Krodhvol Yeremia

1Gwiryon osta, A Arloedh,

pan bledyav genes:

mes gas vy dhe gewsel genes a'th varnow:

Prag y hwra fordh an debeles seweni?

Prag yth yns attes oll an re yw traytus?

2Ty re's plansas, hag i re wreydhyas:

i a dyv ha doen frut:

ogas os yn aga ganow,

mes pell dhiworth aga diwloneth.

3Mes ty, A Arloedh, a'm aswonn:

ty a'm gwel, ha previ ow holonn a-ragos.

Gwra aga thenna yn-mes avel deves dhe'n ladhva,

ha'ga fareusi erbynn dydh an ar.

4Pes termyn y hwra an tir dhesygha,

ha'n gwels a bub mes gwedhra,

rag drogedh an re usi trigys ynno?

An bestes yw distruys, ha'n ydhyn;

drefenn tus dhe leverel, ‘Ny wel ev agan diwedh ni.’

Gorthyp Duw

5Mar resys erbynn tus war droes hag i a'th skwithhas,

fatell yllydh resek erbynn mergh?

Ha mar koedhydh yn tir kompes,

fatell wredh henna yn kaswydh an Yordan?

6Rag hwath dha vreder, ha chi dha das,

i ynwedh, re'th traytas;

i ynwedh re dhrehevis kri ughel war dha lergh:

na goel dhedha

kyn kewsons geryow teg dhis.

7My re asas ow chi,

my re skonyas ow ertach;

my re ros karadow ow enev

yn leuv hy eskerens.

8Ow ertach yw ragov

avel lew y'n goeswik;

kria a wra er ow fynn:

ytho my a'n kas.

9Ow ertach yw dhymm avel edhen-breydh vrith,

yma an ydhyn-preydh erell a-dro er hy fynn;

dewgh, kuntellewgh oll bestes an mes,

dens i dhe dhevorya.

10Lies bugel re dhistruis ow gwinlann,

i re drettyas ow rann yn-dann droes,

i re wrug ow rann blegadow

yn gwylvos ynyal.

11I a'n gwrug ynyal;

ynyal, y kalar orthiv

an tir oll yw gwrys ynyal,

mes denvyth ny'n kemmer dhe golonn.

12An dhistruoryon yw devedhys

war oll an ugheldiryow moel y'n gwylvos:

rag kledha an Arloedh a wra devorya

dhiworth an eyl tu a'n tir bys yn y gila:

kig vyth ny'n jevydh kres.

13I re hasas gwaneth, ha mysi spern:

skwithys yns, mes ny wrons kavoes prow.

I a gemmer meth a'ga threvasow

drefenn sorr fers an Arloedh.

14Yndellma y lever an Arloedh erbynn oll ow thebel gentrevogyon, a doch an eretons a res dhe'm pobel Ysrael dh'y erita: Otta, my a's fes yn-mes a'ga thir, ha fesya chi Yuda a'ga mysk. 15Mes wosa aga fesya yn-mes, my a dhehwel ha kemmeres truedh anedha, ha'ga dri arta, peub dh'y eretons, peub dh'y dir. 16Hag ena, mar tyskons yn tiwysyk fordhow ow fobel, dhe di ren ow hanow, ‘Dell vew an Arloedh’ par dell dhysksons ow fobel dhe di re Baal; ena i a vydh drehevys yn mysk ow fobel. 17Mes mar ny woslowons, my a's diwreydh yn-mes yn tien ha distrui an genedhel na, yn-medh an Arloedh.