Kerensa a'n Bys

1A-ble teu breselyow ha kasow yntredhowgh? A ny dhons i yn-mes a'gas hwansow usi owth omladh yn agas eseli? 2Yma hwans genowgh ha ny'gas beus. Hwi a ladh ha perthi avi heb galloes kavoes. Hwi a omladh ha breseli. Ny'gas beus rag na wovynnowgh. 3Hwi a wovynn heb degemmeres, rag hwi a gammwovynn, may hyllowgh spena, ow siwya agas hwansow. 4A avoutresow!4:4 A avoutresow! War-lergh re a'n dornskrifow A avoutroryon hag avoutresow! A ny wodhowgh hwi kerensa an bys dhe vos eskarogeth erbynn Duw? Piwpynag a vynno bos koweth an bys a omwra eskar Duw. 5Po a dybowgh an skryptor dhe leverel yn euver, ‘Trohag avi y yeun an spyrys a wrug ev dhe driga ynnowgh.’ 6Mes brassa gras y re ev; rakhenna y lever,

‘Duw a sev erbynn tus woethus,

mes dhe dus uvel ev a re ras.’

7Ytho, bedhewgh gostydh dhe Dhuw; mes sevewgh erbynn an jowl, hag ev a wra fia dhiworthowgh. 8Dewgh nes dhe Dhuw, hag ev a dheu nes dhywgh hwi. Glanhewgh agas diwla, a beghadoryon, ha purhewgh agas kolonn, a dus dewblek agas brys. 9Gwrewgh galari, ha kyni hag oela. Bedhes agas hwarth treylys dhe gynvann, ha'gas lowena dhe dristyns. 10Omuvelhewgh a-dherag an Arloedh, hag ev a wra agas ughelhe.

Breusi Breder

11Na wrewgh kewsel an eyl erbynn y gila, a vreder. Neb a gews erbynn broder po a vreus y vroder a gews erbynn an lagha hag a vreus an lagha; ha mar preusewgh an lagha, nyns osta gwrier an lagha mes breusydh. 12Onan yw riyas an lagha ha breusydh, neb a yll selwel ha diswul. Piw osta jy, a vreus dha gentrevek?

Gwarnyans erbynn Bostya

13Dewgh lemmyn, an re a lever, ‘Hedhyw po a-vorow ni a vynn mos a-ji dhe'n dre ma ha spena blydhen ena ha kenwertha, ha gul prow.’ 14Mes ny wodhowgh fatell vydh agas bewnans a-vorow. Ethenn owgh hwi owth omdhiskwedhes4:14 Ethenn owgh hwi owth omdhiskwedhes: War-lergh re a'n dornskrifow Ethenn yw, owth omdhiskwedhes. rag berr dermyn hag ena ow mos mes a wel. 15Yn le henna, y koedh dhywgh leverel, ‘Mar mynn an Arloedh, ni a vew, ha gul hemma po henna.’ 16Mes lemmyn hwi a vost yn agas goeth. Oll bostya a'n par na yw drog. 17Ytho neb a woer an pyth yw da dhe wul hag ev ny'n gwra, dhodho ev pegh yw.