Ysay a Golonnekha Myghtern Ahaz

1Yn dydhyow Ahaz mab Yotham mab Uzzia, myghtern Yuda, Resin myghtern Aram ha Pekagh mab Remalia myghtern Ysrael a yskynnas dhe Yerusalem dhe werrya er hy fynn, mes ny allas hy fetha. 2Y feu derivys dhe ji Davydh, ow leverel, ‘Aram yw keffrysyas Efraym’; ha'y golonn ha kolonn y bobel a grenas kepar dell gren gwydh an koes a-rag an gwyns.

3Ena an Arloedh a leveris dhe Ysay, Ke yn-rag dhe vetya Ahaz, ty ha Shear-yashub dha vab, orth penn dowrbons an poll gwartha, ryb fordh Park an Troghyer. 4Ty a lever dhodho, Bydh war, hag omwith kosel. Na borth own, na vydh digolonnek drefenn an dhew stokk ma a yttewi ow megi, drefenn sorr fers Resin hag Aram ha mab Remalia. 5Rag Aram re vrasas droktra er dha bynn, gans Efraym ha Remalia, ow leverel, 6Yskynnyn ni erbynn Yuda ha'y broweghi, hy skwardya a-les ha'y hemmeres dre nerth ragon ni agan honan, ha gul mab Tabeel myghtern warnedhi. 7Ytho yndellma y lever an Arloedh Duw:

Ny sev,

ha ny hwyrvydh;

8rag penn Aram yw Damaskus

ha penn Damaskus yw Resin;

hag a-ji dhe bymp blydhen ha tri-ugens

Efraym a vydh terrys dhe demmyn ma na vydh pobel na fella.

9Penn Efraym yw Samaria,

ha penn Samaria yw mab Remalia.

Mar ny gryssowgh

ena ny vydhowgh fastys.

Ysay a Re Tokyn Immanuel dhe Ahaz

10Ha'n Arloedh a gewsis arta dhe Ahaz ow leverel: 11Ty govynn tokyn dhiworth an Arloedh dha Dhuw, bedhes po down avel ifarn, po y'n ughelder a-vann. 12Mes Ahaz a leveris, ‘Ny wovynnav, na ny vynnav previ an Arloedh.’ 13Ena yn-medh ev:7:13 ev: Henn yw Ysay. ‘Goslowewgh, chi Davydh! A'n synsowgh tra vyghan hwi dhe skwitha tus, mes hwi a vynn ynwedh skwitha ow Duw? 14Rakhenna, an Arloedh y honan a re dhywgh tokyn. Awotta, an wyrghes a omdhek ha dineythi mab ha hi a'n henow Immanuel. 15Kowles ha mel y teber bys pan woer denagha an drog ha dewis an da. 16Rag kyns an maw dhe wodhvos denagha an drog ha dewis an da, an tir a vydh forsakys, mayth owgh hwi ownek a-rag y dhew vyghtern. 17An Arloedh a dhre warnas ha war dha bobel ha war ji dha das dydhyow na dheuth a-dhia'n jydh may tibarthas Efraym dhiworth Yuda: myghtern Assyria hogen.’

18Y'n jydh na an Arloedh a hwiban dhe'n gelyonenn usi yn penn pella goverow Ejyp ha dhe'n wenenenn usi yn pow Assyria; 19hag i oll a dheu ha powes war an nansow klegerek ha war folsyow an karregi, war oll prysk an spern ha war bub dowrva.

20Y'n jydh na an Arloedh a dregh der altenn a veu gobrenys a-dreus dhe'n avon – dre vyghtern Assyria – gols an penn, blew an diwarr, ha hi a remov an varv ynwedh.

21Y'n jydh na gour a vag denewes ha dew dhavas. 22Drefenn an lanwes a leth a rons, ev a dheber kowles. Rag pubonan yw gesys y'n tir a dheber kowles ha mel.

23Y'n jydh na pub tyller mayth esa mil gwinbrenn ynno, hag a dylis mil shekel arghans, a vydh spedhas ha spern. 24Gans sethow ha gans gwarak tus a dheu di, rag y fydh oll an tir spedhas ha spern. 25Oll an brennow o kravellys gans kravell, ny edh ena rag own a spedhas ha spern; y fydhons tylleryow mayth yw chatel dannvenys dhe wari, ha trettys gans deves.