An Divresow a Dhehwel

1Dhe'n keth termyn, yn-medh an Arloedh, my a vydh Duw oll teyluyow Ysrael, hag i a vydh ow fobel.

2Yndellma y lever an Arloedh:

An bobel a veu gesys a'n kledha

a gavas favour y'n gwylvos;

hwath Ysrael pan hwilas powes,

3an Arloedh a omdhiskwedhas dhodho31:3 dhodho: Ow siwya an Septuagint. Ebrow dhymm. a-bell:

My re'th karas gans kerensa heb diwedh;

ytho gans tregeredh my re'th tennas.

4Arta my a'th trehav, ha ty a vydh drehevys,

A wyrghes Ysrael!

ty a vydh tekhes arta gans dha dabourigow,

ha mos yn-rag yn dons an re lowen.

5Arta ty a blans gwinlannow

war venydhyow Samaria;

an blansoryon a blans

ha dybri an frut.

6Rag y fydh dydh

pan elow an woelyadoryon war vro venydhyek Efraym:

‘Sevewgh, ha deun yn-bann dhe Sion,

dhe'n Arloedh agan Duw.’

7Rag yndellma y lever an Arloedh:

Kenewgh gans lowena rag Yakob,

ha drehevewgh garmow rag chyf an kenedhlow;

gwarnyewgh, gormelewgh, ha leverel,

‘A Arloedh, saw dha bobel,

remenant Ysrael.’

8Otta, my a's dre a dir an gogledh,

ha'ga huntell a-dhiworth pella rannow an nor,

ha gansa an dall ha'n evredhek,

an venyn veghyek ha'n venyn usi yn gwelivesi;

kowethas meur a dhehwel omma.

9I a dheu yn-dann dhagrewi,

ha gans konfort my a's hembronk,

my a wra dhedha kerdhes ryb frosow dowr,

yn fordh leven le ma na drebuchyons;

rag my yw tas dhe Ysrael,

hag Efraym yw ow hynsa-genys.

10Klewewgh ger an Arloedh, hwi genedhlow,

ha'y dhisklerya dhe'n ynysow pell;

leverewgh, ‘Ev neb a skattras Ysrael a wra y guntell,

ha'y witha par dell wra an bugel y flokk.’

11Rag an Arloedh re dhasprenas Yakob,

ha'y dhelivra a leuv re grev ragdho.

12Ytho i a dheu ha kana yn ughel war ughelder Sion,

ha splanna drefenn dader an Arloedh,

drefenn an greun, ha'n gwin ha'n oyl,

ha re yowynk an flokk, ha'n gre;

aga bewnans a vydh avel lowarth dowrhes,

ha ny vydhons digolonnek namoy.

13Ena an wyrghes a lowenha y'n dons,

ha'n wer yowynk ha'n henavogyon a vydh lowen,

my a's hebaskha,

ha ri dhedha lowena yn le aga hynvann.

14Ha my a lenow enev an oferysi gans blonek

ha'm pobel a vydh gwalghys gans ow dader,

yn-medh an Arloedh.

15Yndellma y lever an Arloedh:

Lev yw klewys yn Rama,

kynvann hag oelva hwerow.

Yma Raghel owth oela rag hy fleghes;

hi a nagh bos konfortys rag hy fleghes

drefenn nag esons na fella.

16Yndellma y lever an Arloedh:

Gwith dha lev rag oela,

ha'th tewlagas rag dagrow;

rag dha ober a vydh gobrys,

yn-medh an Arloedh:

i a dhehwel a-dhiworth tir an eskar;

17yma govenek y'th tiwedh,

yn-medh an Arloedh:

dha fleghes a dhehwel dh'aga bro aga honan.

18Yn hwir my re glewas Efraym ow pledya:

‘Ty a'm kessydhyas, ha my a gemmeras an geredh,

avel lodhen na veu dyskys dhe'n yew.

Treyl dhymm, ha my a vydh treylys,

rag ty yw an Arloedh ow Duw.

19Rag wosa my dhe dreylya, my a goedhas yn edrek,

ha wosa my dhe vos dyskys, my a weskis ow mordhos;

meth a'm bo ha my a veu iselhes,

drefenn my dhe dhoen keredh ow yowynkneth.’

20Yw Efraym ow mab ker?

Yw ev flogh may ma delit dhymm ynno?

Rag a-ban gewsis er y bynn

my a berth kov anodho hwath.

Ytho ow holodhyon a veu movys ragdho;

yn sur y kemmerav truedh anodho,

yn-medh an Arloedh.

21Drehav arwoedhyow-fordh,

gwra dhis postow kevarwoedh;

gorr dha golonn troha'n fordh-veur,

an fordh mayth ythys.

Treyl arta, A wyrghes Ysrael,

treyl arta dhe'n sitys ma usi dhis.

22Pes termyn a hokydh,

A vyrgh dhislel?

Rag an Arloedh re greatyas tra nowydh y'n nor:

Benyn a dhifres gour.

23Yndellma y lever Arloedh an luyow, Duw Ysrael: I a wra devnydh a'n geryow ma arta yn pow Yuda ha'y threvow, pan y's trov arta dhiworth kethneth:

‘Re'th vennikko an Arloedh, A drigva ewnder,

menydh gwiryonedh!’

24Hag y fydh trigys yn Yuda y honan hag oll y sitys, gonedhogyon ha'n re a wander gans flokkys.

25Rag my re walghas an enev skwith,

ha pub enev ahwerek my a dhaslenow.

26War hemma my a dhifunas ha mires, hag ow hosk o hweg dhymm.

27Otta, yma an dydhyow ow tos, yn-medh an Arloedh pan hasav chi Ysrael ha chi Yuda gans has den ha has enyval. 28Ha kepar dell withis warnedha dhe dhiwreydhya, ha dhe dewlel dhe'n dor, yndella y hwithav warnedha, dhe dhrehevel, ha dhe blansa, yn-medh an Arloedh. 29Y'n dydhyow na ny leverons namoy:

‘Tasow re dhybris gwinreun trenk,

ha dyns fleghes a dheuth ha bos sogh.’

30Mes pubonan a verow a'y anewnder y honan; dyns pub den a dheber an gwinreun trenk a dheu ha bos sogh.

31Otta, an dydhyow a dheu, yn-medh an Arloedh, pan wrav kevambos nowydh gans chi Ysrael ha chi Yuda. 32Ny vydh avel an kevambos a wrug gans aga thasow, y'n jydh ma's kemmeris der aga leuv dh'aga dri yn-mes a bow Ejyp – kevambos a dorrsons, kynth en gour31:32 gour: Po mester. Ebrow Baal. dhedha, yn-medh an Arloedh. 33Mes hemma a vydh an kevambos a wrav gans chi Ysrael wosa an dydhyow na, yn-medh an Arloedh: My a worr ow lagha a-ji dhedha ha'y skrifa war aga holonn; ha my a vydh aga Duw, hag i a vydh ow fobel. 34Ha ny dhyskons namoy pub gour y gentrevek, ha pub gour y vroder, ow leverel, ‘Godhvydhewgh an Arloedh’, rag i oll a'm aswonn a'n lyha dhe'n moyha, yn-medh an Arloedh; rag my a av aga anewnder, ha ny borthav kov a'ga fegh namoy.

35Yndellma y lever an Arloedh,

a re an howl rag golow dydh

hag ordena an loer ha'n ster rag golow nos,

a rann an mor may hwromm an tonnow –

Arloedh an luyow yw y hanow.

36Mar kwra an ordenansow ma hedhi a-ragov,

yn-medh an Arloedh,

ena has Ysrael a hedh

bos kenedhel a-ragov bys vykken.

37Yndellma y lever an Arloedh:

Mar kyll bos musurys an nevow a-ugh,

ha hwithrys selveyn an nor dhe-woeles,

ena my a dewl dhe-ves oll has Ysrael

drefenn an pyth re wrussons,

yn-medh an Arloedh.

38Otta, an dydhyow a dheu, yn-medh an Arloedh, pan vydh drehevys an sita rag an Arloedh a-dhiworth tour Hananel dhe Yet an Gornell. 39Ha'n gordenn-vusura a wra mos pella, poran dhe vre Gareb, hag ena treylya dhe Goa, 40An nans oll a gorfow marow ha'n lusu, hag oll an gwelyow bys yn gover Kidron, dhe gornell Yet an Margh war-tu ha'n duryen, a vydh sans dhe'n Arloedh. Ny vydh diwreydhys na domhwelys nevra.