Grasyans Yudith

1Yudith a dhallathas an grasyans ma a-rag Ysrael oll, ha'n bobel oll a ganas an gormola ma, ughel aga levow.16:1: Y'n tekst greka an wers ma yw niverys 15:14, ha 16:2 bys 8 yw niverys 16:1 bys 7. 2Hag yn-medh Yudith,

Dallethewgh kan dhe'm Duw gans tabourigow,

kenewgh dhe'm Arloedh gans symbalys.

Kessenewgh dhodho salm a wormola;

ughelhewgh ev, ha gelwewgh war y hanow.

3Rag an Arloedh yw Duw neb a skwatt breselyow;

ev re settyas y gamp yn mysk y bobel;

ev re'm delivras a dhiwla an re a'm chasyas.

4Asshur a dheuth yn-nans a venydhyow an gledhbarth;

ev a dheuth gans lu diniver a'y vreselyoryon;

aga myns a stoppyas an keynresyow,

ha'ga marghoglu a gudhas an menydhyow.

5Ev a vostyas y hwrussa gorleski ow thir,

ha ladha ow gwer yowynk gans an kledha,

ha skwattya ow fleghigyow dhe'n leur,

ha dalghenna ow fleghes avel da pyllys,

ha kemmeres ow gwyrghesow avel preydh.

6Mes an Arloedh Ollgalloesek re's lestas

dre leuv benyn.

7Rag ny goedhas aga hampyer dre leuv gwer yowynk,

na'n gweskis dhe'n leur mebyon an Titanes,

na ny wrug kewri hir y weskel;

mes Yudith myrgh Merari

dre dekter hy fas a'n diswrug.

8Rag hi a dhiwiskas hy dillas gwedhwes

rag eksaltya an re gompressys yn Ysrael.

Hi a uryas hy fas gans melyseth;

hi a golmas hy gols gans snod,

hag omwiska pows a lin rag y doella.

9Hy sandal a ravshyas y dhewlagas,

hy thekter a husas y vrys,

ha'n kledha a dhistagas y gonna!

10An Persianys a grenas a'y hardhder,

an Medys a's teva own a'y bedhekter.

11Ena ow fobel gompressys a armas gans joy;

ow fobel wann a armas, ha'n eskar a grenas;

i a dhrehevis aga levow, ha gul dhe'n eskar kildenna.

12Mebyon kethesow a's gwanas

ha'ga golia avel fleghes fowesigyon;

i a verwis a-rag lu ow Arloedh.

13My a gan hymna nowydh dhe'm Duw:

A Arloedh, meur ha gloryus os,

marthys yn nerth, antryghadow.

14Servyens tejy, oll dha groaduryon,

rag ty re gewsis, hag i a veu gwrys.

Ty a dhannvonas yn-mes dha Spyrys, hag ev a's formyas;

rag ny yll nagonan settya orth dha lev.

15Rag an menydhyow a gren bys yn aga selyow gans an dowrow;

a-rag dha wolok an karregi a deudh avel koer.

Mes dhe'n re a berth own ahanas

ty a dhiskwedh mersi.

16Rag pub sakrifis avel sawer plegadow yw tra vyghan,

ha'n blonek oll a offrynn leskys yw tra vyghan fest dhiso jy;

mes seul a berth own a'n Arloedh yw meur bys vykken.

17Go-i, an kenedhlow a omsev erbynn ow fobel!

An Arloedh Ollgalloesek a wra aga diella dydh breus;

ev a dhannvon tan ha pryves yn aga hig;

i a oel yn payn bys vykken.

18Pan dheuthons dhe Yerusalem, i a wordhyas Duw. Kettell veu purhes an bobel, i a offrynnas aga offrynnow leskys, aga offrynnow bodhek, ha'ga rohow. 19Yudith a sakras dhe Dhuw oll daffar Holofernes, a wrussa an bobel y ri dhedhi; ha'n roes-wibes re gemmersa a'y jambour rygdhi hy honan, a ros hi avel ro sakrys. 20Dres tri mis an bobel a besyas goelya yn Yerusalem a-rag an sentri, ha Yudith a wortas gansa.

Yudith Gerys-da, ha'y Mernans

21Wosa hemma, pubonan a dhehwelis tre dh'y eretons y honan. Yudith eth dhe Bethulia, ha triga yn hy thiredh hy. Dres remenant hy bewnans, enorys o hi der oll an pow. 22Lies a'n jeves hwans a'y demmedhi, mes ny omros hi dhe wour vyth, oll dydhyow hy bewnans, wosa hy gour Manasse dhe verwel ha bos ynkleudhys gans y bobel. 23Hi a dheuth ha bos gerys-da moy ha moy, hag a gothhas yn chi hy gour, bys pan veu kans bloedh ha pymp. Hi a livras hy maghteth. Hi a verwis yn Bethulia hag ynkleudhys veu yn mogow hy gour Manasse; 24ha chi Ysrael a gynis rygdhi seyth dydh. Kyns hi dhe verwel, hi a rannas oll hy pythow dhe oll an re o neshevin dh'y gour Manasse, ha dh'y neshevin hy honan. 25Bythkweth namoy ny lesas denvyth browagh yn mysk an Ysraelysi dres bewnans Yudith, po termyn hir wosa hy mernans.