Pysadow rag Kres

1Ytho i a dhannvonas kannasow rag pysi kres, hag yn-medhons 2‘Ottani, gwesyon Nebukadnessar, an myghtern meur, ow koedhys dhe'n dor a-dheragos. Gwra genen pypynag a vynni. 3Ottomma a-dheragos oll agan trevow, oll agan tir, oll agan gwanethegi, ha'n flokkys ha'n greow, hag oll an korlannow gans agan tyldow; gwra gansa pypynag a vynni. 4Ynwedh agan sitys ha gansa aga thrigoryon yw dha gethyon; deus ha'ga dyghtya dell vo da y'th tewlagas.’

5An wer a dheuth dhe Holofernes ha derivas dhodho an geryow ma. 6Ena ev a dhiyskynnas dhe'n arvor, ev ha'y lu, ha desedha gwithysi ervys y'n dinasow ha kemmeres gwer dhewisys a-dhiworta avel y weresoryon. 7An re ma ha pubonan y'n pow a-dro a'n wolkommas gans tergh ha donsyow ha tabourigow. 8Ev a dorras dhe'n dor oll aga sentris3:8 sentris: Ow siwya an Syriek. Septuagint oryon. ha treghi dhe'n dor aga nevesow, rag y vos charjys dhe dhistrui oll duwow an tir, may hworthyo pub kenedhel unnsel Nebukadnessar, ha may krio warnodho avel duw oll an tavosow ha'n kordhow.

9Ena ev a dheuth erbynn Esdraelon, ogas ha Dothan, a-dal drumm meur Yudi; 10ev a gampyas yntra Geba ha Skythopolis, ha gortos ena mis kowal rag kuntell oll an daffar rag y lu.