Eskerdh erbynn an Howlsedhes

1Y'n etegves blydhen, y'n nessa dydh warn ugens a'n kynsa mis, y feu kows yn palys Nebukadnessar myghtern an Assyrianys, a-dro dhe dhial war oll an rannvro, par dell lavarsa ev. 2Ev a elwis war-barth oll y soedhogyon ha'y ugheloryon ha displetya orta y dowl kevrinek, ha derivas yn leun, yn-mes a'y anow y honan, oll sherewynsi an rannvro. 3Ena i a erviras dhe dhistrui kemmys na obaysa geryow y anow.

4Wosa ev dhe worfenna displetya y dowl, Nebukadnessar myghtern an Assyrianys a elwis Holofernes, pennhembrenkyas y lu, ha'n nessa war y lergh, hag yn-medh dhodho, 5‘Yndellma y lever an myghtern meur, arloedh an norvys oll: Pan avodydh a'm golok, kemmer genes gwer a's teves omfydhyans yn aga krevder, hwegh ugens mil a droesogyon ha dewdhek mil a varghogyon. 6Ke yn-mes erbynn oll tir an howlsedhes, rag i a dhisobayas geryow ow ganow. 7Ergh dhedha pareusi pri ha dowr,2:7 pri ha dowr: Tokyn a omblegyans. rag yth esov ow tos y'm sorr er aga fynn. Kudha a wrav enep kowal an bys gans treys ow luyow, ha'ga delivra dhedha dhe vos pyllys. 8Aga re ledhys a lenow aga hownansow, ha pub gover hag avon a vydh lenwys a'ga re varow bys may fennons; 9ha my a's hembronk dhe-ves avel kethyon bys yn pennow an bys. 10Mes ty, ke a-dheragov ha kemmeres oll aga thir a-barth dhymm. I a omre dhis, ha ty a's syns ragov erbynn dydh aga hessydhyans. 11Byttegyns, an re a dhisobay, na wres dha lagas aga sparya, mes ty a's delirv dhe ladhva ha ravnans dre dha rannvro gowal. 12Rag dell vewav, ha re alloes ow ruvaneth, an pyth re leveris a vydh kowlwrys dre'm leuv. 13Ha ty – kemmer with na dreuspassydh gorhemmynn vyth a'th arloedh, mes gwayt aga howlwul poran dell erghis dhis; ha na wra treynya aga gul.’

Kaskyrgh Holofernes

14Ytho, Holofernes a omdennas a bresens y vester ha gelwel war-barth oll an gaslewydhyon, an bennhembrynkysi ha soedhogyon an lu Assyriek, 15ha kuntell gwer dhewisys rag aray an vatel par dell y'n arghsa y arloedh: hwegh ugens mil anedha, war-barth gans dewdhek mil wareger, 16hag ev a's arayas par dell yw lu meur arayys rag kas. 17Ev a gemmeras niver bras dres eghenn a gowrvergh, asenes ha mulyon rag karyans, ha myns diniver a dheves, oghen ha gever rag sosten; 18Kekeffrys boes lowr rag pub gour, ha myns kowrek a owr hag arghans dhiworth an palys ryel.

19Ena yth ehwias gans y lu kowal rag mos kyns myghtern Nebukadnessar ha rag kudha enep kowal an norvys bys an howlsedhes gans aga charettow ha marghogyon ha soudoryon dhewisys an troeslu. 20Gansa yth eth routh kemmyskys, avel hes a lokustes, ha doust an dor, routh na yllys hy rekna.

21I a geskerdhas tri dydh dhiworth Nineve bys yn plen Bektileth, ha kampya a-dal Bektileth ogas dhe'n menydh usi a-gledh dhe Kilikia Wartha. 22Alena Holofernes a gemmeras an lu kowal, an troeslu, an marghoglu ha'n charettow, hag yskynna y'n vro venydhyek. 23Ev a ravnas Put ha Lud, ha pylla oll an Rassisysi ha'n Yshmaelysi trigys ryb an difeythtir, a-dhyghow dhe bow an Keleysi 24Ena ev a siwyas an Ewfrates ha passya dre Mesopotamia ha distrui oll an sitys war bennow an menydhyow ryb an avon Abron,2:24 Abron: Lemmyn Khabur, ragavon a'n Ewfrates; cf. Habor yn 2 Myghternedh 17:6. bys y'n mor. 25Ev a dhalghennas keffrys tiredh Kilikia, ha ladha pubonan a settyas er y bynn, ha dos bys yn oryon Yafeth, dhe'n dyghow a-dal Arabia. 26Ev a gyrghynnas oll an Midyanysi, ha leski aga thyldow ha pylla aga horlannow deves. 27Ena ev eth war-nans bys yn plen Damaskus yn termyn trevas waneth, ha leski oll aga farkow ha distrui aga flokkys ha'ga greow ha pylla aga sitys ha ravna aga thiryow ha ladha oll aga gwer yowynk dre vin an kledha.

28Ytho own ha browagh anodho a goedhas war oll an dus trigys y'n arvor, yn Sidon ha Tyr, ha war drigoryon Sur hag Okina, ha war drigoryon Yamnia. An dus trigys yn Azotus hag Askalon a's teva euth bras anodho.