Ambos a Restorita rag Ysrael ha Yuda

1An ger hag a dheuth dhe Yeremia a-dhiworth an Arloedh, ow leverel: 2Yndellma y lever an Arloedh, Duw Ysrael, ow leverel: Skrif oll an geryow ma re gewsis dhis yn lyver. 3Rag, otta, an dydhyow a dheu, yn-medh an Arloedh may treylav kethneth ow fobel Ysrael ha Yuda, yn-medh an Arloedh, ha my a's dre arta dhe'n tir a res dh'aga thasow, hag i a's pew.

4Hemm yw an geryow a gewsis an Arloedh a-dro dhe Ysrael ha Yuda.

5Rag yndellma y lever an Arloedh:

Ni re glewas kri a skruth,

own a-der kres.

6Govynnewgh lemmyn

ha mirewgh, a yll gour dineythi flogh?

Ytho prag y hwelav pub gour ha'y dhiwleuv war y dhiwglun

avel benyn yn gwelivesi,

ha pub fas treylys gwannliwek?

7Eghan! rag meur yw an jydh na,

ma nag eus onan haval dhodho:

termyn ahwer yw rag Yakob;

mes ev a vydh sawys anodho.

8Rag y'n jydh na, yn-medh Arloedh an luyow, my a derr an yew a'th konna, ha my a dardh dha rawyow, ha ny wra estrenyon aga gul yn kethyon namoy. 9Mes i a serv an Arloedh aga Duw ha Davydh aga myghtern, hag a dhrehevav ragdha.

10Ytho na borth own, ow gwas Yakob, yn-medh an Arloedh,

na na vydh digolonnek, A Ysrael;

rag otta, my a'th selow a bellder,

ha'th has a-dhiworth tir aga hethneth;

ha Yakob a dhehwel ha powes ha bos kosel,

ha ny wra nagonan gorra own ynno.

11Rag yth esov genes, yn-medh an Arloedh, dhe'th selwel;

my a wra leun dhiwedh dhe'n kenedhlow oll

le ma'th skattris,

mes ny wrav leun dhiwedh ahanas.

My a'th keredh yn musur ewn,

ha ny'th asav yn tien ankessydhys.

12Rag yndellma y lever an Arloedh:

Ny yll dha vrew bos yaghhes,

ha'th woli yw ankensi.

13Nyns eus nagonan dhe bledya dha gen,

medhegneth vyth dhe'th woli,

yaghheans vyth ragos.

14Oll dha garoryon re'th ankovas;

ny'th hwilons

rag my re'th holyas gans goli eskar,

gans keredh a dhen fell,

drefenn bos meur dha anewnder,

drefenn dha beghosow dhe ynkressya.

15Prag y kriydh drefenn dha derroes?

Heb remedi yw dha bayn

Drefenn bos meur dha anewnder,

drefenn dha beghosow dhe ynkressya,

my re wrug an traow ma dhis.

16Ytho oll an re a'th tevor a vydh devorys,

ha'th eskerens, peub anedha a wra mos yn divroedh;

an re a'th pyll a vydh pyllys,

hag oll an re a breydh warnas my a wra preydh.

17Rag my a asver yeghes dhis,

ha my a yaghha oll dha woliow,

yn-medh an Arloedh,

drefenn i dhe'th henwel gal, ow leverel:

‘Sion yw; denvyth ny's hwila!’

18Yndellma y lever an Arloedh:

Otta, my a dreyl kethneth tyldow Yakob,

ha kemmeres tregeredh war y annedhow;

ha'n sita a vydh drehevys war y grug,

ha'n palys a sev yn y le ewn.

19Hag yn-mes anedha y teu grasyans

ha lev an re a lowenha.

My a's liesha, ha ny vydhons boghes;

my a's enor, ha ny vydhons iselhes.

20Aga mebyon a vydh avel kyns,

ha'ga huntelles a vydh fastys a-ragov,

ha my a gessydh kemmys a's arwask.

21Ha'ga fennsevigyon a vydh kemmerys a'ga honan,

ha'ga governour a dheu a'ga mysk;

my a'n dre yn ogas, hag ev a dheu nes dhymm,

poken piw a vedha nesa dhymm?30:21 poken piw a vedha nesa dhymm? Ebrow rag piw a rolla y golonn dhe dhos nes dhymm?

yn-medh an Arloedh.

22Ha hwi a vydh ow fobel,

ha my a vydh agas Duw.

23Otta, korwyns an Arloedh!

konnar ow mos yn-mes,

korwyns ow rosella:

troyllya a wra war benn an debeles.

24Ny dreyl konnar fers an Arloedh dhe-ves

bys pan gollanwo ha kowlwul

towlow y golonn.

Y'n dydhyow diwettha hwi a gonvedh hemma.