Mernans Sedekia Dargenys

1An ger hag a dheuth dhe Yeremia a-dhiworth an Arloedh, pan esa Nebukadnessar myghtern Babylon hag oll y lu hag oll gwlaskordhow an bys a'y vestrynses, hag oll an poblow, owth omladh erbynn Yerusalem, hag erbynn oll hy sitys, ow leverel: 2‘Yndellma y lever an Arloedh, Duw Ysrael: Ke dhe Sedekia myghtern Yuda ha leverel dhodho: Yndellma y lever an Arloedh: my a re an sita ma yn leuv myghtern Babylon, hag ev a's lesk gans tan. 3Ha ty dha honan, ny dhienkydh a'y leuv, mes dalghennys vydhydh yn sur ha delivrys yn y leuv; dha dhewlagas a welvydh myghtern Babylon, hag ev a gews genes ganow dhe anow; ha ty a dhe Babylon. 4Mes klew ger an Arloedh, A Sedekia myghtern Yuda! Yndellma y lever an Arloedh a-dro dhis: Ny verwydh gans an kledha; 5ty a verow yn kres. Ha dell vedha leskys spisyow rag dha dasow, an vyghternedh a-varra a dheuth a-ragos, yn kettellma i a lesk spisyow ragos ha kyni ragos, ow leverel “Ellas arloedh!” Rag my re gewsis an ger, yn-medh an Arloedh.’

6Ena Yeremia an profoes a gewsis oll an geryow ma dhe Sedekia myghtern Yuda, yn Yerusalem, 7pan esa lu myghtern Babylon owth omladh erbynn Yerusalem hag erbynn oll sitys Yuda o gesys, Lakish hag Azeka: rag ny veu gesys saw unnsel an sitys kerys ma yn Yuda.

Rydhses rag Kethyon

8An ger hag a dheuth dhe Yeremia a-dhiworth an Arloedh wosa myghtern Sedekia dhe wul kevambos gans oll an bobel yn Yerusalem dhe wrontya rydhses dhedha, 9may liffrons peub aga hethyon ha'ga hethesow ma na synso nagonan Yedhow, y vroder, yn kethneth. 10Lemmyn pan glewas an bennsevigyon hag oll an bobel res eth y'n kevambos, i oll dhe livra aga hethyon ha'ga hethesow, ma nag ens arta yn kethneth, i a veu gostydh ha'ga livra. 11Mes a-wosa i a dreylyas ha daskemmeres an gethyon ha'n kethesow re liv'sons ha'ga dri arta yn kethneth. 12Ena ger an Arloedh a dheuth dhe Yeremia a-dhiworth an Arloedh, ow leverel: 13Yndellma y lever an Arloedh, Duw Ysrael: My a wrug kevambos gans agas tasow y'n jydh ma's dres yn-mes a bow Ejyp, yn-mes a'n ji a gethneth, ow leverel, 14‘Dhe benn seyth blydhen livrewgh peub y vroder ebrow re beu gwerthys dhis ha'th servya hwegh blydhen; ty a'n liver ahanas.’ Mes ny woslowas agas tasow orthiv, na treylya aga skovarn dhymm. 15Ha hwi a'gas beu edrek hedhyw hag a wrug an pyth o ewn y'm golok dre dheklarya rydhses peub dh'y gentrevek, ha hwi a wrug kevambos a-ragov y'n chi may feu ow hanow gelwys warnodho; 16mes hwi a dreylyas ha defola ow hanow pan dhaskemmersowgh agas kethyon ha'gas kethesow, neb a liversowgh war-lergh aga hwans, ha hwi a's dros arta dhe vos kethyon ha kethesow. 17Rakhenna yndellma y lever an Arloedh: Ny woslewsowgh orthiv ow krontya rydhses, pubonan dh'y vroder ha pubonan dh'y gentrevek; otta, my a wront rydhses dhywgh yn-medh an Arloedh, dhe'n kledha, dhe'n pla, ha dhe'n divoetter. My a'gas gwra euth dhe oll gwlaskordhow an nor. 18Ha my a re dhe'n wer re gammdremenas erbynn ow hevambos ha ny withsons geryow an kevambos a wrussons a-ragov, pan droghsons an leugh yn diw rann ha tremena ynter y rannow, 19pennsevigyon Yuda, ha pennsevigyon Yerusalem, an spadhesigyon, ha'n oferysi hag oll pobel an tir hag a dremenas yntra rannow an leugh – 20my a's re yn leuv aga eskerens hag yn leuv a re a hwila aga bewnans. Aga horfow marow a vydh boes dhe ydhyn an nev hag enyvales gwyls an nor. 21Ha Sedekia myghtern Yuda ha'y bennsevigyon a rov yn leuv aga eskerens, hag yn leuv an re a hwila aga bewnans, hag yn leuv lu myghtern Babylon re gildennas ahanowgh. 22Otta, my a worhemmynn, yn-medh an Arloedh, ha gul dhedha dehweles dhe'n sita ma; hag i a omladh er hy fynn, ha'y leski gans tan. Trevow Yuda my a wra ynyal heb annedhyas.