Duw a Bled gans Ysrael dhe Goedha yn Edrek

1Ha ger an Arloedh a dheuth dhymm, ow leverel, 2Ke ha kria yn skovornow Yerusalem, ow leverel, Yndellma y lever an Arloedh:

My a berth kov ahanas, lelder dha yowynkneth,

dha gerensa avel benyn bries nowydh,

pan ythys war ow lergh y'n gwylvos,

yn tir na veu gonedhys.

3Ysrael o sansoleth dhe'n Arloedh,

ha kynsa frut y askorr:

kablus o peub a'n devorya;

drog a dheu warnedha,

yn-medh an Arloedh.

4Klewewgh ger an Arloedh, A ji Yakob, hag oll teyluyow chi Ysrael: 5Yndellma y lever an Arloedh

Pana dhrogober re gavas aga thasow ynnov,

mayth ens gyllys pell ahanav,

ha may kerdhsons war-lergh euveredh, ha devedhys ha bos euver vons?

6Ha ny lavarsons, ‘Ple'ma an Arloedh

a'gan dros yn-mes a bow Ejyp,

a'gan hembronkas der an gwylvos,

dre dir a dhifeythtiryow hag a byttow,

dre dir a syghor, hag a skeus ankow

dre dir ma na dremenas gour,

ha le nag eus trigys den?’

7Ha my a'gas dros yn tir feyth,

dhe dhybri an frut anodho ha'n dader anodho;

mes pan entersowgh, hwi a dhefolas ow thir,

ha gul ow eretons tra gasadow.

8Ny leveris an oferysi, ‘Ple ma an Arloedh?’

Ha ny'm aswonni an re a dhyght an lagha:

an vugeledh ynwedh a dreuspassyas er ow fynn,

ha'n brofoesi a brofoesas yn hanow Baal,

ha kerdhes war-lergh taklow nag yw dhe les.

9Rakhenna hwath my a bled genowgh,

yn-medh an ARLOEDH,

ha gans fleghes agas fleghes my a bled.

10Rag tremenewgh ynysow Kittim, ha gweles;

ha dannvenewgh bys Kedar, hag ombrederi yn tiwysyk,

ha gweles mar peu bythkweth tra a'n par ma.

11A janjyas kenedhel hy duwow,

kyn na vons duwow?

Mes ow fobel re janjyas hy golewder

rag an pyth nag yw dhe les.

12Bedhes euth genowgh, hwi nevow, orth hemma;

perthewgh own bras, bedhewgh pur dhyegrys,

yn-medh an Arloedh,

13rag ow fobel re wrug dew dhrogedh;

i re'm eskasas,

an fenten a dhowrow bew,

ha treghi yn-mes dowrarghow,

dowrarghow terrys

na yll synsi dowr.

14Yw Ysrael servont? Yw ev keth genys tre?

Prag yth yw ev devedhys ha bos preydh?

15An lewyon yowynk a vedhyglas warnodho,

hag usa:

i re wastyas y dir:

y sitys yw leskys, heb annedhyas.

16Ynwedh mebyon Nof Tahpanhes

re dorras kurun dha benn.

17A ny wrussys dri hemma warnas dha honan,

rag ty dhe eskasa an Arloedh dha Dhuw,

pan esa orth dha hembronk y'n fordh?

18Ha lemmyn pandr'a amont dhis mos y'n fordh dhe Ejyp,

dhe eva dowrow Shihor?2:18 Shihor: Ger ejyptek yw dhe styrya poll Horus, lavar a skorn rag an Nil.

po pandr'a amont dhis mos y'n fordh dhe Assyria,

dhe eva dowrow an avon?

19Dha dhrogedh dha honan a'th keredh,

ha'th weythresow dislel a'th chasti:

godhvydh ytho ha gweles y vos drog ha hwerow,

ty dhe eskasa an Arloedh dha Dhuw,

ha ma nag eus ow own ynnos,

yn-medh an Arloedh, Duw an luyow.

20Rag nans yw pell ty a dorras dha yew,

ha tardha dha rawyow;

ha ty a leveris, ‘Ny wrav vy servya’;

rag war bub bre ughel hag yn-dann bub gwydhenn las

ty a wandras, owth horya.

21My a'th blansas avel gwinbrenn bryntin,

yn tien a hasenn bur:

fatell osta ytho treylys dhymm yn plans legrys,

gwinbrenn estren?

22Rag kynth omwolghydh gans natron2:22 natron: Moen hoelanek gans lies us. Y'n kas ma, devnydhys rag golghi. Gwel ynwedh Lavarow Koth 25:20.,

ha kemmeres dhis meur a sebon,

hwath dha anewnder a bes avel mostenn a-ragov,

yn-medh an Arloedh Duw.

23Fatell yllydh leverel, ‘Nyns ov defolys,

nyns idh war-lergh Baalim’?

Gwel dha fordh y'n nans,

godhvydh an pyth a wrussys:

kasek-kowrvargh skav ow poenya a-dro yn hy fordhow;

24kasek-asen gwyls usys dhe'n gwylvos,

ow frikhwytha an gwyns yn hy flesour:

pan yw hi leusik, piw a's fronn?

Ny omskwith myns a's hwila;

yn hy mis i a's kyv.

25Gwith dha droes rag bos dieskis,

ha'th vryansenn rag syghes:

mes ty a leveris, ‘Nyns eus govenek,

rag my re garas estrenyon,

ha war aga lergh yth av.’

26Dell vydh meth dhe'n ladher pan vydh kevys,

yndellma y fydh meth dhe ji Ysrael:

i, aga ruwyon, aga fennsevigyon,

ha'ga oferysi, ha'ga frofoesi;

27neb a leverel dhe wydhenn, ‘Ty yw ow thas’;

ha dhe ven, ‘Ty a'm dineythis.’

Rag i re dreylyas aga heyn dhymm,

a-der aga fas:

mes yn termyn aga ahwer i a lever,

‘Sev, ha saw ni.’

28Mes ple'ma dha dhuwow

a wrussys dhe'th honan?

Gas dhedha sevel, mar kyllons dha selwel

yn termyn dha ahwer:

rag war-lergh niver dha sitys

yw dha dhuwow, A Yuda.

29Prag y krodhvolowgh warnav?

Hwi oll re dreuspassyas er ow fynn,

yn-medh an Arloedh.

30Yn euver my re weskis agas fleghes;

ny dhegemmersons dyskybleth.

Agas kledha agas honan re dhevoryas agas profoesi,

avel lew ow tistrui.

31A henedh, gwelewgh ger an Arloedh.

A veuv gwylvos dhe Ysrael,

po tir a dewlder?

Ytho prag y lever ow fobel, ‘Ni yw rydh dhe wandra;

ny dheun dhis namoy’?

32A yll maghteth ankevi hy thegennow,

po benyn bries hy gwisk?

Mes ow fobel re'm ankovas,

dydhyow heb niver.

33Fatell bareussys dha fordh yn ta

dhe hwilas kerensa!

Dhe venynes dhrog hogen

ty re dhyskas dha fordhow.

34Ynwedh y'th lostennow y fydh kevys

goes-bewnans an voghosogyon ankablus:

ny's kevsys ow terri yn chiow.

Mes yn spit dhe henna oll

35ty a lever, ‘Ankablus ov;

yn sur y sorr a wra treylya a-dhiworthiv.’

Otta, my a wra dha vreusi,

drefenn ty dhe leverel, ‘Ny beghis.’

36Prag yth yw trufel y'th wolok

chanjya dha fordh?

Ty a' fydh meth a Ejyp ynwedh,

dell y'th o meth a Assyria.

37Ye, ty a wra mos yn-rag a-dhiworto,

ha'th diwla war dha benn:

rag an Arloedh re dhenaghas an re a drestydh ynna,

ha ny sewenydh dredha.