Pegh Yuda

1Pegh Yuda yw skrifys gans toul-skrifa a horn, ha gans poynt a adamant gravys yw war legh aga holonn, ha war gern agas alteryow, 2rag bos aga mebyon ow perthi kov a'ga alteryow ha'ga Asherim ryb an gwydh glas war an breow ughel, 3ha war an menydhyow y'n mes. Dha wolusogneth ha'th tresoryow oll y rov dhe breydh, avel gober rag pegh, yn oll dha diryow.17:3 Amendys. Gwel Yeremia 13:27, ha 15:13, 14. Ebrow Ow menydhyow y'n mes, dha nerth, oll dha dresoryow y rov dhe breydh; dha tylleryow ughel gans pegh yn oll dha oryon. 4Ha ty a lews dha leuv dhiworth dha eretons a res dhis; ha my a'th wra dhe servya dha eskerens y'n tir na aswonnydh: rag an tan re enowsowgh y'm sorr, a lesk bys vykken.

5Yndellma y lever an Arloedh:

Milliges vydh an gour a fydh yn den,

ha gul kig y nerth,

ha may treyl y golonn a-dhiworth an Arloedh.

6Ev a vydh avel merywenn y'n difeyth,

ha ny wel pan dheu dader;

mes trigys vydh yn tylleryow krin an difeyth,

yn tir hoelanek nag yw annedhys.

7Benniges yw an gour a fydh y'n Arloedh,

may ma y fydhyans y'n Arloedh.

8Rag ev a vydh avel gwydhenn plynsys ryb dowr,

ow lesa hy gwreydh ryb an dowrhyns,

mes ny berth own pan dheu an toemmder,

mes hy delyow a vydh glas;

hag yn blydhen syghor ny'n jevydh fienasow,

na ny hedh a dhoen frut.

9An golonn yw fel dres pup-tra,

ha drog dres remedi:

piw a's aswonn?

10My an Arloedh a hwither an golonn,

ha previ an dhiwloneth,

dhe ri dhe beub herwydh y fordhow,

ha herwydh frut y oberow.

11Dell esedh an rugyar, heb gori;

yndellma yw an re a wayn golusogneth, heb ewnder;

yn hanter y dhydhyow hi a'n gas,

hag yn y dhiwedh ev a vydh foll.

12Tron gloryus, ughel a'n dallethvos

yw tyller agan sentri.

13A Arloedh, govenek Ysrael,

peub a'th forsak a vydh methek,

ha'n re a dreyl a-dhiworthiv a vydh skrifys y'n dor,

drefenn i dhe forsakya fenten an dowrow bew, an Arloedh.

14Yaghha vy, A Arloedh, ha my a vydh yaghhes;

salw vy ha my a vydh selwys:

rag ty yw ow gormel.

15Ottensi ow leverel dhymm,

‘Ple'ma ger an Arloedh?

Des lemmyn!’

16Mes my, ny fistenis a vones bugel dhe'th siwya,17:16 ny fistenis a vones bugel dhe'th siwya: Po amendyans ny wrug vy ynnia warnas dri drog.

na ny hwensis dydh an anfeusi;

ty a woer: an pyth a dheuth a'm diwweus

a veu a-rag dha wolok.

17Na vydh browagh dhymm:

ty yw ow skovva yn dydh an drogedh.

18Bedhens methek an re a'm helgh,

mes na'm gas vy dhe vos methek:

gas i dhe vos dyegrys,

mes na as vy dhe vos dyegrys;

dro warnedha dydh an drogedh

ha'ga distrui gans distruyans dewblek.

Ow Sanshe an Sabot

19Yndellma y leveris an Arloedh dhymm: Ke ha sevel yn yet mebyon an bobel, dredhi mayth enter myghternedh Yuda, ha dredhi mayth ons yn-mes, hag yn yetow oll Yerusalem, 20ha lever dhedha: Klewewgh ger an Arloedh, hwi vyghternedh Yuda, hag oll Yuda, hag oll annedhysi Yerusalem, a enter der an yetow ma. 21Yndellma y lever an Arloedh: Gwaytyewgh, rag agas enevow, na dhegewgh begh yn dydh an sabot, na'y dri dre yetow Yerusalem; 22na na dhegewgh begh yn-mes a'gas chi y'n sabot, na na wrewgh ober, mes sanshewgh dydh an sabot, dell worhemmynnis dh'agas tasow. 23Mes ny woslowsons, na plegya aga skovarn, mes kaleshe aga gilbenn, ma na glewsons, na degemmeres dyskybleth.

24Mes mar koslewowgh orthiv, yn-medh an Arloedh, ha mar ny dhegewgh begh dre yetow an sita yn dydh an sabot, mes sanshe dydh an sabot, heb gul ober vytholl ynno, 25ena yth enter dhe yetow an sita ma myghternedh ha pennsevigyon esedhys war dron Davydh, ow marghogeth yn charettow ha war vergh, i ha'ga fennsevigyon, gwer Yuda, hag annedhysi Yerusalem; ha'n sita ma a vydh annedhys bys vykken. 26Hag i a wra dos a-dhiworth sitys Yuda, ha'n tylleryow a-dro dhe Yerusalem, hag a-dhiworth tir Benyamin, ha'n Shefela, hag a'n vro venydhyek, hag a'n dhyghowbarth, ow tri offrynnow leskys, ha sakrifisow, hag offrynnow greun, ha frankynkys, hag ow tri sakrifisow gormel, bys yn chi an Arloedh. 27Mes mar ny woslewowgh orthiv, dhe sanshe dydh an sabot, ha ma na degowgh begh owth entra dhe yetow Yerusalem ganso yn dydh an sabot, ena my a enow tan yn hy yetow hag y hwra distrui palesyow Yerusalem, ha ny vydh difeudhys.