrow agas. thasow war-barth,

yn-medh an Arloedh.

Rag i dhe leski offrynnow war an menydhyow,

ha'm skornya war an bronnow,

my a wra musura yn aga barrlenn

an attal a'ga gweythresow kyns.

8Yndellma y lever an Arloedh: Dell yw an sugen hwath kevys yn bagas a rappys,

ha den a lever, ‘Na wra y dhistrui,

rag yma bennath ynno’,

yn kettella my a wra a-barth ow servysi,

heb distrui peub oll.

9My a dhre has yn-mes a Yakob,

hag yn-mes a Yuda nebonan dhe erita ow menydhyow,

hag ow re dhewisys a's erit,

ha'm servysi a drig ena.

10Sharon a vydh peurva rag deves,

ha nans Aghor powesva rag flokkys,

rag ow fobel neb a'm hwila.

11Mes hwi neb a forsak an Arloedh,

hag ankevi ow menydh sans,

ha pareusi moes rag Fortun

ha lenwel bollow a win kemmyskys rag Tenkys;

12My a wra agas destna rag an kledha,

ha hwi oll a ombleg dhe'n ladhva;

rag my a'gas gelwis, mes ny worthybsowgh,

my a gewsis mes ny glewsowgh.

Hwi a wrug drog a-wel dhymm

ha dewis an dra na veu plegadow dhymm.

13Rakhenna yndellma y lever an Arloedh Duw,

Otta, ow servysi a dheber

mes hwi a'gas bydh nown;

otta, ow servysi a yv

mes hwi a'gas bydh syghes;

otta, ow servysi a lowenha

mes hwi a gemmer meth.

14Otta, ow servysi a gan gans lowender kolonn,

mes hwi a gri yn angoes a'gas kolonn,

hag oulya, trogh an spyrys.

15Hwi a as agas hanow avel molleth dhe'm re dhewisys;

ha'n Arloedh Duw a'th ladh;

mes ev a elow y servysi gans ken hanow.

16Piwpynag y'n tir a hwillo bennath warnodho y honan

a'n hwila re'n Duw a wirder;

ha piwpynag y'n tir a dollo ti

a de ti re'n Duw a wirder;

rag ankevys yw an kynsa troblow,

ha kudhys dhiworth ow dewlagas.

Nevow Nowydh ha Norvys Nowydh

17Rag awottavy ow kreatya nevow nowydh ha nor nowydh;

ny vydh kovhes an kynsa, nag entra y'n brys.

18Mes lowenhewgh ha bedhewgh heudhik bys vykken

y'n pyth a wrav y greatya;

rag awottavy ow kreatya Yerusalem dhe vos joy,

ha'y fobel heudhder.

19My a lowenha yn Yerusalem

ha bos heudhik y'm pobel;

ny vydh klewys son oelva ynni,

na son kri rag gweres na fella.

20Ny vydh ena na fella

baban a vew nebes dhydhyow,

na ny vydh den koth na vew oll y dydhyow;

rag neb a verow kans penn-bloedh a vydh synsys avel maw,

ha neb na dhrehedh dhe gans a vydh synsys avel milliges.

21I a dhrehav chiow, ha triga ynna;

i a blans gwinlannow, ha dybri aga frut.

22Ny dhrehevons, hag arall a drig ena,

ny blansons, hag arall a dheber.

Rag dydhyow ow fobel a vydh avel dydhyow gwydhenn,

ha'm re dhewisys a wel ober aga diwla ow toen frut termyn hir.

23Ny lavuryons yn euver,

na dhineythi fleghes dhe euth;

rag i a vydh has bennigys gans an Arloedh,

ha'ga henedh gansa.

24Kyns i dhe elwel, my a worthyp;

aga klewes, hag i hwath ow kewsel.

25Bleydh hag oen a beur war-barth,

ha lew avel ojyon a dheber kala',

mes doust a vydh boes rag sarf.

Ny wrons dregynn na distrui

yn oll ow menydh sans,

yn-medh an Arloedh.