1Gwelesigeth Ysay mab Amos a welas a-dro dhe Yuda ha Yerusalem yn dydhyow Uzzia, Yotham, Ahaz, ha Hezekia, myghternedh Yuda.

Sherewynsi Yuda

2Klew a nev, ha goslow a norvys;

rag an Arloedh re gewsis:

My a vagas mebyon ha'ga meythrin,

mes i a rebellyas er ow fynn.

3Ojyon a woer y berghennek

hag asen presep y vester,

mes Ysrael ny woer,

ow fobel ny gonvedh.

4Go-i, kenedhel neb a begh,

pobel yw poes gans anewnder,

has drogoberoryon,

mebyon legrys.

I re asas an Arloedh,

ha fia Sans Ysrael

ow treylya war-dhelergh.

5Prag y fydhowgh gweskys hwath moy?

Prag y pesyowgh yn rebellyans?

An penn dien yw klav,

oll an golonn yw klamderek.

6A wodhen an troes bys an penn,

nyns eus yeghes ynno,

mes brewyon, kreythennow,

ha goliow podrek;

ny vons glanhes na lystennys

na medhelhes gans oyl.

7Agas tir yw ynyal,

agas sitys leskys gans tan;

yn agas lok

estrenyon a dhevor agas tir,

hag ynyal yw, kepar dell ve domhwelys gans estrenyon.

8Myrgh Sion yw gesys

avel skovva yn gwinlann,

avel krow yn gwel kukumbrow,

avel sita yn-dann esedhva.

9Mar ny assa dhyn Arloedh an luyow

remenant byghan,

y tothyen ni ha bos avel Sodom,

y fien haval dhe Gomorra.

10Klewewgh ger an Arloedh,

hwi rewloryon Sodom;

goslowewgh orth lagha agan Duw,

pobel Gomorra.

11Pandra yw dhymm sakrifisow pals?

yn-medh an Arloedh.

Gwalghys ov a offrynnow leskys a hordhes

ha blonek lodhnow peskys.

Nyns eus dhymm delit yn goes terewi,

nag eyn gorow, na gever.

12Pan dheuthewgh dhymm dhe vos gwelys a-ragov,

piw a wovynnas dhiworthis

trettya ow klosyow?

13Na besyewgh dri offrynnow koeg!

Ynkys yw kasadow dhymm.

An loer nowydh ha'n sabot, gelwel kuntellesow solem –

ny allav perthi kammhynseth yn kuntellesow solem.

14Agas loeryow nowydh ha'gas goelyow apoyntys

ow enev a gas.

Begh yns i warnav;

skwith ov vy a'ga doen.

15Pan ystynnowgh agas diwleuv,

my a gudh ow dewlagas ragowgh;

ynwedh pan wrewgh meur a bysadow,

ny woslowav vy.

Agas diwleuv yw leun a woes.

16Omwolghewgh, omlanhewgh;

kemmerewgh agas drog wriansow

yn-mes a'm gwel;

hedhewgh a gammwul,

17dyskewgh gul da,

hwilewgh gwirvreus,

ewnewgh an arwasker,

rewgh gwirvreus dhe'n omdhivas,

defendyewgh an wedhwes.

18Dewgh, ha resnyn ni war-barth,

yn-medh an Arloedh.

Kyn fons agas peghosow kepar ha kogh,

y fydhons mar wynn avel an ergh;

kyn fons mar rudh avel purpur,

y fydhons kepar ha gwlan.

19Mars yw agas bodh ha mar pydhowgh gostydh,

hwi a dheber dader an tir;

20mes mar skonyowgh ha rebellya,

hwi a vydh dybrys gans an kledha;

rag ganow an Arloedh re gewsis.

An Sita Legrys

21Assa wrug an sita len

dos ha bos hora!

Hi neb a veu leun a wirvreus,

ewnder a ostya ynni,

mes lemmyn denledhysi.

22Dha arghans eth ha bos atal,

dha win yw kemmyskys gans dowr.

23Dha bennsevigyon yw penn-kales,

ha keskowetha ladron;

pubonan anedha a gar falswober

ha helghya rohow.

Ny rons gwirvreus dhe'n omdhivas,

ha ken an wedhwes ny dheu a-ragdha.

24Rakhenna y lever an Arloedh, Arloedh an luyow, an Galloesek a Ysrael:

Ogh, my a vydh konfortys drefenn ow envi,

ha tyli dial war ow eskerens.

25My a dreyl ow leuv er dha bynn;

my a burj dhe-ves dha blosedhes kepar ha gans lisiw,

ha kemmeres yn-mes oll dha atal.

26My a wra restorya dha vreusysi kepar ha kyns,

ha dha gonseloryon kepar hag y'n dalleth.

Wosa hemma ty a vydh henwys sita an ewnder,

an sita len.

27Sion a vydh dasprenys dre wirvreus,

ha'n re anedha a dhehwel, dre ewnder.

28An re a rebell ha'n beghadoryon a vydh distruys war-barth,

ha'n re a forsak an Arloedh a dhe goll.

29Rag i a vydh methek a'n derow

re dhesirsowgh;

hag i a vydh shamys dre'n lowarthyow

re dhewissowgh.

30Rag hwi a vydh avel derebinthenn

gwedhrys hy del,

hag avel lowarth heb dowr.

31An den krev a vydh avel garrow lin,

ha'y ober avel gwryghonenn;

aga dew a lesk war-barth

heb denvyth dh'aga difeudhi.