Grogys a Lien

1Yndellma y leveris an Arloedh dhymm, ‘Ke dhe brena grogys a lien dhis, ha'y worra war dha dhiwglun, mes na'n trogh yn dowr.’ 2Ytho my a brenas grogys herwydh ger an Arloedh, ha'y worra war ow diwglun. 3Ha ger an Arloedh a dheuth dhymm an eyl prys, ow leverel, 4‘Kemmer an grogys a brensys, usi war dha dhiwglun, ha sav, ke dhe'n Ewfrates, ha'y gudha ena yn fols y'n garrek.’ 5Ytho my eth, ha'y gudha ryb an Ewfrates, par dell worhemmynnis an Arloedh dhymm. 6Hag y hwarva wosa lies dydh, an Arloedh dhe leverel dhymm, ‘Sav, ke dhe'n Ewfrates, ha kemmer an grogys alena, a worhemmynnis dhis y gudha ena.’ 7Ena my eth dhe'n Ewfrates, ha palas, ha kemmeres an grogys a'n tyller le ma'n kudhis: hag otta, an grogys o podrek, nyns o da rag travyth.

8Ena ger an Arloedh a dheuth dhymm, ow leverel: 9Yndellma y lever an Arloedh: War-lergh an vaner ma my a dhiswra goeth Yuda, ha goeth meur Yerusalem. 10An debel bobel ma, a nagh klewes ow geryow, hag a gerdh yn gorthter aga holonn, ha mos war-lergh duwow erell, ha'ga servya, ha'ga gordhya, a vydh avel an grogys ma, nag yw da rag travyth. 11Rag dell glen an grogys orth diwglun gour, yndella my re wrug oll chi Ysrael hag oll chi Yuda glena dhymm, yn-medh an Arloedh, may fons dhymm pobel, ha hanow, ha gormel, ha glori: mes ny glewsons.

Sin an Kostrels a Win

12Ytho ty a gews dhedha an ger ma: Yndellma y lever an Arloedh, Duw Ysrael: Pub kostrel a vydh lenwys gans gwin; hag i a lever dhis, ‘A dybydh na wodhon yn sertan y tegoedh pub kostrel bos lenwys gans gwin?’ 13Ena ty a lever dhedha: Yndellma y lever an Arloedh: Otta, my a wra lenwel oll annedhysi an tir ma, hwath an vyghternedh esedhys war dron Davydh, ha'n oferysi, ha'n brofoesi, hag oll annedhysi Yerusalem, gans medhwynsi. 14Ha my a's tewl an eyl erbynn y gila, hwath an tasow ha'n vebyon war-barth, yn-medh an Arloedh: ny sparyav, na kemmeres piteth, na truedh, mes aga distrui.

Godros Divroans

15Klewewgh, ha goslowewgh; na vedhewgh goethus:

rag an Arloedh re gewsis.

16Rewgh gordhyans dhe'n Arloedh agas Duw,

kyns ev dhe dhri tewolgow,

ha kyns agas treys dhe drebuchya

aga desedha war an menydhyow tewl;

ha pan esowgh ow hwilas golow,

ev a'n treyl dhe skeus ankow,

ha'y wul tewolgow down.

17Mes mar ny vynnowgh y glewes,

ow enev a wra oela yn tylleryow kevrinek drefenn agas balghder;

ha'm lagas a wra oela yn hwerow, ha resek gans dagrow,

drefenn flokk an Arloedh dhe vos kemmerys avel kethyon.

18Lavar dhe'n myghtern ha dhe vamm an myghtern,

‘Omuvelhewgh, esedhewgh:

rag kurun agas golewder

re dhiyskynnas a-dhiwar agas penn.’

19Sitys an Negeb a vydh deges,

heb denvyth dh'aga igeri:

Yuda a vydh degys dhe-ves yn divroedh,

degys vydh yn tien yn divroedh.

20Drehevewgh agas dewlagas, ha gweles

an re a dheu a'n gogledh:

ple'ma an flokk a veu res dhis,

dha flokk teg?

21Pandr'a leverydh pan y'th kessydh?

rag ty re's dyskas dhe vos dha geffrysysi,

avel penn warnas:

a ny wra gloesow dha dhalghenna,

avel gwreg yn gwelivos?

22Ha mar leverydh y'th kolonn,

‘Prag y teu an traow ma warnav?’

Rag meurder dha

gammhynseth yw diskudhys dha lostennow,

ha dha seudhelyow noeth.

23A yll an Ethiopyas chanjya y groghen,

po an lewpard y vryghi?

Ytho a yllowgh hwi ynwedh gul da,

yw usys dhe wul drog?

24Ytho my a's skatter avel an kulyn

yw hwythys gans gwyns an gwylvos.

25Homm yw dha gevrenn,

dha rann a vusuris dhis, yn-medh an Arloedh;

drefenn ty dhe'm ankevi,

ha fydhya yn gowegneth.

26Ytho my ow honan a wra drehevel dha lostennow dres dha fas,

may fydh gwelys dha veth.

27My re welas dha avoutri, ha'th kryghias,

avlander dha horyans,

dha daklow kasadow war an breow y'n gwel.

Go-jy, A Yerusalem!

Pes termyn

kyns dha vos glan?