Yudith a Ombareus rag Mos dhe Holofernes

1Pan hedhsa Yudith garma dhe Dhuw Ysrael, ha gorfenna oll an geryow ma, 2hi a sevis a'y sav a'n tyller mayth o hi a'y growedh. Hi a elwis hy maghteth ha diyskynna y'n chi may spena pub sabot ha'y dhydhyow goel. 3Hi a omdhiwiskas a'n saghwisk re wisksa, hag omdhiwiska a'y dillas gwedhwes, badhya hy horf gans dowr, hag ura hy honan gans uras drudh. Hi a gribas hy gols, gwiska tulyfant, hag omwiska yn gwisk hy lowender a wiska pan esa yn few hy gour Manasse. 4Hi a wiskas sandalyow war hy dewdroes, ha gwiska hy ufernelligow, breghelligow, bysowyer, skinennow, ha'y gemmweyth arall oll. Yndella yth omwrug hi pur deg, rag dynya lagasow pub gour oll a's gwella. 5Hi a ros dh'y maghteth kroghen a win ha kostrel a oyl, ha lenwel sagh a reun rostys, tesennow fygys syghys, ha bara fin; ena hi a vaylyas hy lestri oll ha'ga ri dhedhi dh'aga degi.

6Ena i eth yn-mes bys yet an sita Bethulia ha kavoes Uzzia a'y sav ena gans henavogyon an dre, Kabris ha Karmis. 7Pan y's gwelas treusfurvys yn hy semlans ha gwiskys yn maner dhihaval, marth bras a's teva a'y thekter hag yn-medhons dhedhi, 8‘Duw agan tasow re wrontyo dhis faverans ha kollenwel dha dowlow, rag glori pobel Ysrael hag ughelheans Yerusalem.’ Hi a omblegyas dhe Duw.

9Ena yn-medh hi dhedha, ‘Erghewgh may fo igerys ragov yet an dre may hylliv mos yn-mes ha kowlwul an traow re leversowgh dhymm nammnygen.’ Ytho i a erghis an wer yowynk dhe igeri an yet, dell wovynnas hi. 10Wosa i dhe wul henna, Yudith eth yn-mes, ha'y maghteth gensi. Gwer an dre a viras orti bys pan diyskynnsa an menydh ha tremena der an nans, hag ena ny allsons hy gweles na fella.

Yudith Kemmerys yn Gwith

11Yth ethons ow mos yn ewn hyns der an nans, ha bagas goelyadoryon Assyriek a vetyas orti 12ha'y dalghenna. I a wovynnas orti, ‘A by pobel osta, hag a by le osta devedhys, ha ple'th es'ta ow mos?’ Hi a worthybis ‘Myrgh an Ebrowyon ov vy, mes yth esov ow fia dhiworta, rag aga bos parys dhe vos hepkorrys dhis yn preydh. 13Yth esov vy war ow fordh dhe weles Holofernes, pennhembrenkyas a'gas lu, rag ri dhodho gwir dherivas; my a vynn diskwedhes dhodho hyns ragdho may hallo mos ha kachya an vro venydhyek oll heb kelli denvyth a'y lu, synsys po ledhys.’

14Pan glewis an wer hy geryow, ha merkya hy fas – hi o marthys teg yn aga dewlagas – yn-medhons dhedhi, 15‘Ty re selwis dha vewnans dre fistena war-nans rag gweles agan arloedh. Ke distowgh dh'y dylda; nebes ahanan a wra mos genes ha dha dhaskorr dhodho. 16Pan sevydh a-dheragdho, na borth own y'th kolonn, mes lavar dhodho an pyth re leversys nammnygen, hag ev a wra dha dhyghtya yn ta.’

17I a dhewisis kans gour dhiworth a'ga mysk dhe vos gensi hi ha'y maghteth, ha'ga dri dhe dylda Holofernes. 18Yth esa tervans meur y'n kamp dien, rag bos kyhwedhlys a dylda dhe dylda hy devedhyans. Tus a dheuth ha kuntell a-dro dhedhi, ha hi a'y sav yn-mes a dylda Holofernes, ow kortos bys pan dherivsons dhodho a-dro dhedhi. 19Marth a's teva i a'y thekter ha marth a's teva a'n Ysraelysi a'y govis hi. Yn-medhons an eyl dh'y gila, ‘Piw a yll dispresya an bobel ma, a's teves benynes avel homma yn aga mysk? Nyns yw fur gasa yn few nagonan a'ga gwer, rag mara's gesyn mos yn-kerdh i a allsa toella an bys oll.’

Yudith yw Dres a-rag Holofernes

20Ena gwithysi Holofernes hag oll y servysi a dheuth yn-mes ha'y ledya hi y'n tylda. 21Yth esa Holofernes a'y wrowedh war y weli yn-dann roes-wibes o gwiys gans purpur hag owr, gwyrveyn ha meyn drudh. 22Pan dherivsons dhodho anedhi, ev a dheuth dhe dal an tylda, gans lugern arghans degys a-dheragdho. 23Pan dheuth Yudith yn golok Holofernes ha'y servysi, marth a's teva i oll a dekter hy fas. Hi a goedhas war hy fas hag omblegya dhodho, mes y gethyon a's gorras a'y sav arta.