An Kevambos yw Terrys

1An ger hag a dheuth dhe Yeremia a-dhiworth an Arloedh, ow leverel: 2Klew geryow an kevambos ma, ha'ga hewsel orth gwer Yuda, hag orth annedhysi Yerusalem. 3Lavar dhedha: Yndellma y lever an Arloedh, Duw Ysrael; Milliges re bo an gour nag yw gostydh dhe eryow an kevambos ma, 4a worhemmynnis dh'agas tasow y'n jydh ma's dres yn-mes a bow Ejyp, a-dhiworth an fornes-horn, ow leverel, Klewewgh ow lev, ha gwrewgh pup-tra a worhemmynnav. Yndella hwi a vydh ow fobel ha my a vydh agas Duw: 5may kollenwiv an ti a des dh'agas tasow, ri dhedha tir a dhinwa leth ha mel, dell yw hedhyw. Ena my a worthybis, ‘Yndella re bo, A Arloedh.’

6Ena an Arloedh a leveris dhymm, Galw an geryow ma yn sitys Yuda, hag y'n stretow Yerusalem, ow leverel, Klewewgh geryow an kevambos ma, ha'ga gul. 7Rag my a warnyas aga thasow yn solem y'n jydh ma's dres yn-mes a bow Ejyp, bys y'n jydh ma, ow sevel a-varr ha'ga gwarnya yn ter, ow leverel, Goslowewgh orth ow lev. 8Mes ny woslowsons, na ny blegsons aga skovarn, mes i a gerdhas peub yn gorthter aga thebel golonn: ytho my a dhre warnedha oll geryow an kevambos ma, a worhemmynnis dhedha dh'y wul; mes ny wrussons.

9Ha'n Arloedh a leveris dhymm: Yma bras yn mysk gwer Yuda, hag annedhysi Yerusalem. 10I re dreylyas war-dhelergh dhe dhrogober aga hendasow, a naghas klewes ow geryow; hag i eth war-lergh duwow erell dh'aga servya; chi Ysrael ha chi Yuda re dorras ow hevambos hag a wrug vy gans aga thasow. 11Rakhenna yndellma y lever an Arloedh, Otta, my a dhre drogedh warnedha, ma na yllons diank anodho; ha kyn krions warnav, ny woslowav orta. 12Ena sitys Yuda hag annedhysi Yerusalem a wra mos, ha kria war an duwow may sakrifions dhedha: mes ny's sawyons vytholl yn termyn aga foenvos. 13Rag dha dhuwow re dheuth ha bos kemmys ha'th sitys, A Yuda; ha kemmys ha stretow Yerusalem yw an alteryow re dhrehevsowgh dhe'n imaj methus, alteryow rag leski offrynnow dhe Baal.

14Ytho na wra pysi rag an bobel ma, na drehevel kri na pysadow ragdha: rag ny's klewav pan grions warnav yn termyn aga foenvos. 15Pyth yw gwir ow haradow yn ow chi, ha hi ow kul hy drog dowlow? A yll pysadow ha kig sans kemmeres dhe-ves dha debelwrians dhiworthis, po a yllydh diank der an taklow ma? Ena a yllydh bos lowen? 16An Arloedh a elwis dha hanow ‘Olewbrenn glas, teg gans frut da’; mes gans tros annawel veur ev a worr tan ynni, ha'y skorr a vydh diles.11:16 a vydh diles: Ow siwya an Septuagint. 17Rag Arloedh an luyow, neb a'th plansas, re gewsis drogedh er dha bynn, rag an drogedh a wrug chi Ysrael ha chi Yuda, orth ow brovokya dhe sorr dre leski offrynnow dhe Baal.

Bras erbynn Yeremia

18Ha'n Arloedh a ros dhymm godhvos anodho, ha my a'n godhva;

ena ty a dhiskwedhas dhymm aga thebelwriansow.

19Mes my o haval dhe oen dov

yw dres dhe'n ladhva;

mes ny wodhyen y feu er ow fynn

may tevissens towlow, ow leverel,

‘Gwren distrui an wydhenn gans hy frut,

ha gwren y dreghi a-dhiworth tir an re vew,

ma na vydh kovhes y hanow namoy.’

20Mes, A Arloedh an luyow, neb a vreus yn ewnder,

neb a assay an golonn ha'n brys,

gas my dhe weles dha dhial warnedha,

rag dhiso jy my re dhiskwedhas ow hen.

21Ytho yndellma y lever an Arloedh a-dro dhe bobel Anathoth, a hwila dha vewnans, ow leverel, ‘Na brofoes yn hanow an Arloedh, ma na verwi der agan dorn.’ 22Ytho yndellma y lever Arloedh an luyow: Otta, my a's kessydh: an wer yowynk a verow der an kledha; aga mebyon ha'ga myrghes a verow dre dhivoetter. 23Ha ny vydh remenant anedha: rag my a dhre anfeusi war wer Anathoth, yn blydhen aga hessydhyans.