Figys Da ha Drog

1An Arloedh a dhiskwedhas dhymm, hag otta, dew ganstell a figys a veu gorrys a-rag tempel an Arloedh wosa Nebukadnessar myghtern Babylon dhe dhoen yn divroedh Yekonia mab Yehoyakim myghtern Yuda, ha pennsevigyon Yuda, gans an seri prenn ha'n wovyon, a-dhiworth Yerusalem, ha'ga dri dhe Babylon. 2Unn ganstell a'n jevo figys pur dha, avel figys yw kynsa adhves, mes an ganstell arall a'n jevo figys pur dhrog, mar dhrog ma ny yllens bos dybrys. 3Ena an Arloedh a leveris dhymm, ‘Pandr'a welydh, Yeremia?’ Ha my a leveris, ‘Figys; an figys da, pur dha; ha'n re drog, pur dhrog, mar dhrog ma na yllens bos dybrys.’

4Ena ger an Arloedh a dheuth dhymm, ow leverel: 5Yndellma y lever an Arloedh, Duw Ysrael: Avel an figys da ma, yndella my a aswonn an dhivresow a Yuda, hag a dhannvenis yn-mes a'n tyller ma dhe bow an Kaldeanys rag aga les. 6Rag my a sett ow golok warnedha rag da, ha my a's dre arta dhe'n tir ma. My a's drehav, ha ny's tennav dhe'n dor; my a'ga flans, ha ny's diwreydhyav. 7Ha my a re kolonn dhedha dhe'm aswonn, ow bos an Arloedh; hag i a vydh ow fobel, ha my a vydh aga Duw, rag i a dhehwel dhymm gans oll aga holonn.

8Hag avel an drog figys na yll bos dybrys rag aga bos mar dhrog, yn-medh an Arloedh, yndella y hwrav dhe Sedekia myghtern Yuda, ha'y bennsevigyon ha remenant Yerusalem yw gesys y'n tir ma, ha'n re usi trigys yn pow Ejyp. 9My a wra dhedha bos euth, pyth drog, yn oll gwlaskordhow an nor, dhe vos keredh ha droglavar, tont ha molleth yn oll an tylleryow ma's fesyav. 10Ha my a dhannvon an kledha, divoetter, ha'n pla yntredhon, bys pan vydhons distruys yn tien a'n tir a res dhedha ha dh'aga thasow.