Dydh Terroesa

1Ger an Arloedh a dheuth dhymm, ow leverel, 2Ny gemmerydh dhis gwreg, na ny's tevydh mebyon na myrghes y'n tyller ma. 3Rag yndellma y lever an Arloedh a-dro dhe'n vebyon hag a-dro dhe'n myrghes yw genys y'n tyller ma, hag a-dro dhe'n mammow a's dug, hag a-dro dhe'n tasow a's dineythis y'n tir ma: 4I a verow a glevesow marwel; ny vydh kynvann ragdha, na ny vydhons ynkleudhys; mes i a vydh avel teyl war enep an dor. Hag i a vydh distruys gans an kledha, ha gans divoetter; ha'ga horfow a vydh karyn rag ydhyn an nev ha bestes an nor.

5Rag yndellma y lever an Arloedh: Na enter yn chi an kynvann, na mos dhe alari na'ga hyni: rag my re gemmeras ow kres a-dhiworth an bobel ma, yn-medh an Arloedh, an tregeredh ha'n truedh. 6Ha'n re veur ha'n re vyghan a verow y'n tir ma: ny vydhons ynkleudhys na ny vydh kynvann ragdha, na ny wrons omhakkya na omvoelhe ragdha. 7Ny wrons terri bara rag an kyner, dhe brofya keskalar rag an den marow; na ny wra denvyth ri dhedha an hanaf a gonfort dhe eva rag aga thas po rag aga mamm. 8Ynwedh nyns edh yn chi a gevewya, dhe esedha gansa dhe dhybri ha dhe eva. 9Rag yndellma y lever Arloedh an luyow, Duw Ysrael: Otta, my a bellha dhiworth an tyller ma, yn agas dydhyow hag a-rag agas lagasow, lev lowender ha lev heudhder, lev an gour pries ha lev an venyn bries.

10Ha pan dhiskwedhydh dhe'n bobel ma oll an geryow ma, hag y leverons dhis, ‘Prag y leveris an Arloedh oll an drogedh meur er agan pynn? po pyth yw agan kammhynseth? ha pyth yw agan pegh a wrussyn erbynn an Arloedh agan Duw?’ 11ena ty a lever dhedha: Drefenn agas tasow dhe'm forsakya, yn-medh an Arloedh, ha kerdhes gans duwow erell, ha'ga servya i, ha'ga gordhya i, ha'm forsakya, ha ny withsons ow lagha; 12ha hwi re omdhug gweth ages agas tasow; rag otta, hwi a gerdh peub herwydh gorthter y golonn dhrog, ow nagha goslowes orthiv. 13Ytho my a's tewl yn-mes a'n tir ma bys yn tir na aswonnowgh, naneyl hwi na'gas tasow, hag ena hwi a wra servya duwow erell dydh ha nos; rag ny gemmerav truedh ahanowgh.

Duw a Dhaswra Ysrael

14Rakhenna otta, an dydhyow a dheu, yn-medh an Arloedh, pan na vydh leverys namoy, ‘Dell vew an Arloedh, a dhros mebyon Ysrael yn-mes a bow Ejyp’; 15Mes, ‘An Arloedh a vew, a dhros mebyon Ysrael a dir an gogledh, hag a diryow oll ma's fesyas’; ha my a's dre arta dhe'n tir a res dh'aga thasow.

16Otta, my a dhannvon war-lergh lies pyskador, yn-medh an Arloedh, hag i a wra aga hachya; hag a-wosa my a dhannvon lies helghor, hag i a's helgh a-dhiworth pub menydh ha pub bre, hag yn-mes a folsyow an kerrek. 17Rag yma ow dewlagas war oll aga fordhow: nyns yns kudhys a'm golok, na nyns yw aga hammhynseth kudhys a'm dewlagas. 18Hag yn kynsa my a attal rag aga hammhynseth ha'ga fegh yn tewblek; drefenn i dhe dhefola ow thir gans korfow aga idolys, ha lenwel ow eretons gans aga thaklow kasadow.

19A Arloedh, ow nerth,

hag ow skons, ha'm skovva yn dydh an galar,

an kenedhlow a wra dos dhis

a-dhiworth pennow an nor, ha leverel:

Yn sur agan tasow re eritas gowyow,

euveredh ha traow heb les.

20A yll den gul duwow dh'y honan?

Nyns yw an re ma duwow!

21‘Ytho, otta, an unn prys ma my a wra dhedha aswonn, my a wra dhedha aswonn ow leuv ha'm nerth; hag i a wra godhvos bos ow hanow an Arloedh.’