Kusul Yudith

1Ena yn-medh Yudith dhedha, ‘Goslowewgh orthiv, ow breder. Kemmerewgh an penn ma ha'y gregi war pynakyl agas fos. 2Kettell dardh an jydh ha'n howl a sev a-ugh an tir, dalghennes kettep onan ahanowgh agas arvow, hag es yn-mes a'n sita pub gour krev y gorf; desedhewgh hembrenkyas dhedha, kepar dell ellewgh war-nans dhe'n plen erbynn savla an woelyadoryon Assyriek; mes na wrewgh hwi mos war-nans. 3Ena an woelyadoryon a dalghenn aga arvow ha mos y'n kamp ha gul dhe soedhogyon an lu Assyriek difuna. I a fisten yn tylda Holofernes mes ny wrons i y gavoes. Ena skruth a goedh warnedha hag i a fi dhe'n fo a-dheragowgh. 4Ena hwi ha peub eus trigys a-berth yn oryon Ysrael a wra aga chasya ha'ga hakkya dhe'n dor yn aga olyow. 5Mes kyns gul oll hemma, drewgh dheragov Aghior an Ammonyas may hallo gweles hag aswonn an den neb a dhispresyas chi Ysrael, neb a'n dannvonas dhyn kepar dell ve dhe'n vernans.’

6I a elwis Aghior, ytho, dhiworth chi Uzzia. Pan dheuth ha gweles penn Holofernes yn leuv onan a'n wer yn kuntellyans an bobel, ev a goedhas war y fas yn klamder. 7Pan y'n drehavsons dh'y sav, ev a goedhas a-rag dewdroes Yudith, hag omblegya dhedhi, hag yn-medh ev, ‘Benniges os yn pub tylda Yuda! Yn pub kenedhel, seul a glewo dha hanow a gren. 8Lemmyn, lavar dhymm pandr'a wrussys dres an dydhyow ma.’

Ena Yudith a dherivas dhodho yn kres an bobel pup-tra re wrussa hi, a-dhia'n jydh mayth avodyas bys y'n prysweyth mayth esa hi ow kewsel orta. 9Wosa hi dhe worfenna, an bobel a armas yn ughel ha gul tros lowenek yn aga sita. 10Pan welas Aghior pup-tra re wrussa Duw Ysrael, ev a grysis yn fyrv yn Duw. Ytho, trodreghys veu, ha junya chi Ysrael, bys y'n jydh hedhyw.

Mernans Holofernes Diskudhys

11Kettell dardhas an jydh, i a grogas penn Holofernes war an fos. Ena pub gour anedha a gemmeras y arvow, hag i eth yn-mes yn bagasow bys y'n bolghow y'n menydhyow. 12Pan y's gwelas an Assyrianys, i a dhannvonas ger dh'aga hembrenkysi, hag i eth dhe'n bennhembrynkysi an kaptenyon ha dh'aga soedhogyon erell oll. 13I a dheuth dhe dylda Holofernes hag yn-medhons dhe'n rennyas charjys gans y negys personel oll, ‘Difun agan arloedh, rag an gethyon re dheuth ha bos mar hardh dell dhons i war-nans er agan pynn rag omsettyans, dh'aga hollva dhien.’

14Bagoas a entras ytho. Ev a gnoukyas orth porth an tylda, ow tybi ev dhe goska gans Yudith. 15Byttegyns, pan na worthybis denvyth, ev a'n igoras hag entra an chambour, hag ev a'n kavas gorlesys marow war an leur, ha'y benn gyllys dhiworto. 16Ev a grias yn lev ughel hag oela, kyni ha garma, ha skwardya y dhillas. 17Ena ev eth dhe'n tylda may hwodrigsa Yudith, ha pan na's kavas, ev a fyskas yn-mes dhe'n bobel ha garma, 18‘An kethyon re'gan kastyas! Unn venyn Ebrow re dhros bismer war ji myghtern Nebukadnessar. Otta, yma Holofernes a'y wrowedh war an leur, ha gyllys y benn!’

19Hembrenkysi an lu Assyriek pan glewsons hemma, a skwardyas aga dhillas ha fest troblys ens. Aga kriow ha garmow a veu pur vras dres oll an kamp.