Salusyans

1Jamys, gwas Duw ha'n Arloedh Yesu Krist, dhe'n dewdhek loeth yw skattrys: Lowena dhywgh!

Fydh ha Furneth

2Tybewgh pup-tra dhe vos lowena, ow breder, pan goedhowgh yn provow divers, 3ow kodhvos an prevyans a'gas fydh dhe wul perthyans. 4Ha gwres perthyans kowlwul y ober may fewgh perfydh ha dien, heb bos dhywgh fowt travyth.

5Mes mar fyll furneth dhe nebonan ahanowgh, govynnes ev orth Duw a re dhe bub den yn hel, heb keredhi, hag y fydh res dhodho. 6Mes govynnes yn fydh heb doutya, rag neb a dhout yw kepar ha mordonn yw helghys ha tewlys der an gwyns. 7Na dybes an den ma ev dhe dhegemmeres travyth dhiworth an Arloedh. 8Gour dewblek y vrys yw brottel yn oll y fordhow.

Boghosogneth ha Rychys

9Mes gwres bostya an broder uvel yn y ughelder, 10ha'n den rych yn y uvelder, rag ev a dremen kepar ha bleujenn wyls. 11Rag an howl a sev gans an trethes ha gul dhe'n gwels gwedhra, ha'n vleujenn anodho a goedh, ha tekter y semlans yw diswrys. Y'n keth fordh an den rych a wedher yn mysk y wriansow.

Prevyans ha Temptyans

12Gwynnvys an gour a bes yn-dann brevyans rag, wosa bos prevys, ev a dhegemmer an gurun a vewnans a ambosas Duw dhe'n re a'n kar. 13Na leveres denvyth a vo prevys, ‘Gans Duw prevys ov vy’; rag ny yll Duw bos prevys gans drog, ha ny brev ev y honan denvyth. 14Mes prevys yw pub den yw tennys ha dynys der y dhrokhwansow ev. 15Ena tebel-ewl, wosa omdhoen, a dhineyth peghadow, ha peghadow kowlwrys a dhineyth ankow. 16Na vedhewgh toellys, ow breder veurgerys.

17Pub ro da ha pub ro perfydh a dhiyskynn dhiworth a-wartha, ow tos yn-nans dhiworth an Tas a wolowys ha nyns eus chanj na skeus treylyans ganso. 18Gans y vynnas ev, ev a'gan dineythis dre er a wiryonedh, may fen ni avel an kynsa frut a'y greaturs.

Klewes ha Gul an Ger

19Godhvydhewgh hemma, ow breder veurgerys. Bedhes pub den skav dhe glewes, lent dhe gewsel, lent dhe serri. 20Rag ny wra sorr gour avonsya ewnder Duw. 21Ytho, gorrewgh dhe-ves pub plosedhes ha drog dres eghenn, ha degemmerewgh yn uvel an ger plynsys ynnowgh, a yll selwel agas enev.

22Bedhewgh gwrioryon a'n ger, heb bos goslowysi yn unnsel, owth omdoella. 23Rag den mars yw goslowyas a'n ger heb bos gwrier, ev yw kepar ha gour a wel y fas genesik yn gweder. 24Ev a wel y honan ha mos dhe-ves hag ankevi a-dhesempis py par den yw. 25Mes neb a vir y'n lagha berfydh a rydhses ha pesya ynno, heb bos goslowyas a ankev, mes gwrier an ober, gwynnvys vydh an den ma y'n pyth a wra. 26Mars eus neb den a breder y vos kryjyk, heb fronna y daves, mes ow toella y golonn ev, koeg yw kryjyans an den ma. 27Kryjyans glan hag andhefolys a-dherag Duw an Tas yw hemma; mos dhe vires orth omdhivasow ha gwedhwesow yn aga anken, hag omwitha dinamm dhiworth an bys.