Yudith a Dhibenn Holofernes

1Pan dheuth nosweyth, y gethyon a omdennas yn skon. Bagoas a dhegeas an tylda a'n tu a-ves hag eskeas an servysi a-dhiworth y vester. I eth dhe'n gweli, rag pubonan o skwith drefenn an wledh dhe besya mar hir. 2Mes Yudith a veu gesys yn tylda hy honan oll, gans Holofernes a'y wrowedh war y weli, rag medhow fest o ev.

3Ytho, Yudith re lavarsa dh'y maghteth sevel a'y sav yn-mes a'n chambour ha gortos hi dhe avodya, par dell wra hi dydhyow erell; rag hi re lavarsa hi dhe vos yn-mes rag hy fysadow. Re lavarsa hi an keth tra dhe Bagoas. 4Pubonan eth yn-mes, ytho, ha ny veu gesys y'n chambour denvyth, na bras na byghan. Ena Yudith, ow sevel a'y sav ryb y weli, yn-medh yn hy holonn, ‘A Arloedh Duw a bub galloes, mir y'n eur ma orth ober ow diwleuv rag gormola Yerusalem. 5Yth yw lemmyn an prys dhe weres dha ertach ha kompoesa ow thowl dhe dhistrui an eskerens, re omsevis er agan pynn.’

6Hi eth bys peul an gweli ogas dhe benn Holofernes, ha kemmeres y gledha esa ow kregi ena. 7Hi a dheuth ogas dh'y weli, ha dalghenna blew y benn, hag yn‑medh hi, ‘Ro dhymm hedhyw nerth, A Arloedh, Duw Ysrael!’ 8Ena hi a weskis y gonna diwweyth gans oll hy nerth, ha treghi y benn dhiworto. 9Wosa henna, hi a rolyas y gorf a'n gweli ha tenna dhe'n leur an roes-wibes dhiworth an peulyow. Hi eth skon yn-mes ha ri penn Holofernes dh'y maghteth, 10neb a'n gorras yn hy sagh-boes. Ena an dhiw anedha a avodyas war‑barth, dell o aga us rag pysi. I a dremenas der an kamp, mos a-dro dhe'n nans, hag yskynna an menydh dhe Bethulia, ha dos dh'y yetow.

Yudith a Dhehwel dhe Bethulia

11Yudith a armas a bellder dhe'n woelyadoryon orth an yetow, ‘Igerewgh, igerewgh an yet! Yma Duw, agan Duw, genen ni, ow tiskwedhes hwath y nerth yn Ysrael ha'y nerth erbynn agan eskerens, dell wrug ev hedhyw!’

12Gwer hy sita, pan glewsons hy lev, a fistenas bys yet an dre ha gelwel war-barth henavogyon an sita. 13I a boenyas war-barth, bras ha byghan, rag skant ny allsons krysi hi dhe dhehweles. I a igoras an yet ha'ga degemmeres. Ena i a enowis tan rag ri golow, hag omguntell yn aga hyrghynn. 14Yn-medh hi dhedha yn lev ughel, ‘Gormelewgh Duw, gormelewgh e! Gormelewgh Duw, na gildennas y versi dhiworth chi Ysrael, mes distrui agan eskerens der ow leuv an nos ma!’

15Ena hi a gemmeras an penn yn-mes a'n sagh ha'y dhiskwedhes, hag yn‑medh hi dhedha, ‘Ottomma, penn Holofernes, pennhembrenkyas an lu Assyriek, hag ottomma an roes-wibes yn-danni mayth esa ev a'y wrowedh yn y vedhwenep. An Arloedh re'n gweskis dhe'n leur dre leuv benyn. 16Dell vew an Arloedh, neb re'm difresas yn fordh mayth yth, ow fas vy yth o a'n ardhynyas dh'y dhistruyans, ha na gommyttyas ev pegh vyth genev, dhe'm defola ha shamya.’

17Oll an bobel a veu sowdhenys yn feur. I a omblegyas dhe'n leur ha gormel Duw, hag yn-medhons war-barth, ‘Benniges osta agan Duw, neb re uvelhas eskerens dha bobel.’

18Ena yn-medh Uzzia dhedhi, ‘A vyrgh, benniges os gans an Ughella Duw a-ugh pub benyn oll y'n norvys; ha benniges re bo an Arloedh Duw, neb a wrug an nevow ha'n nor, neb re'th kevarwoedhas dhe weskel an penn dhiworth hembrenkyas agan eskerens. 19Nevra ny dhiberth dha wormola bys vykken dhiworth kolonnow a'n re a govha nerth Duw. 20Duw re wrontyo hemma dhe vos enor heb hedhi dhis, ha re woppro ev dhis gans bennathow, drefenn ty dhe argelli dha vewnans dha honan prys mayth o uvelhes agan kenedhel, ha ty a dhiallas agan argoll, ow kerdhes y'n hyns ewn a-rag agan Duw.’ Hag yn-medh oll an bobel, ‘Amen, Amen.’