Gnas Yudith

1Y'n dydhyow na, Yudith a glewas a'n maters ma. Hi o myrgh Merari mab Oks mab Yosep mab Oziel mab Elkia mab Ananias mab Gideon mab Rafain mab Ahitub mab Elias mab Hilkia mab Eliab mab Nathanael mab Salamiel mab Sarasade mab Ysrael. 2Hy gour, Manasse, neb o esel a'y loeth ha'y theylu, re vawrsa yn prys an drevas heydh. 3Pan esa ev ow sevel, ow korweles an wesyon esa ow kelmi tyskennow y'n park, gweskys veu gans trethes an howl ha growedha war y weli, may ferwis yn Bethulia y sita ev. I a'n ynkleudhyas ytho gans y dasow y'n park yntra Dothan ha Balamon. 4Yth esa Yudith trigys yn hy chi hy honan avel gwedhwes teyr blydhen ha peswar mis. 5Hi a dhrehevis tylda rygdhi hy honan war do hy chi, grogysa hy diwglun gans yskar ha gwiska dillas hy gwedhowses. 6Hi a wrug penys oll dydhyow hy gwedhowses, a-der nos an sabot ha'n sabot y honan, an jydh kyns an loer nowydh ha dydh an loer nowydh, ha goelyow ha dydhyow lowender chi Ysrael 7Benyn deg o Yudith, ha dhedhi fas pur deg. Hi gour Manasse a gemmynnsa dhedhi owr hag arghans, kethyon ha kethesow, bughes ha parkow, ha hi a dhyghtya an pythow ma hy honan. 8Denvyth ny leveri drog-ger er hy fynn, rag hi a's tevo own bras a Dhuw.

Yudith ha'n Henavogyon

9Pan glewas Yudith an tebeleryow kewsys gans an bobel erbynn aga rewler, drefenn aga bos ow klamdera dre fowt dowr, ha pan glewas hi pub ger a leveris Uzzia dhedha, ha fatell ambosas ev dhedha yn-dann do daskorr an sita dhe'n Assyrianys wosa pymp dydh, 10hi a dhannvonas hy maghteth, neb a's tevo charj a'y fythow oll, dhe elwel dhedhi Kabris ha Karmis, henavogyon hy sita. 11I a dheuth dhedhi, hag yn-medh hi dhedha, ‘Goslowewgh orthiv, rewloryon an dus trigys yn Bethulia! An pyth re leversowgh hedhyw dhe'n bobel nyns yw ewn; hwi re dos ha disklerya an to ma yntra Duw ha hwi hogen, owth ambosa dhe dhaskorr an sita dh'agan eskerens marnas an Arloedh a dreyl ha gweres dhyn a-ji dhe nebes dydhyow. 12Piw owgh hwi, neb re brovas Duw an jydh ma, ha settya agas honan yn le Duw yn mysk mebyon tus? 13Yth esowgh hwi ow previ an Arloedh Ollgalloesek. A ny gonvedhowgh nevra ? 14Ny yllowgh hwithra downderyow kolonn den, na konvedhes an pyth a breder ev; ytho fatell waytyowgh hwilas Duw, neb a wrug oll an taklow ma, ha dysmygi y brys ev po konvedhes y brederow? Na, ow breder, na serrewgh an Arloedh agan Duw. 15Rag mar ny vynn ev agan gweres a-ji dhe'n pymp dydh ma, yma dhodho an galloes dh'agan skoedhya py termyn pynag a vynno, po dh'agan distrui yn lok agan eskerens. 16Na hwilewgh kemmeres porposys an Arloedh agan Duw yn gaja; rag nyns yw Duw haval dhe vab-den, dhe vos gwaynys dre vargenya. 17Rakhenna, ha ni ow kortos y dhelivrans, gwren ni gelwel warnodho dh'agan gweres. Mar pydh da ganso, ev a glew agan lev.

18‘Rag bythkweth yn agan henedh, nag y'n dydhyow ma, re beu loeth po teylu po pobel po sita ahanan a wormel duwow gwrys gans leuv, dell wres y'n dydhyow yw passys – 19ha henn o an praga bos agan tasow delivrys dhe'n kledha ha dhe byllans, ha rakhenna i a berthis anfeusi meur a-dherag agan eskerens. 20Mes ny aswonnyn ni duw arall saw ev, ha rakhenna ni a wayt na'gan skornyo ni nag esel vyth a'gan kenedhel. 21Rag mars on ni kemmerys, oll Yudi a vydh kemmerys, ha'gan sentri a vydh pyllys; hag ev a rekwir attal rag y dhefolans gans agan goes. 22Ladhva agan breder, kethneth agan tir ha treylyans agan ertach yn ynyalder – oll hemma ev a dhre war agan penn yn mysk an Jentilys, plepynag y fydhyn ni avel kethyon; ha ni a vydh sklander ha skorn yn golok agan perghennogyon. 23Rag ny wra agan kethneth ledya dhe favour, mes an Arloedh Duw a's treyl dhe disenor.

24‘Ha lemmyn, a vreder, bedhen ni ensampel dh'agan breder, rag aga bewnans a greg warnan, ha'n sentri, an tempel ha'n alter a bowes warnan ni. 25Yn despit dhe bup-tra, grassyn dhe'n Arloedh agan Duw, neb usi orth agan previ dell wrug ev previ agan tasow. 26Perthewgh kov a'n pyth a wrug ev gans Abraham, ha fatell brovas ev Ysak, ha pandr'a hwarva dhe Yakob yn Mesopotamia syriek, hag ev ow pugelya deves Laban, broder y vamm. 27Rag ny wrug ev agan previ dre dan, dell y's provas ynsi, rag hwithra aga holonnow, na tyli dial warnan; mes an Arloedh a skorj an re a dheu nes dhodho, rag aga heski.’

28Ena yn-medh Uzzia dhedhi, ‘Oll an pyth re leversys a dheu a golonn wiryon, ha nyns eus denvyth a allsa sevel erbynn dha eryow. 29Rag nyns yw hedhyw an kynsa prys may feu dha furneth diskwedhys, mes a-dhia dhalleth dha dhydhyow oll an dus re aswonnis dha gonvedhes, rag bos ewn gnas dha golonn. 30Mes an bobel a's teves syghes bras, hag i a'gan konstrynas dhe wul an pyth re ambossyn dhedha, ha'gan ynnia dhe wul ti ma na yllyn y derri. 31Ytho gwra pysi ragon lemmyn, rag benyn gryjyk os, ha'n Arloedh a dhannvon dhyn glaw a lenow agan puthow, ha ny vydhyn klamderek namoy.’

32Yn-medh Yudith dhedha, ‘Goslowewgh orthiv. Yth esov vy ow tewlel towl dhe wul neppyth a govhir a henedh dhe henedh a'gan kenedhel. 33Sevewgh orth yet an sita haneth, hag yth av vy yn-mes gans ow maghteth; hag a-ji dhe'n dydhyow a ambossewgh ri an sita dh'aga eskerens, an Arloedh a dhelirv Ysrael der ow leuv vy. 34Byttegyns, na hwilewgh dysmygi ow thowl, rag ny vynnav y dherivas dhywgh bys pan gowlwrav an pyth a vynnav y wul.’

35Uzzia ha'n rewloryon a leveris dhedhi, ‘Ke yn kres, ha re ello an Arloedh Duw dheragos rag tyli dial war agan eskerens.’ 36I a dhehwelis ytho a'n tylda ha mos dh'aga savleow.