Yaghheans wosa Kessydhyans

1Ger an Arloedh a dheuth dhe Yeremia an nessa treveth, pan esa hwath deges yn klos an prison, ow leverel: 2Yndellma y lever an Arloedh a wrug an nor, an Arloedh a'n formyas dh'y fastya – an Arloedh yw y hanow: 3Galow dhymm ha my a worthyp dhis, ha derivas dhis traow meur hag andrehedhadow na aswonnsys. 4Rag yndellma y lever an Arloedh, Duw Ysrael, a-dro dhe jiow an sita ma hag a-dro dhe jiow myghternedh Yuda a veu terrys dhe omwitha saw drefenn an gweythyow-esedhva, hag drefenn an kledha: 5Yma an Kaldeanys ow tos dhe omladh ha dh'aga lenwel gans korfow marow an re a ledhis vy yn ow sorr hag yn ow honnar, rag my re gudhas ow fas a'n sita ma drefenn aga drogedh. 6Otta, my a dhre dhedha sawment ha yaghheans; my a's saw ha diskwedhes dhedha palster a gres ha gwiryonedh. 7Ha my a dreyl kethneth Yuda ha kethneth Ysrael ha my a's dastrehav par dell ens wor'talleth. 8My a's glanha a'ga hammhynseth oll may peghsons er ow fynn ha gul treuspass er ow fynn. 9Ha homma a vydh hanow a lowena dhymm, gormel hag enor a-dherag oll kenedhlow an nor, pan glewons oll an da a wrav ragdha; i a's tevydh own ha krena drefenn oll an da ha rag oll an sewena a broviav dhedhi.

10Yndellma y lever an Arloedh: Y'n tyller ma may leverowgh, ‘Ynyal yw heb den na best’, yn sitys Yuda hag yn stretow Yerusalem hag yw ynyal, heb den, ha heb annedhyas, ha heb best, y fydh klewys unnweyth arta 11lev lowender ha heudhder, lev an gour pries ha lev an venyn bries, lev an re a lever, hag i ow tri offrynnow grasyans yn chi an Arloedh:

‘Gormelewgh Arloedh an luyow,

rag an Arloedh yw da,

rag y dregeredh a dhur bys vykken.’

Rag my a dreyl kethneth an tir kepar hag y'n dalleth, yn-medh an Arloedh.

12Yndellma y lever Arloedh an luyow: Arta y'n tyller ma hag yw ynyal, heb den na best, hag yn oll y sitys, y fydh peurva rag bugeledh dhe ri powes dh'aga flokkys. 13Yn sitys an vro venydhyek, hag yn sitys an Shefela, hag yn sitys an Negeb, yn pow Benyamin, hag y'n tylleryow a-dro dhe Yerusalem, hag yn sitys Yuda, an flokkys a dremen arta yn-dann leuv an den a's niver, yn-medh an Arloedh.

An Skorrenn a Wiryonedh

14Otta, an dydhyow a dheu, yn-medh an Arloedh, may kollanwav an ambos a wrug dhe ji Ysrael ha dhe ji Yuda. 15Y'n dydhyow na hag y'n termyn na my a wra Skorrenn a wiryonedh dhe sevel rag Davydh; ev a wra gwirvreus hag ewnder y'n tir. 16Y'n dydhyow na Yuda a vydh selwys ha Yerusalem a drig yn sawder. Ha hemm yw an hanow may fydh henwys: ‘An Arloedh agan gwiryonedh.’

17Rag yndellma y lever an Arloedh: Ny vydh Davydh nevra heb gour dhe esedha war dron chi Ysrael, 18na ny vydh oferysi an Levysi heb gour y'm lok dhe offrynna offrynnow leskys ha dhe leski offrynnow ys, ha dhe wul sakrifisow bys vykken.

19Ha ger an Arloedh a dheuth dhe Yeremia, ow leverel: 20Yndellma y lever an Arloedh: Mar kyllowgh terri ow hevambos gans an jydh, hag ow hevambos gans an nos, ma na vo dydh na nos yn aga ewn brys, 21ena ow hevambos gans ow gwas Davydh a vydh terrys, ma na'n jevydh mab dhe reynya war y dron, hag ow hevambos gans an Levysi, an oferysi ow menystoryon. 22Dell na yllir nivera lu nev, na musura tewes an mor, yndellma my a ynkress has Davydh ow gwas, ha'n Levysi a venyster dhymm.

23Arta ger an Arloedh a dheuth dhe Yeremia, ow leverel: 24A ny welsys fatell lever an bobel ma, ‘An dhew deylu dewisys gans an Arloedh re beu deneghys ganso’, ha fatell synsons ow fobel yn kemmys bismer ma na vons namoy kenedhel a-ragdha. 25Yndellma y lever an Arloedh: Mar ny ve ow hevambos gans dydh ha nos hag ordenansow nev ha nor, 26ena my a dhenaghsa has Yakob, ha Davydh ow gwas, ma na dhewisav nagonan a'y has avel rewloryon war has Abraham, Ysak ha Yakob. Rag my a dreyl aga hethneth, ha kemmeres truedh anedha.