Gwarnyans dhe'n Dus Rych

1Dewgh lemmyn, a dus rych, gwrewgh oela ha kyni war agas galarow ow tos warnowgh. 2Pedrys yw agas pythow ha dybrys gans goedhanes yw agas dillas. 3Agas owr ha'gas arghans re gesknias, ha'ga hesknians a vydh dustuni er agas pynn ha dybri agas kig kepar ha tan. Hwi re guntellas tresor rag an dydhyow diwettha. 4Otta, gobrow an wonisysi a vysas agas gwelyow hag a wrussowgh gwitha dhiworta yn fals, ymons ow karma; ha garmow an vysoryon re dhrehedhas diwskovarn Arloedh an luyow. 5Hwi re vewas yn es hag yn plesour war an dor; hwi re vagas agas kolonn yn dydh ladhva. 6Hwi re dhampnyas ha ladha an den gwiryon; ny sev ev orthowgh.

Perthyans ha Pysadow

7Ytho, perthewgh, a vreder bys yn devedhyans an Arloedh. Otta, an tiek a worta frut drudh an dor, meur y berthyans yn y gever, erna dhegemmerro an glaw a-varr ha'n glaw diwedhes. 8Perthewgh hwi ynwedh. Fastyewgh agas kolonn, rag devedhyans an Arloedh re dheuth nes. 9Na wrewgh krodhvolas, a vreder, an eyl war y gila, ma na vewgh breusys. Otta, an breusydh a sev a-dherag an darasow. 10Kemmerewgh, a vreder, yn ensampel a wodhevyans ha perthyans, an brofoesi a gewsis yn hanow an Arloedh. 11Otta, ni a's gelow gwynnvys, an re a dhuryas; duryans Job re wrussowgh klewes anodho, ha porpos an Arloedh a welsowgh, bos an Arloedh pur druedhek ha pitethus.

12Mes dres oll, ow breder, na liewgh na re'n nev, na re'n dor na gans li vydh arall, mes bedhes agas ‘Ya’ ya, ha'gas ‘Na’ na, ma na goetthowgh yn-dann vreus.

13Eus nebonan ahanowgh grevys? Gwres ev pysi. Eus nebonan lowenek? Kanes ev salm. 14Eus nebonan klav yn agas mysk? Gelwes ev henavogyon an eglos ha gwrens i pysi warnodho ha'y untya gans oyl yn hanow an Arloedh. 15Ha pysadow fydh a wra sawya an klav, ha'n Arloedh a vynn y dhrehevel. Ha mar kwrug ev peghosow, y fydh henna5:15 y fydh henna: War-lergh re a'n dornskrifow i a vydh. gevys dhodho. 16Ytho, yesewgh agas peghosow an eyl dh'y gila, ha pysewgh an eyl rag y gila, may fewgh yaghhes. Pur nerthek yw an pysadow effeythus a dhen gwiryon. 17Elias o den kehaval y gnas dhyn ni hag ev a bysis yn pysadow na wrella glaw, ha glaw ny wrug war an dor teyr blydhen ha hwegh mis. 18Hag arta ev a bysis, ha'n nev a ros glaw, ha'n dor a dhug y frut.

19Ow breder, mar kwander nebonan ahanowgh dhiworth an gwir ha nebonan a'n dre arta dhodho, 20godhvydhes ev:5:20 godhvydhes ev: War-lergh re a'n dornskrifow godhvydhewgh. neb a dreyl peghador a'y gammfordh a selow y enev a ankow, ha kudha peghosow pals.