Ynnians dhe Gemmeres Edrek

1Yndellma y lever an Arloedh: Ke yn-nans dhe ji myghtern Yuda ha kewsel ena an ger ma, 2ha lavar, Klew ger an Arloedh, A vyghtern Yuda esedhys war dron Davydh, ty ha'th servysi ha dha bobel neb a enter a-ji dhe'n yetow ma: 3Yndellma y lever an Arloedh: Gwrewgh gwirvreus hag ewnder, ha delivrewgh a-dhiworth dorn an arwasker an den a veu dalghennys. Ha na wrewgh kammhynseth na freudh dhe'n alyon, an omdhivas, na'n wedhwes, po skoellya goes gwiryon y'n tyller ma. 4Rag mar kwrewgh herwydh an ger ma, ena a-ji dhe yetow an chi ma myghternedh a enter neb a esedh war dron Davydh, ow marghogeth yn charettow ha war vergh, i ha'ga servysi, ha'ga fobel 5Mes mar ny woslewowgh orth an geryow ma, my a de re'm honan, yn-medh an Arloedh, y fydh an chi ma magor. 6Rag yndellma y lever an Arloedh a-dro dhe ji myghtern Yuda:

Ty yw avel Gilead dhymm,

avel penn Lebanon;

byttegyns my a'th wra difeyth,

sitys anannedhys.

7Ha my a bareus distruoryon er dha bynn,

peub gans y arvow;

i a derr dha geder dewisys

ha'ga thewlel y'n tan.

8Ha lies kenedhel a dremen an sita ma, ha leverel an eyl dh'y gila, ‘Prag y hwrug an Arloedh yndellma dhe'n sita veur ma?’ 9Ena i a worthyp, Drefenn i dhe asa kevambos an Arloedh aga Duw ha gordhya duwow erell, ha'ga servya.

10Na oelewgh rag an marow,22:10 an marow: henn yw myghtern Yosia.

na kyni ragdho;

mes oelewgh ragdho ev22:10 ragdho ev: Shallum mab Yosia. neb a yn-mes,

rag ny dhehwel namoy,

na gweles tir y enesigeth.

Breus erbynn Myghternedh Dhrog

11Rag yndellma y lever an Arloedh a-dro dhe Shallum mab Yosia myghtern Yuda a reynyas yn le Yosia, hag eth yn-mes a'n tyller ma; ny dhehwel omma arta, 12mes ev a verow y'n tyller ma'n dugons yn keth, ha ny wel an tir ma namoy.

13Go-ev a dhrehav y ji dre anewnder,

ha'y jambouryow dre gammhynseth;

neb a wra dh'y gentrevek lavurya heb gober,

heb ri travyth dhodho rag y lavur;

14neb a lever, ‘My a dhrehav dhe'm honan chi efan

gans chambouryow gwarthav ledan’,

hag a dregh fenestri ragdho,

ha'y nen a gederwydh,

hag urys gans vermeyl.

15A wre'ta reynya

drefenn ty dhe dhrehevel gans keder moy es dell wra tus erell?

A ny wrug dha das dybri hag eva,

ha gul gwirvreus hag ewnder?

Ena yth o da ganso.

16Ev a varnas ken an boghosek ha'n edhommek;

hag ena yth o da ganso.

A nyns yw hemma ow aswonn?

yn-medh an Arloedh.

17Mes nyns yw dha dhewlagas ha'th kolonn

marnas rag gwayn anewn,

ha rag skoellya goes gwiryon,

ha rag gul arwask ha freudh.

18Ytho, yndellma y lever an Arloedh a-dro dhe Yehoyakim mab Yosia myghtern Yuda:

Ny alarons ragdho, ow leverel,

‘Ogh ow broder!’ po ‘Ogh ow hwoer!’

Ny alarons ragdho,

ow leverel, ‘Ogh arloedh!’ po, ‘Ogh y veuredh!’

19Ev a vydh ynkleudhys gans ynkleudhyans asen,

draylys yn-rag ha tewlys a-ves dhe yetow Yerusalem.

20Yskynn bys yn Lebanon ha kri;

ha drehav dha lev yn Bashan,

kri a-dhiworth Abarim;

rag oll dha garoryon yw distruys.

21My a gewsis er dha bynn y'th sewena,

mes ty a leveris, ‘Ny woslowav.’

Hemma re beu dha fordh a'th yowynkneth,

rag ny woslewsys orth ow lev.

22An gwyns a dheber oll dha vugeledh,

ha dha garoryon a yn kethneth;

ena ty a' fydh meth ha disenor

drefenn dha dhrogedh.

23A annedhyades Lebanon

neythys y'n kederwydh,

assa wre'ta kyni pan dheu gloesow warnas,

poen avel gwreg yn gwelivos!

Breus erbynn Konia

24Dell vewav, yn-medh an Arloedh, kyn fe Konia mab Yehoyakim myghtern Yuda bysow ow leuv dhyghow, hwath alena my a'th torrsa 25ha dha ri yn dorn an re a hwila dha vewnans, hag yn dorn an re a berthydh own anedha – yn dorn Nebukadnessar myghtern Babylon, hag yn dorn an Kaldeanys. 26Ha my a'th tewl yn-mes, ha'th vamm a'th dineythis, bys yn pow arall, le ma na veus dineythys, hag ena ty a verow. 27Mes ny dhehwelons dhe'n tir may yeunons dehweles dhodho.

28Yw an gour ma, Konia, pott pri terrys,

lester ma nag eus plesour ynno?

Prag yth yns tewlys yn-mes, ev ha'y has,

ha tewlys yn tir na aswonnons?

29A dor, dor, dor,

klew ger an Arloedh.

30Yndellma y lever an Arloedh,

Skrifewgh an gour ma avel anvap,

gour na sewen yn y dhydhyow;

rag ny sewen nagonan a'y has,

dhe esedha war dron Davydh,

na rewlya arta yn Yuda.