Mab Ysay avel Tokyn

1An Arloedh a leveris dhymm, Kemmer dhis rol-skrifa vras, ha skrif warnedhi gans pluvenn den: Maher-shalal-hash-baz.8:1 Maher-shalal-hash-baz: Hemm yw dhe styrya Fisten dhe bylla, fysk dhe'n preydh. 2My a elow dhymm dustunioryon len, Uria an oferyas, ha Zekaria mab Yeberekia. 3My a dheuth nes dhe'n brofoeses, ha hi a omdhuk ha dineythi mab. Ena an Arloedh a leveris dhymm, Hanw e Maher-shalal-hash-baz; 4rag kyns an flogh dhe wodhvos gelwel ‘Ow thas’ hag ‘Ow mamm’, rychys Damaskus ha preydh Samaria a vydh degys dhe-ves a-rag myghtern Assyria.

5An Arloedh a gewsis dhymm arta, ow leverel: 6Drefenn an bobel ma dhe nagha dowrow Shiloagh, usi ow mos yn kosel, ha teudhi yn own a Resin mab Remalia; 7rakhenna awotta'n Arloedh a dhre warnedha dowrow bras ha meur an avon, myghtern Assyria gans oll y wolewder. Ha hi a dheu yn-bann dres oll hy hanolyow, ha mos war oll hy glannow; 8hi a dremen dre Yuda avel liv ha drehedhes bys an konna; hag ystynnans hy eskelli a lenow les dha dir, Immanuel.

9Bedhewgh terrys,8:9 Bedhewgh terrys: Po Kesunyewgh. poblow, ha bedhewgh dralys;

ha goslowewgh, oll hwi vroyow pell,

Omwrogysewgh, ha bedhewgh dralys!

Omwrogysewgh, ha bedhewgh dralys!

10Omgusulyewgh war-barth, ha'n gusul a vydh lestys;

leverewgh ger, ha ny sev,

rag bos Duw genen.

11Rag an Arloedh a gewsis dhymm yndellma gans leuv grev, hag a'm gwarnyas ma na gerthen yn fordh an bobel ma, ow leverel: 12Na leverewgh ‘Bras!’ pup-prys may hwra an bobel ma leverel bras, ha na berthewgh own a'ga own, na vedhewgh dyegrys. 13Hwi a sansha Arloedh an luyow, ev yw agas euth, hag ev yw neb a'gas ownekha, 14Ev a vydh sentri,8:14 sentri: Po amendyans antell. ha men trebuchya ha karrek koedha dhe dhew ji Ysrael, hag antell ha maglenn rag annedhysi Yerusalem. 15Meur anedha a drebuch, ha koedha ha bos terrys; i a vydh maglennys, ha kemmerys.

Dyskyblon Ysay

16Kolm an dustuni, sel an dyskans yn mysk ow dyskyblon. 17My a worta an Arloedh neb a gudh y fas dhiworth chi Yakob, hag ynno y fydh ow govenek. 18Awotta, my ha'n fleghes a wrug an Arloedh aga ri dhymm yw toknys ha marthusyon yn Ysrael dhiworth Arloedh an luyow usi trigys yn menydh Sion. 19Mar leverons dhywgh, ‘Hwilewgh kusul a nygromonsoryon ha koelyogyon neb a hwyster ha hanasa; a ny goedh dhe bobel hwila aga Duw, hwila kusul an re varow a-barth an re vew 20rag dyskans ha dustuni?’ Yn sur mar leverons yndella, henn yw rag ny's teves golow banna. 21Ev a dremen der an tir, duwenik ha nownek; ha rag bos dhedha nown, i a vydh serrys, hag ow mires war-vann i a volleth aga myghtern ha'ga Duw; 22po ow mires orth an dor, otta anken ha tewlder, an tewolgow a ahwer; hag i a vydh herdhys yn tewlder tew.