Ysrael Dislel

1Mar korr gour y wreg a-denewen,

ha hi a'n gas,

ha dos ha bos dhe gen gour,

a wra ev dehweles dhedhi?

A ny via an tir na defolys meur?

Mes ty re horyas gans lies karer;

hwath y fynnydh dehweles dhymm?

yn-medh an Arloedh.

2Drehav dha dhewlagas dhe'n ugheldiryow moel, ha mir:

ple na wrowedhsons genes?

Ty a esedhas ragdha y'n fordhow

kepar ha'n Arab y'n gwylvos;

ha ty re dhefolas an tir

gans dha horyans ha'th trogedh.

3Rakhenna an kowasow re beu skonys,

ha ny dheuth an glaw diwedhes;

ha ty a'th o tal hora,

ty a naghas kemmeres meth.

4A ny wruss'ta kria warnav nammnygen,

‘Ow Thas, ty yw koweth ow yowynkneth –

5A vydh ev serrys bys vykken?

A wra ev gwitha y sorrvann dhe'n diwedh?’

Yndella ty re gewsis;

mes ty re wrug oll an drogedh a yllsys.

Galow dhe Edrega

6An Arloedh a leveris dhymm ynwedh yn dydhyow Yosia an myghtern: A welsys an taklow dislel a wrug Ysrael? Hi yw yskynnys war bub menydh ughel hag yn-dann bub wydhenn las, hag ena hi re horyas. 7Ha my a leveris, ‘Wosa hi dhe wul oll an traow ma, Martesen hi a dhehwel dhymm’; mes ny dhehwelis hi. Ha'y hwoer draytus Yuda a'n gwelas. 8Ha hi a welas, rag oll avoutri Ysrael dhislel, my dh'y gorra dhe-ves gans skrifenn didhemmedhyans; hwath hy hwoer draytus Yuda ny's teva own, mes hi ynwedh eth dhe horya. 9Hag y hwarva drefenn skavder hy horyans, hi dhe dhefola an tir, ha gul avoutri gans men ha gans prenn. 10Mes yn spit dhe oll hemma, ny dreylyas hy hwoer draytus Yuda dhymm gans oll hy holonn, mes yn fayntys, yn-medh an Arloedh.

11Ha'n Arloedh a leveris dhymm, Ysrael dislel re omdhiskwedhas le kablus ages Yuda draytus. 12Ke ha deklar an geryow ma dhe'n gogledh, ha leverel,

Dehwel ty Ysrael dhislel,

yn-medh an Arloedh;

ny wrav ow sorr dhe goedha warnas:

rag tregeredhus ov,

yn-medh an Arloedh,

ha ny withav sorr bys vykken.

13Mes unnweyth aswonn dha dhrogober,

may treuspassys erbynn an Arloedh dha Dhuw,

ha may resys dha honan yn hel dhe estrenyon yn-dann bub gwydhenn las,

ha ny woslewsowgh orth ow lev,

yn-medh an Arloedh.

14Treylyewgh, hwi fleghes dislen,

yn-medh an Arloedh,

rag my re'gas demmedhis:3:14 my re'gas demmedhis: Po my yw agas mester – gwari war hanow an duw pagan Baal.

my a'gas kemmer, onan a sita, ha dew a deylu,

ha my a'gas dre dhe Sion:

15Ha my a re dhywgh bugeledh herwydh ow holonn, hag i a'gas mag gans godhvos ha konvedhes. 16Hag y hwyrvydh, pan vydhowgh palshes ha kressys y'n tir, y'n dydhyow na, yn-medh an Arloedh, ny leverons moy, ‘Argh kevambos an Arloedh.’ Ny dheu y'n brys; na ny vydh kovhes; na ny vynnons y visitya namoy; na ny vydh henna gwrys arta.3:16 na ny vydh henna gwrys arta: Po na ny vydh onan arall gwrys. 17Y'n termyn na i a elow Yerusalem Tron an Arloedh; hag oll an kenedhlow a vydh kuntellys dhedhi, dhe hanow an Arloedh yn Yerusalem: ha ny holyons yn hworth namoy aga thebel golonn. 18Y'n dydhyow na chi Yuda a wra kerdhes gans chi Ysrael, hag i a dheu war-barth yn-mes a dir an gogledh dhe'n tir a res rag eretons dh'agas tasow.

19Mes my a leveris,

Fatell wrav vy dha worra yn mysk ow mebyon,

ha ri dhis tir plegadow,

an tekka ertach a'n kenedhlow oll?

Ha my a leveris, Ty a'm galow, Ow thas;

ha ny dreylydh arta ahanav.

20Yn sur dell dhiberth gwreg yn traytus a-dhiworth hy gour,

yndellma hwi re beu dislel dhymm, A ji Ysrael,

yn-medh an Arloedh.

21Lev a veu klewys war an ugheldiryow moel,

oelva ha pysadow mebyon Ysrael,

rag i re gammdreylyas aga fordh,

hag i re ankovas an Arloedh aga Duw:

22Dehwelewgh, hwi vebyon dhislen,

ha my a yaghha agas dislelder.

‘Otta, ni a dheu dhis:

rag ty yw an Arloedh agan Duw.

23Yn hwir euver yw toell an breow,

ha tervans an menydhyow:

yn hwir y'n Arloedh agan Duw

yma selwyans Ysrael.

24‘Rag meth re dhevoryas lavur agan tasow a-dhia agan yowynkneth; aga flokkys ha'ga greow, aga mebyon ha'ga myrghes. 25Ni a wrowedh yn agan meth, ha'gan despit a'gan kudh: rag ni re beghas erbynn an Arloedh agan Duw, ni ha'gan tasow, a-dhia agan yowynkneth ha hwath bys y'n jydh ma, ha ny obayson lev an Arloedh agan Duw.’