Yudi Hewoel

1An Ysraelysi trigys yn Yudi a glewas a bup-tra gwrys dhe'n kenedhlow gans Holofernes, pennhembrenkyas Nebukadnessar myghtern an Assyrianys, ha fatell byllsa ha distrui oll aga themplow. 2Ytho i a's teva own pur veur anodho ha fest troblys vons a-barth Yerusalem ha tempel an Arloedh aga Duw. 3Rag i re dhehwelsa degynsow dhiworth an gethneth, hag oll pobel Yudi o kuntellys war-barth a-nowydh, ha'n lestri, an alter ha'n tempel re bia sakrys wosa aga disakrans. 4I a dhannvonas dhe bub ranndir a Samaria, ha dhe Kona, Beth-horon, Belmayn ha Yeriko, Koba hag Esora, ha nans Salem. 5Wosa sesya oll gwarthevyow an menydhyow ughel ha kera an dinasow warnedha, i a greunis sosten yn pareusyans rag bresel, rag i re myssens aga farkow a-gynsow.

6Yoakim an arghoferyas, neb esa yn Yerusalem y'n eur na, a skrifas dhe drigoryon Bethulia ha Betomesthaym, usi a-rag Esdraelon a-dal an plen ogas dhe Dothan, 7owth erghi dhedha sesya an bolghow a led bys y'n vro venydhyek, drefenn y hyllys dresta kavoes fordh bys yn Yudi, hag es o lettya seul a hwilla entra, rag an hyns o ynn, ledan lowr rag dew wour dhe'n moyha.

Pysadow hag Edrega

8Ytho, an Ysraelysi a obayas gorhemmynnow Yoakim an arghoferyas ha senedh pobel Ysrael oll, esens yn esedhek yn Yerusalem. 9Pub gour a Ysrael a grias dhe Dhuw gans diwysykter meur hag omuvelhe gans penys bras. 10I a omwiskas yn yskar, i ha'ga gwragedh, aga fleghes, aga gwarthek, keffrys ha pub annedhyas estren, pub gonisyas arvethys ha pub keth prenys. 11Oll an wer a Ysrael ha'n benynes ha'n fleghes trigys yn Yerusalem a goedhas dhe'n dor a-dherag an tempel ha gorra lusu war aga fenn ha displetya aga yskar a-rag an Arloedh, 12hag i a gyrghynnas an alter gans yskar. I a garmas dhe Dhuw Ysrael yn ter gans unn akord na hepkorro aga fleghes avel preydh, na'ga gwragedh dhe vos ravnys, na trevow aga eretons dhe vos diswrys, na'n sentri dhe vos disakrys may lowenhahons an Jentilys yn spitus.

13An Arloedh a glewas aga fysadow ha mires orth aga galarow; rag an bobel a benysas lies dydh dres Yudi oll, keffrys hag yn Yerusalem a-rag sentri an Arloedh Ollgalloesek. 14Yoakim an arghoferyas hag oll an oferysi neb a sevi a-dherag an Arloedh ha servya an Arloedh, ha'ga diwglun grogysys gans yskar, a offrynnas an offrynnow leskys pub-dydhyek, ha'n ambosow hag offrynnow bolonjedhek an bobel. 15Gans lusu war aga thulyfantys, i a grias dhe'n Arloedh gans oll aga nerth dhe vires gans favour war an chi kowal a Ysrael.