Reyn an Myghtern a Dheu

1Mes ny vydh tewlder rygdhi hi neb a veu yn ahwer. Yn termyn kyns ev a wrug bismer dhe bow Zebulun ha pow Naftali, mes wortiwedh ev a wra enora fordh an mor, war an tu arall dhe'n Yordan, Galile an kenedhlow.9:1 An gwers ma yw niverys 8:23 y'n tekst ebrow, ha gwersow 2 bys 21 yw niverys 1 bys 20.

2An bobel a gerdhi yn tewlder

re welas golow meur;

an re trigys yn tir skeus ankow –

golow re splannas warnedha.

3Ty re gressyas an genedhel,

ty re veurhas an lowena;

i a lowenha a-ragos

kepar hag yn lowender an goeldheys,

kepar dell yw tus fest heudhik pan rannons preydh.

4Rag ty re dorras yew y vegh,

ha lorgh y dhiwskoedh,

an welenn a wre y gonstryna,

kepar hag yn dydh Midyan.

5Rag pub botasenn ow trettya yn tervans an gas,

ha pub mantell rolys a-dro yn goes

a vydh leskys, keunys dhe'n tan.

6Rag flogh re beu genys dhyn,

mab re beu res dhyn;

ha war y dhiwskoedh yma arloettys.

Hag ev a vydh henwys

Kusulyador Marthys, Duw Galloesek,

Tas bys Vykken, Pennsevik Kres.

7Dhe ynkressyans an arloettys

ha dhe gres ny vydh finweth,

rag tron Davydh ha rag y vyghterneth,

dh'y fastya ha dh'y skoedhya

gans gwirvreus hag ewnder

alemma rag ha bys vykken.

Gwres Arloedh an luyow a wra hemma.

Breus erbynn Balghder hag Arwask

8An Arloedh re dhannvonas ger dhe Yakob;

y koedh war Ysrael.

9Oll an bobel a'n godhvydh,

Efraym hag annedhysi Samaria;

neb a leveris gans goeth ha balghder a golonn:

10‘Brykkys re goedhas,

mes ni a dhastrehav gans meyn treghys;

sykaminwydh re beu treghys dhe'n dor,

mes ni a worr kederwydh yn aga le.’

11Ytho an Arloedh a dhrehevis envi er aga fynn,

ha provokya aga eskerens,

12Aram a-rag ha'n Filistysi a-dryv;

hag i re dhevoryas Ysrael gans anow igor.

Yn despit dhe oll hemma ny dreylyas y sorr,

ha'y leuv yw hwath ystynnys.

13Mes ny dreylyas an bobel dhe neb a's gweskis,

na ny hwilsons Arloedh an luyow.

14Ytho an Arloedh a dregh dhe-ves dhiworth Ysrael penn ha lost,

skorrenn ha korsenn yn unn jydh.

15An henavek ha'n den ughel, ev yw an penn,

ha'n profoes ow tyski gow, ev yw an lost.

16An re a led an bobel ma y's gwrons dhe wandra,

ha'n re ledys yw sowdhenys.

17Rakhenna an Arloedh ny lowenha yn aga gwer yowynk,

na kemmeres truedh a'ga omdhivasow ha gwedhwesow;

rag pubonan yw ansans ha drog,

ha pub ganow a gews follneth.

Yn despit dhe oll hemma ny dreylyas y sorr,

ha'y leuv yw hwath ystynnys.

18Ytho kammhynseth a lesk avel tan,

ow tevorya spedhas ha spern,

ha leski prysk an koes,

ha troyllya yn-bann yn koloven mog.

19Dre sorr Arloedh an luyow

an tir a vydh kowlleskys,9:19 kowlleskys: Ow siwya an Septuagint. Styr an ger ebrow yw ankler.

ha'n bobel a vydh avel keunys rag an tan;

denvyth ny gemmer truedh a'y vroder.

20A-dhyghow den a dhevor ha hwath nownek vydh;

a-gledh den a dheber ha ny vydh gwalghys.

Pubonan a dheber kig y gentrevek.9:20 gentrevek: Amendys ow siwya an Targum. Ebrow y vregh.

21Manasse erbynn Efraym, hag Efraym erbynn Manasse;

war-barth y fydhons erbynn Yuda.

Yn despit dhe oll hemma ny dreylyas y sorr,

ha'y leuv yw hwath ystynnys.